‘Sikuru e Wachna’

“Ka usiko e wachna, un jopuonjrena adier, kendo ubiro ng’eyo adiera, mi adiera noketu thuolo.”​—JOHANA 8:31, 32.

Tiend wechego: ‘Wach’ ma Yesu wuoyoe ndikono gin puonjge ma noa kuom ng’at man malo. Yesu nowacho kama: “Wuora ma ne oora e ma osemiya chik kuom gima onego awachi kod gima onego apuonji.” (Johana 12:49) Sama ne Yesu lemo kowuoyo gi Wuon-gi ma en Jehova Nyasaye nowacho kama: “Wachni en adiera.” Kinde mang’eny nojatiyoga gi Wach Nyasaye mondo osirgo puonjge. (Johana 17:17; Mathayo 4:4, 7, 10) Kuom mano, Jokristo madier ‘siko e wach’ Yesu kuom yie gi Wach Nyasaye ma en Muma kaka “adiera,” kendo yie mondo Muma e mota puonjgi.

Kaka Jokristo ma Kinde Mokwongo Nonyiso ni Giluwo Puonjno: Jaote Paulo ma bende ne Jakristo ma nondiko buge mang’eny e Muma nonyiso ni en bende omiyo Wach Nyasaye luor mana kaka Yesu notimo. Nondiko kama: “Ndiko duto okudh gi much Nyasaye kendo gikonyo.” (2 Timotheo 3:16) Chwo ma ne iyiero mondo opuonj Jokristo nonego “omakre kendo ogen Wach Nyasaye chuth.” (Tito 1:7, 9, The Amplified Bible) Jokristo ma kinde mokwongo nojiw ni mondo gikwed “riekni mag piny kod wuond manono ma wuok kuom chike kod timbe mag dhano, kendo kaluwore gi gik ma chiko yore kod paro mag pinyni, to ok kaluwore gi Kristo.”​—Jo-Kolosai 2:8.

Gin Jomage ma Timo Kamano e Kindegi? Bug Catechism of the Catholic Church nowacho weche moko ma nogolo e bug Jo-Vatican miluongo ni Dogmatic Constitution on Divine Revelation. Nowacho kama: “Kanisa mar Katholik ok ti gi Ndiko Maler kende e nono weche duto ma ji oyiego. Kuom mano, giyie gi chike machon ma gisebet ka giluwo kendo gimiyogi luor gi chunygi duto mana kaka gitimo gi Ndiko Maler.” Sula moro ma yudore e gaset mar Maclean nowuoyo e wi miyo moro ma wuok Toronto e Piny Canada. Miyono nopenjo kama: “Ang’o momiyo nyaka tawa gi weche ma nondik higni 2,000 mokalo? Wan wawegi wan gi paro moko mabeyo ma wanyalo tiyogo, kata kamano, parogi ok nyal tiyo maber nikech nyaka wasirgi gi gik ma Yesu nowacho kaachiel gi ma Ndiko wacho.”

Buk mar New Catholic Encyclopedia wacho kama e wi Joneno mag Jehova: “Muma kende e ma gitiyogo e siro gik ma giyiego kod chike ma tayo timbegi.” Machiegnini, ng’at moro e piny Canada nong’ado Janeno mar Jehova moro ka wuoyo sama ne ofulorene. Ng’atno nonyiso Janenono ni, “Angeyi.” To ka Janenono ne pod wuoro ni to ong’eye e yo mane, nosiemone Muma ma noting’o kowachone ni, “Nikech Mumano.”