Mach i chaʼañobic pañimil

«Jiñi pañimil tsaʼix i tsʼaʼleyob come mach i chaʼañobic pañimil» (JUAN 17:14).

¿Chuqui yom i yʌl Jesús? Jesús mach i chaʼañic pañimil come maʼañic tsiʼ yotsa i bʌ ti política o ti chuqui tac miʼ melob jiñi lac piʼʌlob. Tsiʼ yʌlʌ: «Jiñi c Yumʌntel mach i chaʼañic ili pañimil. Cheʼ i chaʼañic pañimil jiñi c Yumʌntel, jiñi xcoltayajob c chaʼan tsiʼ chaʼleyob jatsʼ chaʼan maʼañic mi cʌjqʼuel tiʼ cʼʌb jiñi judíojob. Pero tiʼ sujm, jiñi c Yumʌntel mach wʌʼic chʼoyol ti pañimil» (Juan 18:36). Cheʼ jaʼel, tiʼ sube jiñi xcʌntʼañob i chaʼan chaʼan maʼañic miʼ melob chuqui tac tsʼaʼ bʌ miʼ qʼuel Dios (Mateo 20:25-27).

Jiñi ñaxam bʌ xñoptʼañob maʼañic tsiʼ yotsayob i bʌ tiʼ chaʼan bʌ pañimil. Juntiquil wiñic i cʼabaʼ Jonathan Dymond tsiʼ yʌlʌ chaʼan jiñi ñaxam bʌ xñoptʼañob «maʼañic tsaʼ majliyob [ti guerra] mach yʌlʌyic chuqui miʼ melbentelob, mi tsaʼ wajlentiyob, mi tsaʼ otsʌntiyob ti cárcel o mi tsaʼ tsʌnsʌntiyob». Come xucʼul yomob ajñel, tsiʼ cuchuyob chuqui jach tsaʼ tumbentiyob. Jin chaʼan, Pedro tiʼ sube jiñi xñoptʼañob: «Toj sajtelob i pusicʼal cheʼ jatetla mach cheʼix chumuletla cheʼ bajcheʼ jiñi biʼtic jax bʌ i melbalob tiʼ cuxtʌlel, jin chaʼan ñumeñix ti pʼis chuqui miʼ yʌlob ti laʼ tojlel» (1 Pedro 4:4). Jiñi historiador Will Durant tsiʼ yʌlʌ chaʼan jiñi muʼ bʌ i melob mach tac bʌ weñic, tsʼaʼ tsiʼ qʼueleyob jiñi xñoptʼañob come miʼ jacʼob muʼ bʌ i yʌl jiñi Biblia.

¿Majqui jiñi xucʼuloʼ bʌ jaʼel ili ora? Jiñi New Catholic Encyclopedia miʼ yʌl chaʼan mach weñic cheʼ maʼañic mi lac jacʼ majlel ti guerra. Jumpʼejl revista ti Suiza miʼ yʌl chaʼan pejtelel jiñi iglesia tsiʼ yotsayob i bʌ ti jiñi tsʌnsa tsaʼ bʌ ujti Ruanda ti 1994, cojach jiñi i testigojob Jehová maʼañic tsiʼ yotsayob i bʌ.

Juntiquil maestro chaʼan secundaria tsiʼ taja ti tʼan jiñi tsaʼ bʌ i melob jiñi nazijob i tsiʼ yʌlʌ chaʼan maʼañic majqui tsiʼ yʌlʌ «chaʼan mach weñic pejtelel jiñi jontolil yicʼot ticʼlʌntel tsaʼ bʌ ujti». Pero cheʼ bʌ tsajñi yaʼ ti Museo Conmemorativo del Holocausto ti Estados Unidos, tiʼ tsʼijbu: «Wʌle cujil chaʼan mach cheʼiqui». Tsiʼ qʼuele chaʼan jiñi i testigojob Jehová maʼañic tsiʼ yotsayob i bʌ anquese tsaʼ wen ticʼlʌntiyob.

¿I majqui miʼ qʼuelob ti ñuc muʼ bʌ i yʌl jiñi Biblia chaʼan jiñi ñujpuñel yicʼot chaʼan jiñi piʼleya? Jumpʼejl revista chaʼan Católica ti Estado Unidos miʼ yʌl chaʼan «cabʌl xcolelob catolicojoʼ bʌ maʼañic miʼ ñopob chaʼan cojach yom miʼ lajal chumtʌlob yicʼot miʼ piʼleñob i bʌ juntiquil wiñic yicʼot xʼixic cheʼ bʌ ñujpuñemobix». Cheʼ jiñi miʼ yʌl tsaʼ bʌ i yʌlʌ juntiquil diácono: «Cabʌlob muʼ bʌ j cʌntesañob, mi cʌl ñumen ti ojlil, chumulobix yicʼot i piʼʌl cheʼ maxto ñujpuñemobic». Yambʌ enciclopedia miʼ yʌl chaʼan jiñi i testigojob Jehová «miʼ chaʼleñob wersa chaʼan miʼ jacʼob muʼ bʌ i yʌl jiñi Biblia chaʼan jiñi ñujpuñel yicʼot piʼleya».