“Gendeh Sila del Mundo”

“El mundo ya odia canila, cay gendeh sila del mundo.”—JUAN 17:14.

Si Cosa Este Quierre Decir: Cay gendeh le parte del mundo, neutral si Jesus na politica y na maga pelea entre el maga gente na de suyu tiempo. “Si el dimio Reino de este mundo,” ya explica le, “mi maga siguidores ay pelea era para gendeh conmigo entrega na mano del maga Judio. Pero mi Reino gendeh de este mundo.” (Juan 18:36) Ya anima tambien le con el de suyu maga siguidores que evita con el maga custumbre, palabra y conducta que contra na Palabra del Dios.—Mateo 20:25-27.

Si Paquemodo el Maga Cristiano del Primer Siglo Ya Sigui con Ese: Asegun na un escritor de religion que si Jonathan Dymond, el maga Cristiano del primer siglo “gendeh ta participa na [guerra]; maskin cosa pa el resulta de este, hace man kanila huya, preso o mata.” Mas quierre pa sila sufri contra que gendeh queda neutral. Diferente tambien sila por causa na diila moral principio. Ya habla con el maga Cristiano: “Ta espanta sila ahora cuando ustedes gendeh ta man junto canila na ese clase de vida noay control y ta abusa sila con ustedes.” (1 Pedro 4:4) El un historian que si Will Durant ya escribi que el maga Cristiano “ta causa lingasa con el maga pagano quien quierre-quierre na alegria por causa na diila devocion y pagka-decente.”

Quien Ta Sigui con Ese Ahora? Acerca con el neutralidad del maga Cristiano, el New Catholic Encyclopedia ya habla: “Gendeh gayot justo que gendeh conforma participa na guerra.” El un articulo na Reformierte Presse ya habla que asegun na report del African Rights, un organizacion que ta defende con el derecho del maga gente, el todo iglesia ya participa durante el matanza na tribo na Rwanda del 1994 “puera lang con el maga Testigo de Jehova.”

Acerca na Nazi Holocaust, el un maestro de high school ya habla que “nuay grupo o organizacion del maga ordinario gente el ya condena con el imbusterias, maltratamiento y el todo maga grabe cosas que ya sucede.” Despues consulta con el United States Holocaust Memorial Museum, ele ya escribi: “Ahora sabe ya yo el contestacion.” Ya sabe le que el maga Testigo de Jehova nuay man compromiso con el diila creencia maskin pa na grabe tratamiento que ya ricibi sila.

Quetal el diila principio na moral? “El mayoria del maga joven adulto Catolico gendeh tan uyun con el maga enseñanza del iglesia que gendeh justo man junto antes casa y el sexo antes el matrimonio,” ya habla el magasin U.S. Catholic. El magasin ya menciona con el un ministro del iglesia quien ya habla: “Ta mira yo bien grande por ciento—siguro maga mas de 50 por ciento—el tan junto ya antes sila casa.” El The New Encyclopædia Britannica ya observa que el maga Testigo de Jehova “ta sigui con el bien alto principio acerca na sexo y matrimonio.”