‘Ka Thuah Awm Reng Rawh U’

“Ka thua in awm reng chuan ka zirtîrte in ni tak tak ang. Tin, thutak in hria ang a, thutak chuan bâwih a bân ang che u.”—JOHANA 8:31, 32.

A Awmzia Chu: Isua ‘thu’ tih chu chung lam aṭanga lo kal a zirtîrnate hi a ni a. Isua chuan: “Pa mi tîrtu chuan ka sawi tûr leh ka hrilh tûr hi thu mi pe zâwk a ni,” tiin a sawi. (Johana 12:49) A Pa vâna mi Jehova hnêna a ṭawngṭainaah, Isua chuan: “I thu chu thutak a ni,” a ti a. Pathian Thu chu a zirtîrna thlâwptu atân a la chhuak fo a ni. (Johana 17:17; Matthaia 4:4, 7, 10) Chuvângin, Kristian dikte chu ‘a thuah an awm reng,’—chu chu, Pathian Thu, Bible chu “thutak” leh an thurin leh thiltihte chunga thuneitu sâng berah an pawm tihna a ni.

Kristian Hmasate’n An Tlin Dân: Kristian Bible ziak hnem ber tirhkoh Paula chuan Isua neih ang Pathian Thu zahna chu a nei a. Heti hian a ziak a ni: “Pathian Lehkha Thu zawng zawng hi Pathian thâwk khuma pêk a ni a, . . . a sâwt bawk a ni,” tiin. (2 Timothea 3:16) Kristian unaute zirtîr tûra ruatte chu Pathian “thu rinawm . . . pawm tlat mi” an ni tûr a ni. (Tita 1:7, 9) Kristian hmasate chu ‘Krista thu ang ni lo, mihring thu rochhiah leh khawvêl A AW B te, an thu fing leh bumna mai maite’ hnâwl tûra fuih an ni.—Kolossa 2:8.

Tûn Laiah Tute’n Nge Tlin?: Roman Catholic hmunpui, Vatican-in kum 1965-a a pawm tâk Dogmatic Constitution on Divine Revelation leh tûna Catechism of the Catholic Church lehkhabu chuan: “[Catholic] Kohhran chuan a thil laihlan engkim chu Pathian Lehkha Thu Thianghlim chauh rinchhanin a nemnghet lo. Chuvângin, thu rochhiah thianghlimte leh Pathian Lehkha Thu Thianghlim chu rinawmna leh zahna nên pawm ve vein, chawimawi ve ve tûr a ni,” a ti. Maclean’s tih magazine-a thuziak pakhat chuan Canada ram Toronto-a rawngbâwltu nu pakhat chu: “Engah nge min kaihruaitu atân kum sâng bi hnih kaltaa ‘inthlâkthlengna’ duh mite thu chu kan mamawh kher ang? Mahniin ngaih dân ṭha tak tak kan nei a, chûng chu Isua leh Pathian Lehkha Thu nêna thlunzawm kan tum avângin a chau tial tial a nih hi,” tia sawi angin a târ lang a ni.

Jehova Thuhretute chungchângah, New Catholic Encyclopedia chuan: “Anni chuan Bible chu an thurin leh kal phung lo chhuahna awmchhun angin an thlîr a ni,” tiin a sawi. Tûn hnai mai khân, Canada rama pa pakhat chuan Jehova Thuhretute zînga nu pakhatin a biak ṭan chuan, chu nu Bible ken lai chu kâwk chungin: “He mi aṭang hian tu nge i nih ka hria,” tiin a sawi a ni. (w12-E 03/01)