“Subudigüda naali biri”

“Subudigüda naali biri houn wügüriña ha basagarubaña lídangiñe ubóu lun bíchuguniña nun. [...] Subudigüda naali biri houn, ani nasubudiragüdamemebei.” (HUAN 17:6, 26, NM)

Ka mini lubéi: Subudigüda lumuti Hesusu liri Bungiu lau layusuruni lidan lani ministeriu. Chóuruti írida lumuti meha liri Bungiu dan laliihanu líburu tídangiñe Bíbülia, to abürüdüboun lidan Ebüréu, ani yarafaguati meha ladügüni katei le (Lúkasi 4:16-21). Arufudahati giñe houn lani disipulugu lun hamuriahan: “Wáguchi Bungiu le siélubei, inebewelá biri” (Lúkasi 11:2).

Hénpulu le híchugubei furumiñetiña kristiánugu: Dan meha layanuhanbei apostolu Féduru hama wéiyaaña lidan afiñeni ha Herusalénbaña, aba lariñagun luagu sagaali lan Bungiu hádangiñe sun néchani “gürigia ha anügübalin liri” (Adügaü 15:14, NM). Dan meha le hapurichihan lani Hesusu disipulugu hama ha híbiri apostolugu ariñagatiña: “Sunme ha agúaruti liri Bungiu [“Heowá”, NM], hasalbaruba” (Adügaü 2:21; Rómana 10:13). Ru hamuti giñe liri Bungiu lidan le habürüdǘbei. Tidan aban líburu gíritu Tosefta to ñein lubéi labürüdǘwa sun halurudun huríu —gumuwati tabürüdǘniwa kéiburi lidan irumu 300— ayanuhóuati luagu tágudun líburu burí to hani kristiánugu. Ariñagati tidan: “[Ewanhéliu burí] tuma burí líburu to hani lílana sétanu [másiñati huríu lan ha adügübaña kristiánugume] lunti tágudun lidan fulasu le ñein tubéi lau sun liri Bungiu le tídanbei”.

Kátaña adügübalin ligiaméme uguñe?: Lidan tebelaagüle Bíbülia Revised Standard Version —to unboun líchiga Sétanu lánina Ageiraü tani Ligilisi lani Kristu Meriga, üma lun tabürüdǘniwa— ariñagati: “Layusurun furumiñeguarügü iri lun Bungiu le ábanrügüti ani ligíarügüti, kamá hamuga añahein amu búngiugu ha uéibaña mosu lan lasubudirúniwa, aba mayusurun waali lan liri Bungiu lidan hani huríu relihión lubaragiñe hadaani kristiánugu, ani mabuidunti katei le lun hafiñen tílana Ligilisi Kristiána”. Ligía tayusurunbalin Bíbülia to dimurei Aburemei lubaragiñe hamuga tayusuruni liri Bungiu. Ma meme binarü, ru lumuti Vaticano, lúrudu le houn ibisibugu: “Danme le ladügün kultu, lidan uremu, luma lidan furíei moun lumuti layusurun Liri Bungiu kei tetragrammaton YHWH ani moun lumuti giñe líridun”. *

Kátaña ayusurubalin liri Bungiu ani subudigüda haméi? Aba líchugun aban nibureinti gíriti Sergey fe kátaña lan adügübalin. Dan le aweirideina lubéi lidan ageiraü Kirguistán, aba larihin aban pelikula ñein lubéi lariñawagúa Heowá lan líribei Bungiu. Maganbunya lumuti iri le darí lárigiñe diisi irumu. Lárigiñe aba láguyun Merigoun, ñein aba hadaünha biama gefentiña luagu Heowá luagu lubenari, aba harufuduni liri Bungiu lun tidan Bíbülia. Gúndaati Sergey lau ladeirun aban relihión le ayusuruti liri Bungiu. Lárigiñe dimurei “Heowá Bungiu”, ariñagatu aban dimurei-agei: “Ligía Bungiu le íñugutimabei ani lúnrügüñein háhuduragua gefentiña luagu Heowá” (Webster’s Third New International Dictionary).

[Abürüduni]