“Si b’Ekihugho”

“Ekihugho mukyakwabo obusu, kusangwa si b’ekihugho.”​—YOANE 17:14.

Ekya Kikamanyisaya: Yesu erithendibya w’ekihugho, syabya na lhuhandi omwa malhwa w’abandu n’aby’ekipolitiki eby’omwa buthuku biwe. Mwabugha athi, “Obwami bwaghe bulhue bw’ekihugho kino, kumbe abaghombe baghe bangalhwa isinanga hotherwa n’Abayuda. Nikwa obwami bwaghe si bw’eno.” (Yoane 18:36) Kandi mwabwira abigha biwe athi bayihighule okwa mitse, emibughire, n’emibere eyo Ekinywe kya Nyamuhanga kikathanga.​—Matayo 20:25-27.

Ngoku Abakristayo ab’Erimbere Bakolha Eki: Erikwamana n’omuhandiki ow’eby’edini ya Jonathan Dymond, Abakristayo ab’erimbere “ibakaghana erisangira omwa [lhuhi]; mbulha mukendi lhwiririraki, mbulha n’ikolhwa nabi, kutse erihirwa omo ngomo, kutse olhuholho.” Ibakaligha eriaghalhwa omwakanya k’erilemwa erithendibya na lhuhandi omwa by’ekipolitiki. N’esyongeso syabu isikaleka ibabya bambaghane. Abakristayo mubabwirwa bathi: “Kandi ab’ebihanda bakasweka omughulhu muthesangira nabo omwa syonye syabo sy’erithamira, neryo bakabatsuma.” (1 Petero 4:4) Oyusomire ebyakera ya Will Durant mwahandika athi Abakristayo “babya bakabulisya ekihugho ekyabirighunga omwa by’eriyitsemesya ky’obuholho omw’ibya ibanzire kutsibu Nyamuhanga kandi ibawithe esyongeso esyuwene.”

Ni Bahi Abakakolha eki Munabwire? Kikakania okwa Bakristayo erithendibya na lhuhandi, ekitabu New Catholic Encyclopedia kikabugha kithi: “Sikihikire erighana eryingira omwa mahe.” Omwatsi omwa Reformierte Presse akabugha athi eripoti eya African Rights, ekithongole eky’obughabe bw’abandu, yikakania okw’ithibwa linene erya banya Rwanda omwa 1994 muyakangania ngoku amakanisa wosi mwasangira mulyo, “erihako Abema ba Yehova.”

Erikania okwa Nazi Holocaust, omusomesya w’esiniya mwabugha athi “sihali gurupu kutse ekithongole eky’esyondulhani abayira eky’eribugha okwa mabehi mangyi, obubi, n’erithingithya abandu ebyabya.” Abere abirisekulya omwa United States Holocaust Memorial Museum, mwahandika athi: “Munabana eky’erisubirya okwa kibulyo kyaghe.” Mwaminya ngoku Abema ba Yehova mubasighika ebyo bikirirye nomubana bana eriendereribwa linene kutsibu.

Kandi ibbwa ebihano byabu eby’esyongeso? “Munabwire, eminyethu mingyi Abakatuliki sibali lighirana n’esyongangirirya sy’ekanisa esihambire oko myatsi y’engyingo isimuthahenie,” egazeti eya U.S. Catholic yithya. Egazeti yikakanaya oku mudikoni, oyuwabugha athi: “Abanene abo ngalhangira​—namateberezya abalhabire oku pesente 50—​bakalunga ibalhue ibane haghuma.” E New Encyclopædia Britannica yikabugha yithi Abema ba Yehova “bakamakirira ebihano ebihambire okwa by’esyongeso omo ngebe yabu.”