«Maba ayic ta scuenta bahlumilal»

«Pero pʼajotic yuʼun te bahlumilal, como maba ayic ta scuenta bahlumilal» (JUAN 17:14).

¿Bin ya skʼan ya yalbey skʼoplal-a te Jesuse?: Maba wentainot te balumilal te Jesuse, melel maba la schʼik sba ta política sok ta bin ya spas te ants winiketik ta skʼajkʼalel, jich la schol: «Te liʼuc ay ta bahlumilal te cuentahinel cuʼune, te aʼbatetic cuʼun ya spasic guerra scuenta yuʼun ma ba ya xʼochon ta cʼabal yuʼun te judíohetic te hichuque. Pero ma liʼuc ay te cuentahinel cuʼune» (Juan 18:36). Jaʼnix jich la snojptes te jnopojeletik yuʼun te yakuk spʼajik te taleliletik, te bin-utʼil ya xkʼopojik sok bin yilel ya xkuxinik te ants winiketik te maba lek albil skʼoplal ta Biblia (Mateo 20:25-27).

Te ejemplo yuʼun te sbabial jchʼuunjeletik yuʼun Cristo: Ta jlejch jun ta swenta religión te la stsʼibay te Jonathan Dymond, jich la stsʼibay ta swenta te sbabial jchʼuunjeletik yuʼun Cristo: «Mananix la skʼan bajtik ta guerra-a, manchukme snaʼojik te ya staik kʼexlal, chukel o lajel yuʼune». Yakʼoj sbaik-a te ya xkʼax swokolik swenta yuʼun maba ya schʼik sbaik ta guerra. Yanxan te bin yuʼun ma jichuk ya spasike, jaʼ te bin yilel te skuxlejalike. Jaʼ yuʼun jich la yichʼik albeyele: «Jchahp ya yaʼiyic a te ma ba yac ajoquinic ta spasel te biluc nax mulil ya smulanic spasele, ya slabanex yuʼun» (1 Pedro 4:4). Jich bitʼil la schol te historiador Will Durant ta swenta te slekil talelike sok te bin-utʼil schʼuunejik te Diose te sbabial jchʼuunjeletike «la yakʼik ta ilel te maba lek te bin ya spasik te ants winiketik ta balumilal te baem yoʼtanik ta spasel te bin ya smulan yoʼtanike».

¿Machʼatik jich ya spasik-euk ta kʼajkʼal ini? Ta swenta te bitʼil ma skʼan ya schʼik sbaik ta guerra o ta política te jchʼuunjeletik yuʼun Cristo, te New Catholic Encyclopedia ya yal te maba lek ta ilel teme maba ya jchʼik jbatik ta guerra o ta política. Jun artículo yuʼun te Reformierte Presse la yalbey skʼoplal te bin la yal te organización de derechos humanos African Rights, ya yal te spisil te iglesiaetik, la yaʼiyik milaw te kʼalal la yichʼ milel bayal tajtul ants winiketik ta Ruanda ta 1994, «jaʼnax ma la schʼik sbaik-a te testigoetik yuʼun Jehová».

Jtul maestro yuʼun secundaria ya smel yoʼtan yuʼun te ta yorail-a te la yichʼik nutsel sok milel bayal ta jtul ants winiketike, «maʼyuk junuk grupo o organización la yakʼ ta naʼel te bin la yichʼik pasel, jich bitʼil te lotiletik la yalik, te utsʼinel la yichʼik sok te bintik chopol la yichʼik pasel ta patil baele». Kʼalal la sjojkʼoybey skʼoplal ta Museo Conmemorativo del Holocausto ta Estados Unidos, jich la stsʼibay: «La jnaʼix stojol te ma jichuk kʼot ta pasele». Kʼot ta yoʼtan te manchukme bayal la yichʼik utsʼinel te testigoetik yuʼun Jehová maba la skʼaxuntayik te bin schʼuunejike.

¿Machʼatik ya skʼayinbeyik stalel te sbabial jchʼuunjeletike? Te revista U.S. Catholic, jich ya yal: «Jteb ma spisiluk te jchʼieletik ta religión católica ya spʼajik te nojptesel ta swenta te machʼatik ya xjuʼ ya sjokin sbaik sok te ya sjokin sbaik ta wayel te kʼalal matoba nujpunemik-ae». Patil ya yalbey skʼoplal jtul diácono, te jich ya yal: «Kʼaxem ta olil te machʼatik ya jnojptes, sjokinojix sbaik ta kuxinel-a te kʼalal ya xnujpunike». Te The New Encyclopædia Britannica, ya yal te testigoetik yuʼun Jehová «ma jichuk ya spas stukelik».