Олар пу чир-чалбахтаң ниместер

«Олар даа пу чир-чалбахти полбааннарынаңар, чир-чалбахтағы кізілер оларны хырт кӧргеннер» (ИОАНН 17:14).

Анзы нимені таныхтапча? Иисус чир-чалбахтаң полбаан, аннаңар социальнай паза политическай кӱрезіглерге ара кірбеен. «Минің хан-чирім пу чир ӱстӱнде нимес. Хан-чирім пу чир ӱстӱнде полған полза, нымысчыларым, Мині иудейлерге пирбес ӱчӱн, алныма турарҷыхтар. Че хан-чирім — чир ӱстӱнде нимес» (Иоанн 18:36). Ідӧк Иисус ӱгренҷілеріне Худай Сӧзі чаратпинчатхан сағыс оңдайына, чоохха паза тудынысха кӧӧкпеске ӱгреткен (Матфей 20:25—27).

Пастағы христианнар хайди тудынғаннар? Хайди религиознай темаларға пасхан Джонатан Даймонд чоохтапча: «Пастағы христианнарны сӧклезелер дее, харибге одырт салзалар даа алай ӧдірзелер дее, олар [чааларда] аралазарға отказ полҷаңнар». Нейтралитетті ле сайбабас ӱчӱн, олар ирееленерге дее тимде полғаннар. Ағаа хоза, оларның нравственнай нормалары пӧзік полған. Петр илҷі оларнаң хада киртінминчеткен кізілердеңер пасхан: «Амды сайбахха паза кӱлетке хада салынминчатханнарыңа хахап, олар сірерні сӧклеп чӧрчелер» (1 Петрның 4:4). Тархынҷы Вил Дюрант христианнардаңар піди пасхан: «Олар Худайға пазырчатханнарынаң паза чахсы тудыныстарынаң ӱтертенерге хынчатхан языческай чонны хыпчыхтандырҷаңнар».

Пӱӱн кем іди тудынча? «Наа католическай энциклопедияда» христианскай нейтралитеттеңер піди пазылча: «Киртіністің ӱчӱн чаалазарға хынминчатханнарға ахтаныс чоғыл». Пір швейцарскай газетада «Африканецтернің праволары» тіп правозащитнай организацияның сӧстерінің хоостыра, 1994 чылда Руандадағы геноцидте «Иегованың киречілерінең пасха прай тигіриблер араласханнар» тіп пазылған (Reformierte Presse).

Пір ӱгретчі нацизм тузында полған холокосттаңар ачырғанып піди чоохтаан: «Пір дее олаңай кізілернең пӱткен группа алай организация хазыр тудынысха, чойға паза кізілерні иреелеп ӧдіргеніне тоғырланмаан». Америкадағы холокосттың музейінзер айланған соонда, ол піди пасхан: «Ам мин сынны піліп алдым». Ниме ол піліп алған? Иегованың киречілері, оларнаң хазыр тудынған ползалар даа, постарының киртіністерін артыспааннар.

Нравственнай нормалардаңар ниме тирге чарир? «Ю.С. католик» тіп журналда чоохталча: «Амғы туста чиит католиктернің кӧбізі, хоных хонғалахха, хада чуртирынаңар тигірибнің ӱгредиинең чараспинчалар». Ідӧк анда дьяконның сӧстері пирілчелер: «Хайди мин сизінчем, уғаа кӧп кізі, хоных хонғалахха, хада чуртап сыхчалар». «Наа британскай энциклопедияда» Иегованың киречілері пӧзік нравственнай нормаларҷа пик тудынчалар тіп пазылча.