Kukx in xi kybʼiʼn nyole

«Qa kukx ma txi kybʼiʼne nyole, axix tok che okele te nxnaqʼtzbʼene; kʼelel kynikʼe tiʼj ju yol axix tok, ex che tzoqpetele tuʼnju yol axix tok» (JUAN 8:​31, 32).

¿Tiʼ tajtoq Jesús tuʼn ttzaj tqʼamaʼn? Tej tqʼama Jesús kybʼinxe nyole, tajtoq tuʼn ttzaj tqʼamaʼn qa nim toklen tuʼn t-xi qbʼiʼn qe t-xnaqʼtzbʼil. Pero mintiʼ tqʼama Jesús qa tex tyol xi tqʼamaʼn, sino tqʼama jlu: «Porke mya wexwe nyol ma txi nmaʼne; ate Nmane tzaj samante weye, ex ma tzaj tmaʼn weye alkye tuʼn t-xi nmaʼne ex tzaʼn tten tuʼn nyoline» (Juan 12:49). Tej tnaʼn Jesús Dios te Jehová, aju Tman, xi tqʼamaʼn jlu te: «Aju tyola axix tok». Ex ajbʼen Tyol Dios tuʼn tej t-xi tqʼoʼn xnaqʼtzbʼil kye txqantl (Juan 17:17; Mateo 4:4, 7, 10). Yajtzun kye axix tok okslal, ¿tzeʼn in xi kybʼiʼn tyol Jesús? In xi kybʼiʼn aj tok qeʼ kykʼuʼj tiʼj qa axix tok aju in tqʼamaʼn Tyol Dios. Ex aj tel kynikʼ tiʼj qa oʼkx Tyol Dios jaku txi qʼamante kye tiʼ tuʼn tbʼant kyuʼn ex tiʼ tuʼn t-xi kyokslaʼn.

Aju techel kubʼ kyqʼoʼn tnejel okslal. Ok tqʼoʼn apóstol Pablo, jun okslal kubʼ tzʼibʼinte nim uʼj tiʼj Tyol Dios, toklen Xjan Uʼj ik tzeʼn bʼant tuʼn Jesús. Tqʼama jlu: «Tkyaqil aju tzʼibʼan tuj Tuʼjil, a Dios o qʼmante ex at tajbʼen te xnaqʼtzbʼil qe» (2 Timoteo 3:16). Xi qʼamaʼn kye okslal e qʼon xnaqʼtzbʼil tuʼn t-xi kyqʼoʼn «kynabʼl mastl tuʼn jun xnaqʼtzbʼil tzʼaqlxix» (Tito 1:7, 9). Ax ikx, xi qʼamaʼn kye kykyaqil okslal tuʼn tbʼant jlu kyuʼn: «Ten kykwente kyiʼje tuʼn miʼn kysbʼunjtze tuʼn kyxnaqʼtzbʼil xjal tuj kyex kynabʼl in tzaj, ex tuʼn miʼn kysbʼunjtze tuʼn kysbʼubʼl noqx gan; porke in che ok lpeʼ tiʼj ju yol kyajni qʼmaʼn kyuʼn kytijil xjal, in che ok lpeʼ tiʼj jun xnaqʼtzbʼil mya tzʼaqlxix in kyqʼoʼn xjal, mintiʼ in che ok lpeʼ tiʼj Crist» (Colosenses 2:8).

¿Alkyeqe in nel kykanoʼn techel kyaj kyqʼoʼn tnejel okslal? In tzaj tqʼamaʼn uʼj Constitución dogmática sobre la divina revelación aju etz tuʼn Vaticano toj abʼqʼi 1965 ex uʼj Catecismo de la Iglesia Católica, qa mintiʼ in jatz tkyaqil t-xnaqʼtzbʼil Iglesia Católica toj Tyol Dios. Ax ikx, in tzaj tqʼamaʼn qa il tiʼj tuʼn tok qʼet toklen kykostumbr xjal ex aju in tzaj tqʼamaʼn Tyol Dios. Toj uʼj Maclean’s, tqʼama jun xuʼj okslal te Canadá jlu: «¿Tiquʼn il tiʼj tuʼn qok lepeʼ tiʼjju in tzaj tqʼamaʼn jun uʼj aju o tzikʼ kabʼe mil abʼqʼi tkubʼlen tzʼibʼin? Ax ikx qe, jaku che bʼant tbʼanel tiʼchaq quʼn, pero in nel kyoklen aj qok lepeʼ kyiʼj t-xnaqʼtzbʼil Jesús ex tiʼjju in tzaj tqʼamaʼn Tyol Dios».

In tzaj tqʼamaʼn New Catholic Encyclopedia jlu kyiʼj testigos de Jehová: «In kyqʼamaʼn qa oʼkx Tyol Dios jaku txi qʼamante kye tiʼ tuʼn t-xi kybʼinchaʼn ex tiʼ tuʼn t-xi kyokslaʼn». Kʼitzqeku toj tnam Canadá, tej in pakbʼantoq jun xuʼj testigo de Jehová te jun xjal, pon laqʼeʼ jun xinaq kytxlaj ex xi tqʼamaʼn jlu te: «Ya ojtzqiʼn qeye wuʼne». Ok tyekʼin Biblia qʼiʼntoq tuʼn xuʼj ex tqʼamatl jlu: «In nel nikʼbʼaj kyiʼje tuʼn Biblia qʼiʼn tuʼna toj tqʼabʼa».