«Ma’ akanaa’ taq xnuk’uhtaaj taq aweh»

«Mi ma’ xakanaa’ taq xnuk’uhtaaj taq aweh, pan korik hat taq wajtahqaneel, na’anab’eem taq i korik eh re’ i korik ne taq tiruchej» (JUAN 8:​31, 32, TNM)

¿Chajariik xraaj ruqʼorom i Jesús? Noq reh reh xuq’or «mi ma’ xakanaa’ taq xnuk’uhtaaj taq aweh», xuq’or rub’ehel chi re’ iruk’uhtaaj inchalik naq ruuk’ jenaj nim rajaawriik. «Ruum re’ hin ma’ xata panuk’ux inchalik taqe nuq’or re’ la’ i WaJaaw xtaaq’anik cho weh inq’orik weh taqe i nuq’or, taqe i nuk’uhtaaj» (Juan 12:49). Noq xub’an rutiij chuwach i Rajaaw Jehová, re’ wilik cho pan taxaaj, re’ reh xuq’or: «re’ aq’oraal korik». Ruum aj reʼ, noq irub’an naq i k’uhtanik inq’orik naq chi riij i ruq’orom i Dios keh taqeh rajkamanoom najtir (Juan 17:17; Mateo 4:​4, 7, 10). Jeʼ reʼ noq, ¿nik’wach ma’ inkikanaa’ ta i xk’utjik keh ruum i Jesús taqeh i manlik ajnimaneel? Ruukʼ rukojariik wach i ruq’orb’al i Dios, re’ inkan pan Santo Laj Huuj, chi xa ar wo’ ne inqasik’ i korik eh xa re’ wo’ re’ ne inqakoj reh ruye’ariik qana’ojb’al pan qanimaniik eh pan qak’achariik.

Reʼ kehtalil taqeh i peet ajnimaneel. Re’ apóstol Pablo, q’e’ k’ih taqeh carta reh i Santo Laj Huuj xutz’ihb’aaj. Re’ reh iruyeew wo’ naq ruloq’il i ruq’orb’al i Dios, re’ tz’ihbamaj pan Santo Laj Huuj, je’ rukab’ xub’an i Jesús. Re’ reh xuq’or: «Chu’nchel i wilik chupaam i ruq’orb’al i Dios uxlab’imaj ruum i reh. Inkamanik reh kʼuhtanik» (2 Timoteo 3:​16, TNM). Eh xqʼorarik keh taqeh winaq reʼ inkibʼan naq i kʼuhtanik pan molaab’, chi ma’ na ta naq «kik’uhtaam tokoom k’uhb’aal wila’ maʼ re’ i manlik k’uhb’al inchalik ruuk’ i Dios» (Tito 1:​7, 9, Biblia en Lenguaje Sencillo [Nuevo Testamento]). Xq’orarik wo’ keh taqeh ajnimaneel chi ma’ ne ta inkinimaj i «na’ojb’al xamaʼ xta ruk’am chaloq. Reʼ keh xa chukul q’orik taqe, xa runa’ojb’al winaq inkik’uhtaaj, ma’ ruuk’ taj i Jesucristo inchalik inkik’uhtaaj» (Colosenses 2:8).

¿Ajwach inkib’an i wilih yuʼnaak? Pan Constitución dogmática sobre la divina revelación, reʼ xye’arik q’ab’ reh ruum i Vaticano pan 1965 eh xelik cho pan Catecismo reh Iglesia Católica, iruqʼor chi re’ iglesia católica ma’ xa re’ ta pan Santo Laj Huuj irisaj cho taqeh iruq’or rub’iral. Eh chi je’ re’, [re’ Santo Laj Huuj eh re’ kina’ojb’al i keh] jenaj wach i kiloq’il inye’arik. Pan revista Maclean’s jenaj ixoq i ink’amwik b’eeh pan iglesia ar Toronto (Canadá) xuq’or: «Ma’ koruman ta runimjiik i iruq’or i Santo Laj Huuj eh i xuk’uhtaaj i Jesús, re’ i ki’ib’ mil chik haab’ ik’inaq chi xq’orjik cho».

Re’ huuj New Catholic Encyclopedia iruq’or chi riij taqeh testigo reh Jehová. «Inkinimaj chi xa re’ wo’ i Santo Laj Huuj inkʼuhtanik reh i nakikojom wach eh chi ar inkireq kina’ojb’al reh i kik’achariik». Ko majaa’ najt ta, jenaj winaq aj Canadá ma’ xukanaa’ ta chi jenaj Testigo ne inq’orik. Xuq’or reh: «Weht’al ajwach taq i hat». Eh ruuk’ i ruq’ab’ k’ahchi’ naq ruk’uhtaam i ruSanto Laj Huuj i ixoq, eh xuq’or reh: «Re’ huuj wilik pan aq’ab’, iruk’uhtaaj ajwach taq i hat».