“Ngang Üa Asile Ngeniir Itom”

“Üa pwärala itom ngeni chokewe ka ngeniei seni won fanüfan. . . Ngang üa asile ngeniir itom, nge üpwe sopwela ai föri iei usun.”​—Jon 17:6, 26.

Met Weween ena Wokisin: Jises a pwäri iten Kot ren an nöünöü lon ewe angangen afalafal. Atun Jises a ällea seni ewe Paipel, usun minne a piin föfföri, a apworausa wesewesen iten Kot we. (Luk 4:16-21) A asukula nöün kewe chon tapwelo mwirin pwe repwe iotek: “Semem, itom epwe pin.”​—Luk 11:2.

Ekkewe Chon Kraist Loom Ra Esilei Iten Kot: Ewe aposel Piter a ereni ekkewe mönümirit lon Jerusalem pwe Kot a fen angei seni ekkewe mwu eü mwichen “aramas fan asengesin itan.” (Föför 15:14, TF) Ekkewe aposel me ekkewe ekkoch ra afalafala pwe “iteiten aramas mi köri iten ewe Samol [Jiowa] epwe küna manau.” (Föför 2:21, TF; Rom 10:13) Ra pwal nöünöü ena it mi pin lon pwisin makkeier kewe puk. Eü pilükün allükün chon Jus, itan Tosefta mi mak orun 300 ier mwirin Kraist, a kapas usun ekkewe puk makkeien ekkewe Chon Kraist mi kekilo ren ekkewe chon ü ngeniir, a erä: “Ekkewe puk nöün ekkewe Chon afalafal me ekkewe puk nöün ekkewe minim [ra ekieki pwe iir Chon Jus mi wiliti Chon Kraist] ra kekilo. Iwe nge, ra mut ngeni ekkena [puk] mi wor ekkoch pworausen Iten Kot we mi Pin lon ar repwe kekilo.”

Iö Kewe ra Esilei Iten Kot lon Ach ei Fansoun? Lepoputään ewe Revised Standard Version Paipel, ewe a nom fän tümünüen ewe National Council of the Churches of Christ in the United States, a apasa: “Nöünöün it fän iten ewe emön chök Kot a fen kaülö lon ewe lamalamen chon Jus me mwen fansoun Chon Kraist me ese chüen fich ngeni lüküen lamalamen Chon Kraist, sanne itä a pwal wor ekkewe ekkoch kot me lükün i pwe epwe asokkaalo.” Iwe, ra siwili ewe it mi fel ngeni ei itelap “SAMOL.” Iwe, kanoto chök, iolapen ewe lamalamen Katolik itan Vatican a allükü ngeni nöün kewe pisop: “Esap föüni are änewenewa YHWH *, ekkewe rüäänü mesen mak mi wewe ngeni iten Kot, lon ekkewe köl me iotek.”

Iö kewe ikenäi ra nöünöü me esilei wesewesen iten Kot we? Emön säräfö iten Sergey lon Kyrgyzstan a katol echö kachito mi pwäri iten Kot Jiowa. Orun engol ier, ese rongorong ewe it mi fel. Mwirin, atun Sergey a mwöküt ngeni Merika, rüüemön Chon Pwäraatä Jiowa ra chuuri lon imwan me eppii ngeni iten Kot we seni ewe Paipel. Sergey a fokkun pwapwa le küna eü mwichen aramas mi nöünöü ewe it Jiowa. Ppii ei pworaus, fän ekkewe tettelin kapas lon ewe puken äweween kapas Webster’s Third New International Dictionary, ewe it “Jiowa Kot” a wewe ngeni “emön mi fel me tekia Chon Pwäraatä Jiowa ra süföliti me fel ngeni i chök.”