‘Mama lánigu ubóu’

“Aba heyereegudún lun ubóu, ladüga mama hamá lánigu ubóu.” (HUAN 17:14)

Ka mini lubéi: Mama meha lánigu ubóu Hesusu, mádaragunti meha lungua lidoun haturobulin gürigia ni le luáguti polítika ni amu luwuyeri turóbuli le lídanti lidaani. Ariñagati Hesusu: “Mama lánina ubóu le narúeihan; lun hamuga ítara liña lan, hageindaguña hamuga nánigu lun mederegerúniwa nan houn lúrudugu huríu. Mama yaana narúeihan.” (Huan 18:36.) Ani arufudahati giñe houn lani disipulugu lun máyeihan hamani igaburi, ayanuhani luma usa le uéibei teweridiha Bíbülia (Matéu 20:25-27).

Hénpulu le híchugubei furumiñetiña kristiánugu: Tidan aban garüdia to ayanuhaboun luagu relihión, ariñagati aban abürühati gíriti Jonathan Dymond hawagu furumiñetiña kristiánugu: “Máhatiña houdin [lidan wuribu] meberesenga kaba lan asusereda houn, íbini barǘ lan busiganu houn, hadaürǘn o háfarawagun hilagubei”. Himei hamuti hasufurirun lubaragiñe hádaragun houngua lidoun katei lánina ubóu. Adügati giñe laruman hanügüni habagari lun amu hamá hawéi ha híbiri gürigia. Ligía lariñawagúnbei houn: “Guentó, wéiritu hanigi lau mafala humaaña lan lidan lagübüri ibagari le; ligía hadimurehanbei wuriba huagu” (1 Féduru 4:4). Ariñagati abürühati líburu Will Durant hawagu kristiánugu, “lau lueirin hafiñen luma lubuidun hóuserun siadi hamutiña meha gürigia ha ígiraguagüdübaña houngua lun ugundani ubouaguna”.

Kátaña adügübalin ligiaméme uguñe?: Luagu mádaragun hamá kristiánugu houngua lidoun polítika ni lidoun wuribu, ariñagatu New Catholic Encyclopedia luagu “lidan lan hasaminan gürigia, wuribati lamahadúniwa lun tanügüniwa áruma”. Ariñagati aban arütíkulu, le áfuridubei tidan Reformierte Presse —le asagarúbei lídangiñe aban ariñahani le tídanbei óundaruni to arihiboun lau lichugúniwa le yuubei houn gürigia ubouagu gíritu African Rights— luagu sun lan ligilisi gánitiña lidan háfarawagun wisiu gürigia Ruanda lidan irumu 1994, “gefentiñarügüñanu luagu Heowá mídehan”, lidan áfarahani ligía.

Dan le hayanuhan luagu Holocausto [háfaraguniña nazis huríu lidan libiaman wuribu wéiriti], ariñagati aban máisturu “úati ni aban sétanu ni óundaruni hani gürigia to íchugutu fuledei luagu saragu iyeeni luma luriban hóuseruniwa gürigia luma saragu katei wuribati le adügǘbei lárigiñe”. Gama lumoun, lárigiñe lachoururuni katei lidan Museo Conmemorativo del Holocausto de Estados Unidos, abürühati: “Guentó subudi naali luagu mítaran lan”. Aba líchugun fe, úaraguatiña lan meha gefentiña luagu Heowá lun hafiñen íbini wuriba lan hóuseruniwa.

Lidan luáguti laruman ibagari, ka áyeihabalin hani furumiñetiña kristiánugu hénpulu? Ariñagatu U.S. Catholic: “Hibe-agei gürigia wéinamuhaña ha katoliku magundantiña lau tarufudahan ligilisi luáguti hawinwandun gürigia hámagua [luma] hagamaridun lubaragiñe hamarieidun”, aba táguyuguagüdüni le lariñagubei aba alidihati relihión le ariñagubei: “Hibe-agei gürigia ha únbaña narufudaha —gayarati nariñagun hóugiñe lan 50%— wínwanhaña hámagua lubaragiñe hayabin amarieida”. Según tariñagun The New Encyclopædia Britannica, hawagu gefentiña luagu Heowá “harumati hanügüni habagari”.