Jab M̦õttan Lal̦

“Lal̦ ear kõjdat er bwe rejjab jãn lal̦.”​—JON 17:14.

Mel̦el̦ein Men In: Jijej ear jab jãn lal̦ ak jab m̦õttan lal̦. Mel̦el̦ein men in bwe ear jab bõk kun̦aan ilo m̦akũtkũt ko an kien im kiojal̦jal̦ ko an armej ro ilo raan ko an. Ear ba: “El̦aññe aõ aelõñ jãn lal̦ in, innem ro karejera renaaj kar ire, bwe en jab ketak Eõ ñan ri Ju ro. A kiiõ Aõ aelõñ ejjab jãn ijin.” (Jon 18:36) Ear bareinwõt rõjañ rũkal̦oor ro an bwe ren dike l̦õmn̦ak ko, im wãween kõnono im m̦wil ko me Naan in Anij ej ba n̦ae.​—Matu 20:25-27.

Wãween Kũrjin ro M̦okta Rar Jerbale Men In: Ekkar ñan juon ri jeje kõn kabuñ etan Jonathan Dymond ej ba bwe Kũrjin ro ilo raan ko an rijjelõk ro “rar abwin bõk kun̦aaer ilo [tarin̦ae]; jekdo̦o̦n ta eo ear wal̦o̦k ñan er. Rar m̦akoko meñe rar matõrtõr er ak kalbuuji er ak m̦an er ñan mej.” Rein rar kããlõt eñtaan jãn aer rupe tõmak eo aer im m̦õttan lal̦. M̦wilier ear bareinwõt kalikkar aer oktak. Kar jiroñ Kũrjin ro: “Bwe kom̦ jab ettõr ippãer ñan tõre kanooj l̦ap ãinwõt aer im kõnono n̦ae kom̦ kake.” (1 Piter 4:4) Will Durant, juon eo im ear katak kõn mour an ri etto ro, ear ba bwe an Kũrjin ro m̦okta “jutak pen im jim̦we im mour erreo ekõm̦m̦an bwe ri pegan ro ejej mour ko aer ren abn̦õn̦õ.”

Wõn Ro Rainin Rej Kwal̦o̦k Ejja Wãween In Wõt? Ikijjeen an Kũrjin ro jab bõk kun̦aaer ilo tarin̦ae, juon bok in Katlik (New Catholic Encyclopedia), ej ba: “Elukkuun bõd ñe jej jab bõk kun̦aad ilo tarin̦ae.” Ekkar ñan juon nuujpeba jãn Africa ear jeje kõn ripoot eo an doulul eo ej jutak kõn maroñ im jim̦we an armej in Africa. Ripoot in ej kwal̦o̦k kõn kabata eo ilo Rwanda ilo 1994 im ear kwal̦o̦k bwe enañin aolep kabuñ ko rar bõk kun̦aaer “ijello̦kun wõt Ri Kõnnaan ro an Jeova.”

Ke rej kõnono kõn jorrããn ko rar wal̦o̦k ilo Nazi Holocaust eo, juon ri kaki in high school ear kwal̦o̦k an bũrom̦õj im ba bwe “ejjel̦o̦k kumi in armej ak jabdewõt doulul rar kõnono n̦ae detdet in riab ko wõj, kõm̦m̦an ko relãj, im tokãlik m̦anm̦an armej.” Bõtab, ãlikin wõt an kar bõk mel̦el̦e jãn Holocaust Memorial Museum eo ilo Amedka, l̦ein ear jeje im ba: “Kiiõ euwaak kajjitõk eo aõ.” Tokãlik ear jel̦ã bwe Ri Kõnnaan ro an Jeova rar jutak pen ilo tõmak eo aer meñe rar bõk matõrtõr im jorrããn.

Ta kõn m̦wilin Kũrjin ro im aer mour erreo? Juon bok an Katlik ilo Amedka (U.S. Catholic), ej ba bwe “enañin aolep jodrikdrik ro ilo kabuñ in Katlik rejjab errã kõn katak ko an kabuñ eo bwe enana pãlele m̦okta jãn aer m̦are.” Ilo bok in ej kwal̦o̦k kõn naan kein an juon ri tõl an kabuñ in Katlik im ej ba: “Ij lo bwe elõñ wõt, emaroñ elõñl̦o̦k jãn 50 bõjjããn in ro im eto aer jokwe ippãn doon im pãlele m̦okta jãn aer itok im m̦are.” Ak ekkar ñan juon bok (The New Encyclopaedia Britannica), ej ba bwe Ri Kõnnaan ro wõt an Jeova rej “jutak pen im dãpij aer mour erreo.”