“Kechi Bo ba Pano pa Ntanda Ne”

“Ba pano pa ntanda bebashikwa, mambo abo kechi bo ba pano pa ntanda ne.”—YOANO 17:14.

Mwatala Bino Byambo: Na mambo a kubula kwikala ba pano pa ntanda, Yesu kechi wivwangilepo mu bya pano pa ntanda ne milukuchi yayo ne. Yesu walumbulwile’mba: “Umvwe Bufumu bwami bwajinga bwa pano pa ntanda, inge ba mingilo bami baji kundwilako kuba’mba babule kumpana ku Bayudea. Pakuba Bufumu bwami kechi bwa pano pa ntanda ne.” (Yoano 18:36) Yesu watundaikile baana banji ba bwanga kuchinuzhuka bintu nabiji ñambilo ne byubilo byakanya Mambo a Lesa.​—Mateo 20:25-27.

Byaubile Bena Kilishitu Batanshi: Muntu umo wamba pa bya bupopweshi aye Jonathan Dymond waambile’mba bena Kilishitu batanshi “bakaine kwivwanga mu nkondo nangwa kya kuba bebamanyikilenga, kwibakasa nangwa kwibepaya.” Abano bena Kilishitu batanshi bafuukwilepo kumanama kukila kwivwanga mu bya pano pa ntanda. Kabiji na mambo a byubilo byabo byawama bibalengela kupusanako na bantu bakwabo. Bena Kilishitu bebakambizhe’mba: “Bakumya bingi mambo kechi mwatwajijila kuba byubilo byatama byo bobapo ne, onkao mambo bemwambila byatama.” (1 Petelo 4:4) Shayuka wa mpito aye Will Durant wanembele’mba bena Kilishitu “bakatezhengatu bantu pano pa ntanda na mafunjisho abo.”

Bañanyi Babula Kwivwanga mu bya Pano pa Ntanda Ano Moba? Buku wa New Catholic Encyclopedia waambile pa bena Kilishitu ene mambo o babujila kwivwanga mu bya pano pa ntanda amba: “Kyatama muntu kukana kwikala na buta.” Kabiji kibaaba kimo mu Reformierte Presse kyaambile pa sawakya umo waambilepo ulwilako luusa lwa bantu mu Africa. Kano kabungwe kalwilako luusa lwa bantu kaambile’mba mu mwaka wa 1994 bantu bavula bingi bo baipayile mu kyalo kya Rwanda kabiji kataaine ne kuba’mba machechi onse evwangilemo mu ino nkondo kufumyakotu Bakamonyi ba kwa Yehoba.”

Kwamba pa bantu bavula bo baipayile ku kafulumende wa Nazi, mufunjishikata umo wa pa sukulu mukatampe waambile’mba kafwako jibumba ja bangikazhi jaambilepo pa bubela, pa bumbanzhi ne bya malwatu bikwabo byamwekele amba byatama ne. Byo aipwizhe kipamo kya ku United States kitala pa Kishimikwa mo Balamina bya Kishakulu wanembele’mba: “Pano nataana mukumbu.” Wayukile’mba Bakamonyi ba kwa Yehoba baketekela bingi mu bintu byo baitabilamo nangwatu bebayanjishepotu byepi kechi basankilapo lwitabilo lwabo ne.

Nga byubilo byabo biji byepi? Pepala wa byambo umo wa U.S. Catholic waambile’mba: “Banyike bavula ano moba baji mu katolika bakana byo bafunjisha pa mitwe ya kuba’mba wamulume ne wamukazhi bafwainwa kwikala pamo saka babula kwisongola ne kuba’mba kijitu bulongo kuba bulalelale.” Kabiji uno yenka pepala wa byambo waambilepo pe dikoni umo wa mu katolika amba: “Bantu bavula bingi babena kwikala pamo saka bakyangye kwisongola.” Buku wa The New Encyclopædia Britannica naye waambilepo kuba’mba Bakamonyi ba kwa Yehoba “bakookela mikambizho yonse yafwainwa kulondela mwina Kilishitu wa kine.”