Blieft bie miene Wieed

“Wan jie bie dee Wieed bliewen, waut ekj junt jelieet hab, sent jie woarhauftich miene Jinja. Dan woa jie weeten waut Woarheit es, un de Woarheit woat junt frie moaken” (JOHANES 8:31-32, PB)

Waut daut meent: Jesus siene “Wieed” meenen Jesus siene Lieren, waut von Gott komen. Jesus säd: “De Voda, dee mie jeschekjt haft, haft mie jesajcht, waut ekj doonen un räden saul” (Johanes 12:49, PB). En een Jebäd säd Jesus to sienen himlischen Voda, Jehova Gott: “Dien Wuat es de Woarheit.” Wan Jesus aundre lieed, dan neem hee foaken waut ut Gott sien Wuat (Johanes 17:17, PB; Matäus 4:4, 7, 10). Woare Christen wiesen, daut see bie siene Wieed bliewen, wan see daut jleewen, daut Gott sien Wuat “de Woarheit” es un daut uk en äa Läwen nokomen, waut daut sajcht.

Woo de ieeschte Christen daut nokjeemen: De Apostel Paulus acht Gott sien Wuat sea väl, krakjt soo aus Jesus deed. Paulus schreef: “Aule Schreft von Gott jejäft, es wieetvoll” (2. Timotäus 3:16, PB). Wan doa wäa enne Christenvesaumlunk lieren deed, dan wort dän jesajcht: “Hee saul sikj uk tru aun daut woarhauftje Wuat hoolen” (Titus 1:7, 9, PB). Paulus säd to de ieeschte Christen, daut see sikj sullen wajchhoolen von “huage Rädensoaten wua nuscht doarhinja es, dee bloos von Menschen staumen …, dee oba nich von Christus komen” (Kolossa 2:8, PB).

Wäa kjemt daut vondoag dän Dach no? No dän Katekjisem von de katoolsche Kjoakj no deit de katoolsche Kjoakj äare Lieren nich bloos ut de Schreft nämen. Dee nemt uk Lieren von Menschen aun. Fa dee sent Menschenlieren krakjt soo wichtich aus de Bibel. No een Buak no säd eene Fru von Kanada, waut Gloowesleida es, daut see nich jleeft, daut wie wudden sellen onse Iedeeen oppe Schreft stetten un opp daut, waut Jesus tweedusent Joa trigj lieed.

De New Catholic Encyclopedia sajcht von Jehova siene Zeijen: “Dee stetten äaren Gloowen bloos oppe Schreft un dee läwen doano.” Eemol, aus eent von Jehova siene Zeijen jroz bie eenen Maun en Kanada aune Däa wia un jroz sajen wull, wäa see wia, räd de Maun doa mank un säd to ar: “Ekj weet, wäa du best”. Hee wees no äare Bibel un säd: “Daut es daut Tieekjen doafäa.”