«Teme jun awoʼtanic ya xʼayinex ta stojol te jcʼope»

«Teme jun awoʼtanic ya xʼayinex ta stojol te jcʼope, mero jnopojelex cuʼun ya xcʼohex; soc ya me anaʼbeyic sba te smelelil cʼop, soc ha ya yaqʼuex ta libre te smelelil cʼope» (JUAN 8:31, 32).

¿Bin ya skʼan ya yalbey skʼoplal-a te Jesuse? Te kʼalal la yal «te jcʼope» jaʼ ya yalbey skʼoplal te bin la yakʼ ta nopele, pero jaʼnix jich la yal te jaʼ lijkem tal ta stojol te Diose. Jich la yal te Jesuse: «Te Jtat te la sticonon tal, ha la spason ta mandar te bin ya scʼan ya cal soc te ya jpuc ta halel» (Juan 12:49). Te kʼalal la skʼopon te sTat ay ta chʼulchan te jaʼ te Jehová, jich la yal te Jesús: «Ha smelelil cʼop te acʼope». Jaʼ yuʼun kʼalal nojpteswan jaʼ la yalbey skʼoplal te bin yakʼojbey stsʼibay Dios te j-abatetik yuʼun ta namey kʼinal (Juan 17:17; Mateo 4:4, 7, 10). Jich yuʼun, ¿bin-utʼil te smelelil jchʼuunjeletik yuʼun Jesús ya x-ayinik ta stojol te skʼope? Jaʼ te kʼalal ya yilik te Biblia jich bitʼil sKʼop te Dios sok ya skʼan ya schʼuun yoʼtanik te jaʼ «smelelil kʼop» te jaʼnax ya skʼan ya kalbeytik te bin ya jchʼuuntik sok te bin yilel ya skʼan ya xkuxinotik.

Te ejemplo yuʼun te sbabial jchʼuunjeletik yuʼun Cristo: Te jpuk-kʼop Pablo jaʼ te machʼa bayalxan cartaetik yuʼun Biblia la stsʼibay, jaʼnix jich la yichʼ ta mukʼ-euk te sKʼop Dios, jich bitʼil te Jesuse. Jich la stsʼibay: «Spisil te bila tsʼibubil ta Sjun te Diose, loqʼuem tel ta yoʼtan te Diose. Ya xtuun cuʼuntic» (2 Timoteo 3:16, Xchʼul Cʼop Dios ta Tzeltal yuʼun Oxchuc soc Tenejapa). Jaʼnix jich te winiketik te ya xnojpteswanik ta congregación la yichʼik albeyel te manchuk ya yakʼik ta nopel te «lequil cʼop» teme ma talem ta stojol te Dios (Tito 1:7, 9). Jaʼnix jich la yichʼik albeyel te sbabial jchʼuunjeletik te manchuk ya yakʼ yoʼtanik «ta scuenta biluc nax cʼopil te mayuc scuentahil, te bintic ay ta nopel yuʼun ants-winiquetic soc te bintic stalel ay ta naʼel ta scuenta nax bahlumilal, te ma haʼuc yuʼun te Cristo» (Colosenses 2:8).

¿Machʼatik jich ya spasik-euk ta kʼajkʼal ini? Ta 1965 te Vaticano la spas aprobar te bin ya yal te documento te sbiilinej, Constitución dogmática sobre la divina revelación sok ya yichʼ albeyel skʼoplal ta Catecismo de la Iglesia Católica te jich la tsʼibayel-a: «Mame jaʼuknax lokʼem tal ta sJun Dios spisil te bin ya jnaʼtik ta swenta Dios ta banti iglesia. Jaʼ yuʼun ta schebal te Chʼul Costumbre sok te Schʼul Kʼop Dios ya skʼan ichʼel ta mukʼ sok te pajaluknax mukʼ skʼoplal ya kiltik ta schebalike». Jtul jcholkʼop ants ta Toronto Canadá, jich la yal ta revista Macleanʼs: «¿Bin yuʼun te ya skʼan jaʼ ya kakʼ jbatik ta stojobtesel yuʼun te bin la yichʼ alel ayix tal chaʼmil jaʼbile? Te joʼotike jaʼnix jich ay bin lek ya jnoptik-euk, pero maʼyuk yip ya xkʼot te kʼalal jaʼ ya skʼan ya kakʼbeytik yiptajib tey-a te ta bin la yal te Jesús sok te bin ya yal te Bibliae».

Te New Catholic Encyclopedia jich ya yal ta stojol te testigoetik yuʼun Jehová: «Ya spas ta skuxlejalik te bin ya yal te Biblia sok jaʼ te lokʼem tal spisil-a te bin schʼuunejike». Matoba bayal kʼajkʼal jtul winik ta Canadá la stuchbey skʼop te jtul ants Testigo te yakal yalel machʼa-ae. Jich la yal: «Ya jnaʼix te machʼaixe», la stuch kʼabtaybey te sBiblia sok jich la yalbey, «te libro te awichʼoj ta akʼabe jaʼ ya yakʼ ta ilel te machʼa-ate».