“Phi Obọ Phihọ Ota Mẹ”

“Wo de phi obọ phihọ ota mẹ vwẹ ọ rẹ uyota ovwan ke dia idibo mẹ, ovwan ke riẹn uyota na, uyota na ko ru ovwan phihọ ọmuvwiẹ.”—JỌN 8:31, 32.

Obo ro Mudiaphiyọ: “Ota” ri Jesu mudiaphiyọ iyono rọyen ri nẹ obọ rẹ Ọghẹnẹ rhe. Jesu da ta: “Ọsẹ na ro ji vwe na vẹ ekpuyovwi rọye re kẹ vwẹ urhi rẹ obo re me ta vẹ obo re me ta wan.” (Jọn 12:49) Jesu vwọ nẹrhovwo rhe Jihova Ọghẹnẹ rọ dia Ọsẹ rọyen rọhẹ obodjuvwu, ọ da ta: “Ota wẹn hẹ uyota.” Jesu rionbọ kpo Ota rẹ Ọghẹnẹ ọke buebun vwẹ iyono rọyen. (Jọn 17:17; Matiu 4:4, 7, 10) Ọtiọyena, Inenikristi rẹ uyota ‘phi obọ phihọ ota rọyen’—kọyen ayen rhiabọreyọ Ota rẹ Ọghẹnẹ rọ dia Baibol na kerẹ “uyota” na, rọ dia oborẹ ayen mu iyono vẹ obo rẹ ayen ruẹ eje kpahen.

Oborẹ Inenikristi rẹ Ẹgbukpe Ujorin Rẹsosuọ Vwo Djephia: Ọyinkọn Pọl rọ dia ọvo usun rẹ ihwo ri si Baibol na, je vwẹ ẹro rẹ Jesu vwo ni Ota rẹ Ọghẹnẹ vwo no. O de si: “Isiesi Ọfuanfon na eje ẹwẹn rẹ Ọghẹnẹ yen e vwo sio, ọ vọnre vẹ erere.” (2 Timoti 3:16, NW ) Eshare re vwo mu nẹ i yono Inenikristi efa, cha dia ihwo re “yọnrọn uyota rẹ Ota rẹ Ọghẹnẹ ro muẹro ra sa vwẹroso.” (Taitọs 1:7, 9, The Amplified Bible) E jiriro kẹ Inenikristi rẹ Ẹgbukpe Ujorin Rẹsosuọ nẹ ayen sen “erianriẹn vẹ uyono rẹ efian rayen, kugbe uruemu rẹ awanre rẹ ayen yọnra vẹ ebaghẹrẹ rẹ akpọ nana, ri shephihọ urhi ri Kristi-i.”—Kọlose 2:8.

Amono Yen Ruo Nonẹna?: Ọbe na Catechism of the Catholic Church tare nẹ, “Ọ dia Isiesi Ọfuanfon na ọvo yen Ishọshi ri Fada mu iyono rẹ ẹga rayen eje kpahe-en. Ọtiọyena, ofori nẹ a vwẹ ẹro vuọvo re vwo nẹ Isiesi Ọfuanfon na vwo nẹ iyono rayen kpahen ẹkuruemu rẹ ihworakpọ, ji rhiabọreyọ ayen vẹ ọghọ.” Uyovwinrota ọvo vwẹ imagazini ri Maclean ta ota kpahen oborẹ ipastọ ọvo vwẹ Toronto, Canada tare, rọ vwọ nọ: “Diesorọ avwanre vwọ vwẹ uphẹn kẹ obo ra tare vwẹ ẹgbukpe uriorin ivẹ re wanre nẹ o sun avwanre? Avwanre vwo iroro romobọ rẹ avwanre re pha yoyovwin ri shekpotọ ọkieje kidie nẹ e churu ayen siẹ Jesu vẹ Isiesi Ọfuanfon na.”

Vwọ kpahen Iseri ri Jihova, ọbe ri New Catholic Encyclopedia da ta: “Ayen mu esegbuyota rayen vẹ obo rẹ ayen ruẹ eje kpahen Baibol na ọvo.” Okrinọ-ọ na, ọke rẹ Oseri ri Jihova ọvo vwo dje oma rọyen kẹ ọshare ọvo rọ guọnọ ghwoghwota kẹ vwẹ Canada, ọshare na da daji jọ rionbọ phiyọ Baibol rẹ Oseri na yọnre, ọ da ta: “Mi vughe uwe fikirẹ Baibol rẹ wọ yọnre.”