“Kavalingi Onthele Youye”

“Ouye ukahi nokuveyala, mokonda kavalingi onthele youye.”—JOÃO 17:14.

Otyo Tyihangununa Tyi: Mokonda Jesus ankho kalingi onthele youye, kalingile oupanga nouye nopulitika. Oe wahangununa okuti: “Inkha ouhamba wange walingile onthele youye uno, omapanga ange ñgeno alwa opo nahaawe kova judeu. Mahi, ngetyi netyipopia, ouhamba wange hawamunoko.” (João 18:36) Tupu walondola ovalanduli vae velityilike ontheto, nomupopio, novituwa viailikwa Mondaka ya Huku.—Mateus 20:25-27.

Oñgeni Ovakristau Votete Vetyilekesa: Ngetyi tyapopia Jonathan Dymond omuhoneki wongeleya, Ovakristau votete ankho “vaanya okulipaka [movilwa], namphila ankho vetyii okuti vapondola okupenyua, nokupakwa movikaleya nokuipawa.” Vaholovona okumoneswa emone tyipona okuyekapo ekolelo liavo. Tupu ovitumino viavo ankho vielikalela. Ovakristau vapopilwa okuti: “Mokonda muayekapo okuendaenda navo okukalinga ovipengi, tyivenumanesa, moluotyo, vatualako okutupopia omapita.” (1 Pedro 4:4) Omuhipululi Will Durant wahoneka konthele Yovakristau okuti “onthilo novituwa oviwa ovio ankho vivemonesisa ononkhumbi.

Ovalie Valandula Onondonga Ombo Hono? Konthele Yovakristau vehelipake mopulitika, omukanda New Catholic Encyclopedia wati: “Okuhetavela okukuata omauta katyaviukile.” Onthele imwe yomukanda Reformierte Presse upopia etyi eongano liokuamena ovanthu mo Afilika, liapopia okuti onongeleya ambuho mbelipakele movilwa viaendele mo Ruanda mo 1994, mahi “Onombangi mba Jeova ovo vala vehelipakelemo.”

Okupopia konthele Yovilwa vio Nazista, omulongesi umwe wosikola onene weliyava okuti, “kutupu otyikundyi ine eongano liovanthu liayala omatutu, noonya, novivi ovikuavo.” Etyi akatala mondyuo muapakwa ovipuka vipopia konthele yovilwa ovio mo Estados Unidos, wahoneka okuti: “Pahe ndyina ekumbululo.” Oe wanoñgonoka okuti Onombangi mba Jeova vapamena momatavelo avo namphila ankho valingwa unene onya.

Iya konthele yovituwa viavo? “Omukanda wo Katolika ko Estados Unidos, wati: “Ovakuendye ovanyingi vo Katolika kavetavela omalongeso ongeleya atyilika omulume nomukai okukala kumwe ine okulinga otyihola tyihelinepele.” O jornale yapopia onkhalamutwe yongeleya, yati: “Ovanthu ovanyingi ndyimona, ankho vakalale kumwe etyi nkhele vehenelinepe.” Omukanda New Encyclopedia Britannica wapopia okuti Onombangi mba Jeova “vakakatela movitumino viavilapo konthele yovituwa oviwa.”