“Si boso keda fiel na mi palabranan, boso realmente ta mi disipelnan, i boso lo konosé e bèrdat, i e bèrdat lo hasi boso liber.”—HUAN 8:31, 32.

Kiko Hesus Tabata Ke Men? Ora Hesus a bisa “mi palabranan,” el a referí na su siñansanan ku a bini di un fuente mas haltu. E di: “Ta e Tata ku a manda mi a duna mi òrdu tokante kiko pa bisa i kiko pa siña hende.” (Huan 12:49) Ademas, den orashon na su Tata selestial, Yehova Dios, el a rekonosé: “Bo palabra ta e bèrdat.” P’esei tur ora bai e tabata sita e Palabra di Dios pa apoyá su siñansanan. (Huan 17:17; Mateo 4:4, 7, 10) Pues, kon kristiannan berdadero ta ‘keda fiel na su palabranan’? Nan ta aseptá Beibel, e Palabra di Dios, komo “e bèrdat” i komo e outoridat máksimo di nan kreensia- i práktikanan.

E Ehèmpel di e Promé Kristiannan: Apòstel Pablo, e kristian ku a skirbi mas karta di Beibel, tabatin e mesun rèspèt pa e Palabra di Dios ku Hesus tabatin. El a skirbi: “Henter e Skritura ta inspirá di Dios i ta probechoso.” (2 Timoteo 3:16) Ademas, hòmbernan apuntá pa siña otro kristian a haña e instrukshon pa “tene duru na e Palabra di Dios ku ta sigur i konfiabel.” (Tito 1:7, 9, The Amplified Bible) I e kristiannan di promé siglo a haña e konseho pa rechasá “filosofia i engaño bano ku ta basá riba tradishon di hende, segun e kosnan básiko di mundu i no segun e siñansanan di Kristu.”—Kolosensenan 2:8.

Ken Awe Ta Hasi Meskos? E obra Konstitushon Dògmátiko Tokante Revelashon Divino—aprobá pa Vatikano na 1965 i sitá den Katesismo di Iglesia Katóliko—ta bisa: “Iglesia [katóliko] no ta saka su konvikshon di tur loke a ser revelá for di e Skritura Sagrado so. P’esei, tantu Tradishon Sagrado komo Skritura Sagrado mester ser aseptá i venerá ku e mesun sentido di lealtat i rèspèt profundo.” Un artíkulo den e revista Maclean’s a sita un pastor muhé di Toronto, Canada, ku a bisa: “Pakiko nos tin mester di un bos ‘revolushonario’ di dos mil aña pasá pa guia nos? Nos mes tin masha idea fabuloso, pero konstantemente nan ta ser debilitá pasobra nan mester kuadra ku loke Hesus i e Skritura ta bisa.”

E New Catholic Encyclopedia ta bisa di Testigunan di Yehova: “Nan ta konsiderá Beibel komo nan úniko fuente di kreensia i di norma di kondukta.” Resientemente, un hòmber na Canada a interumpí un Testigu di Yehova ku tabata introdusiendo su mes i a bis’é: “Mi sa kaba ken bo ta,” i mustrando riba e Beibel den man di e Testigu, “e buki ei ta reda bo.”