“Tualeiko Okukala Mondaka Yange”
“Tualeiko Okukala Mondaka Yange”
“Tyotyili muvalongwa vange, inkha mutualako okukala mondaka yange, iya mamunoñgonoka otyili, iya otyili atyimuyovola.”—JOÃO 8:31, 32.
Otyo Tyihangununa Tyi: “Ondaka” ya Jesus, omalongeso ae, atunda kondyivindyivi yavilapo. Oe wati: “Tate wokuanthuma wandongesa etyi ndyina okupopia noñgeni mandyipopi.” (João 12:49) Etyi Jesus elikuambela ku Tate yae keulu, Jeova Huku, wati: “Ondaka yove otyili.” Tyina ankho alongesa, apeho upopia Ondaka ya Huku. (João 17:17; Mateus 4:4, 7, 10) Ngotyo, Ovakristau votyotyili, ‘vatuaileko okukala mondaka yae,’ okutavela Ondaka ya Huku, Ombimbiliya, okuti “otyili” nokuhongolela omatavelo avo novituwa.
Oñgeni Ovakristau Votete Vetyilekesa: Apostolu Paulu nae ankho una onthilo Nondaka ya Huku nga Jesus. Wahoneka okuti: “Ovihonekwa aviho viatumwa okuhonekwa na Huku nokuna esilivilo.” (2 Timóteo 3:16) Ovalume vapewa otyilinga tyokulongesa Ovakristau vakuavo vena “okukakatela nawa mondaka yekolelo.” (Tito 1:7, 9) Ovakristau votete ankho valondolwa opo vaanye “omalongeso omatutu, noviso viovanthu, ovipuka viomouye vihatundile ku Kristu.”—Colossenses 2:8.
Ovalie Valandula Onondonga Ombo Hono?: O Katikisimu ko Katolika kapopia okuti: “Ongeleya yo [Katolika] kaipolo vala omalongeso ayo Movihonekwa Vikola. Anthi, oviso Novihonekwa Vikola, aviho vina okutavelwa nokuhumbwa ngetyi tulinga Novihonekwa.” Onthele imwe yomukanda Maclean’s mo Toronto, ko Canada, yapopia omutumini umwe wapula okuti: “Oityi tuesukisila okuhongolelwa nondaka yomunthu wakaleleko kohale-hale? Tuna omalusoke etu omawa, mahi ekahi nokusoya mokonda tuyeka omalusoke etu ahongolelwe Novihonekwa, netyi Jesus apopia.”
Omukanda New Catholic Encyclopedia, wapopia konthele Yonombangi mba Jeova okuti: “Ovo vahumba Ombimbiliya, nokuyeka ihongolele omatavelo avo novituwa.” Omulume umwe ko Canadá, wapopila Ombangi imwe ya Jeova ankho uhanda okupopia nae, okuti: “Ame ndyityii ovelie, mokonda yetyi watyinda,” ayulika Ombimbiliya yae.