‘Lutirizgani Kusunga Mazu Ngangu’

“Asani mulutirizga kusunga mazu ngangu, ndikuti ndimwi akusambira ŵangu nadi. Muziŵengi uneneska ndipu uneneska wo ukufwatuweningi.”—YOHANE 8:31, 32.

Kumbi Venivi Ving’anamuwanji? “Mazu” ngaku Yesu ngasazgapu vinthu vosi vo iyu wangusambiza ndipu vinthu venivi vingutuliya ku munthu wapachanya. Yesu wangukamba kuti, “Ada wo akundituma ndiwu akundipaska dangu la vo nditenere kukamba kweniso kulongoro.” (Yohane 12:49) Wachipemphera kwaku Yehova Chiuta, wo Mbawisi akuchanya, Yesu wangukamba kuti: “Mazu nginu mbuneneska.” Kanandi iyu wazumbuwanga fundu za mu Mazu ngaku Chiuta kuti walongo kuti vo wasambiza vauneneska. (Yohane 17:17; Mateyu 4:4, 7, 10) Mwaviyo, Akhristu auneneska nawu ‘alutirizga kusunga mazu ngaki,’ kung’anamuwa kuti azomereza kuti Mazu ngaku Chiuta pamwenga kuti Bayibolu “mbuneneska.” Mu Mazu ngaku Chiuta mwenumu ndimu ato vosi vo achita kweniso vo agomezga.

Kumbi Akhristu a mu Nyengu ya Akutumika Angufiska Wuli Venivi? Wakutumika Paulo yo wenga Mkhristu kweniso wakulembaku mabuku nganandi nga mu Bayibolu, nayu wawonanga Mazu ngaku Chiuta nge mo Yesu wangawoniyanga. Iyu wangulemba kuti: “Malemba ngosi ngakukambirika ndi Chiuta, ndipu ngatovya.” (2 Timote 3:16) Munthu yo wasankhikanga kuti wasambizengi Akhristu anyaki wakhumbikanga kuja “wakukolesa mazu ngakugomezgeka” ngaku Chiuta. (Tito 1:7, 9) Akhristu akwambiriya anguchiskika kuti akanengi “zeru za ŵanthu kweniso uryarya waŵakaŵaka mwakukoliyana ndi mudawuku wa ŵanthu, ndipuso fundu zipusu zo charu chitende, kweni mwakukoliyana ndi Khristu cha.”—Akolose 2:8.

Mbayani wo Achita Venivi Mazuŵa Nganu? Buku la marangu nga tchalitchi la Katolika la mu 1965 lo likukoleka so mazu mu Catechism of the Catholic Church likamba kuti: “Tchalitchi [la Katolika] ligwiriskiya ntchitu Malemba Ngakupaturika pe cha pakusankha vinthu. Mwaviyo, tikhumbika kuzomereza ndi kukweza midawuku yidu yakupaturika ndipuso Malemba Ngakupaturika mwakuyanana waka.” (Dogmatic Constitution on Divine Revelation) Mumagazini ya Maclean’s mwenga mazu nga mliska munyaki munthukazi wa ku Toronto, ku Canada, yo wangukamba kuti: “Ntchifukwa wuli tikhumbika kulongozgeka ndi mazu ‘ngapade’ ngo ngakukambika vyaka 2,000 vo vajumpha? Nasi mazuŵa nganu te ndi fundu zakovya kweni ziwoneka kuti zambula fundu chifukwa tiŵanaŵaniya so dankha vo Yesu kweniso Malemba ngakamba.”

Pakukamba za Akaboni aku Yehova, buku linyaki likamba kuti: “Yiwu awona kuti vo agomezga kweniso vo achita vikhumbika kutuliya mu Bayibolu pe mbwenu.” (New Catholic Encyclopedia) Pambula kuswera yapa, Kaboni waku Yehova munyaki munthukazi ku Canada wangufika panyumba ya munthu munyaki. Iyu wachiyamba waka kujikonkhoska, munthu yo wangudumuwa mazu ndi kukamba kuti: “Lekani waka ndi kusuzgika, ndakuziŵani kali, ndawone waka chizindikiru chinu.” Iyu wangukamba venivi wachilongo Bayibolu lo Kaboni waku Yehova wangupinga.