“Lu ken Kwaghôron Wam Zan Zan”

“Aluer nea lu ken kwaghôron Wam zan zan yô, ne mba mbahenen Av mimi je; man né fa mimi, mimi kpaa una pase ne una tuhwa.”— YOHANE 8:31, 32.

Inja i Mkaanem Man: Ka atesen a Yesu a yange ngohol hen Ter na la a lu “kwaghôron” na ye. Yesu kaa ér: “Ka Ter u A tindim la je, A nem tindi sha kwagh u Me kaa man shi Me ôr kpaa ye.” (Yohane 12:49) Shighe u Yesu lu eren msen hen Yehova Aôndo, Ter na u sha la, a kaa ér: “Ka kwaghôron Wou je a lu mimi ye.” Yange ôron kwagh teren Mkaanem ma Aôndo hanma shighe sha u suen atesen a na. (Yohane 17:17; Mateu 4:4, 7, 10) Sha nahan yô, Mbakristu mba mimi ‘mba ken kwaghôron na zan zan,’ inja na yô, ve lumun ér Bibilo i i lu Mkaanem ma Aôndo la, ka “mimi” shi ka sha i̱ aeren a ve kua akaa a ve ne jighjigh a mi la cii a har ye.

Er Mbakristu Mba sha Ayange a Tsuaa Mbara Er Kwagh u Yesu Kaa Ne Yô: Apostoli Paulu u a hembe ngeren ityakerada i Bibilo kpishi la yange na Mkaanem ma Aôndo civir er Yesu nahan. A nger ér: “Icighanruamabera cii ka Aôndo A ne i nger ye. Ngu a inja.” (2 Timoteu 3:16) Mbakristu mba yange i tsua ve ér ve tesen Mbakristu mbagenev la lu u vea “kôr ave taveraa sha kwaghôron u jighjigh.” (Titu 1:7, 9) Yange i wa Mbakristu mba sha ayange a tsuaa mbara kwagh ér ve venda ‘kwaghfan shin atseregh a gbilinigh. Akaa ne ka sha inja i ukaaer mba ior la, shi ka sha inja i ujijingi mba taregh mba hiihii, kera ka sha inja i Kristu a lu ga.’—Mbakolose 2:8.

Ka Unô Ve Lu Eren Kwagh ne Nyiana? Takerada ugen u u lu a atindi a Pop, a yange i hii u eren tom a mi ken inyom i 1965, i yer u ér Dogmatic Constitution on Divine Revelation, shi i nger akaa a ker ken Katekisema u Mbafada la kaa ér: “Ka ken Icighan Ruamabera tseegh Côôci i [Katoliko] i zough a mpase u mimi sha hanma kwagh u í pase ga. Sha nahan yô, gba u a lumun a atesen a Côôci shi a na a icivir vough er se suur sha atesen a Icighan Ruamabera shi se nengen un ser ka icighan kwagh nahan.” Ngeren u ken magazin u i yer ér Maclean yô ter kwagh u minista ugen ken tar u Kanada yange ôr ken Toronto, gartamen u tar la yô, a pine ér: “Er nan ve i lu mkaanem ma ‘van a mgem’ ma yange i ôr anyom a kar hegen 2,000 la se soo ser ma tese se kwagh u se ere? Se mba a mbamhen mba dedoo, kpa hanma shighe yô ka i taver se u dondon ve vough sha ci u se mba nôngon ser se dondo Yesu man Ruamabera yum.”

Takerada u i yer ér New Catholic Encyclopedia la ôr kwagh u Mbashiada mba Yehova ér: “Ve nenge Bibilo ér ka i tseegh i lu a akaa a ve ne jighjigh a mi kua atindi a ve dondon ken uma ye.” Semberee ne, Kwaseshiada ugen ken tar u Kanada lu pasen iyolna hen orgen, maa or la tôndo un sha zwa ér: “M fa imba kwase i u lu yô,” maa a hôn uwegh sha Bibilo i kwase ne lu a mi la, a kaa ér “ka sha ikyav you ne m fe u ye.”