Siet nich Poat von dise Welt

“De Welt es an fientlich, wiels see nich von dise Welt sent” (JOHANES 17:14, PB)

Waut daut meent: Wäajen Jesus nich Poat von dise Welt wia, haud hee kjeenmol waut met de Politikj (ooda Rejierungssachen) to doonen un menjd sikj uk nich mank Striedarieen, waut Menschen hauden. Jesus säd: “Wan mien Kjennichrikj von dise Welt wia, wudden miene Deena jekjamft haben, daut ekj von de Juden nich faust jenomen wort. Oba mien Kjennichrikj es nich von dise Welt” (Johanes 18:36, PB). Hee säd uk to siene Jinja, woo see läwen sullen: Dee sullen von aules wajchbliewen, waut Gott fa schlajcht tald (Matäus 20:25-27).

Woo de ieeschte Christen daut nokjeemen: De Schriewa Jonathan Dymond säd, daut de Christen daut nich deeden nom Kjrich gonen, wan de Menschen an doawäajen uk schlajcht lieden kunnen ooda see em Jefenkjnis kjeemen ooda stoawen musten. Dee wullen leewa lieden, aus een Poat von dise Welt sennen un em Kjrich gonen. Un de Christen wieren uk aundasch, wäajen dee soo läwden, aus de Schreft daut fa rajcht tald. Petrus säd to de Christen: “Secha woaren june väaje Frind sikj wundren, daut jie nich mea lostich en äare Gottloosichkjeit metläwen, un see woaren uk äwa junt spotten un lachen” (1. Petrus 4:4, PB). De Jeschichtsforscha Will Durant säd, daut de Menschen, waut een schwienschet Läwen fieeden, de Christen nich jleichten. Wuarom nich? Hee säd, daut de aundre Menschen daut stieed, daut de Christen no de Schreft läwden.

Wäa kjemt daut vondoag dän Dach no? De New Catholic Encyclopedia sajcht äwa Christen, daut et orrajcht es, wan dee nich nom Kjrich gonen wellen. Een Buak von de Schweiz sajcht, daut aule Kjoakjen bie de groote Merdarie en Ruanda aun 1994 metmuaken, buta Jehova siene Zeijen (Reformierte Presse).

Een Liera von eene Huachschool räd von aul daut schlajchte, waut de Nazis hauden aunjerecht en de Tiet von dän Tweeden Weltkjrich. Hee fruach sikj, wuarom doa kjeene Grupp haud prooft, waut jäajen de Läajes un aul de schlajchte Sachen to sajen, waut doa passieeden. Un nodäm aus hee enne Stäts bie daut Holocaust Memorial Museum haud nojeforscht, säd hee: “Nu hab ekj miene Auntwuat”. Hee wort en, daut Jehova siene Zeijen sikj gaunz aun äaren Gloowen hilden, wan an doawäajen uk sea schlajcht behaundelt wort.

Waut denkjen woare Christen äwa Sex un dän Ehestaunt? Daut Buak U.S. Catholic sajcht, daut de mieeschte junge katoolsche Menschen doa nich met envestonen sent, waut de Kjoakj lieet äwa toop wonen un Sex haben verem befrieen. Daut Buak schrift, waut een Diakoon sajcht: “Ekj jleew, daut een grootet Prozent (ekj jleew, daut es äwa 50 Prozent) von dee, waut sikj befrieen, aul ea toop wonen.” The New Encyclopædia Britannica sajcht, daut Jehova siene Zeijen sikj werkjlich aun daut hoolen, waut de Schreft äwa Sex un dän Ehestaunt sajcht.