“Mon’n fer tou . . . konn ou non”

“Mon’n fer tou bann ki ou’n tir dan lemonn e ki ou’n donn mwan, konn ou non. . . Mon’n fer zot konn ou [non], e mon pou kontinyen fer li.” ​—ZAN 17:6, 26.

Ki sa i vedir: Zezi ti fer konnen non Bondye par servi sa non kan i ti prese. Kan i ti lir dan Lekritir parey son labitid, i ti pou’n bezwen servi oubyen pronons non personnel Bondye. (Lik 4:16-21) I ti ansenny son bann disip pour priye: “Papa, Ki ou non sen i ganny glorifye.”​—Lik 11:2.

Fason ki bann Kretyen dan premye syek ti demontre sa karakteristik: Zapot Pyer ti rakont avek bann ansyen Zerizalenm ki Bondye ti’n pran “en pep pour son non” parmi bann nasyon. (Akt 15:14) Bann zapot ek lezot dimoun ti prese an dizan: “Tou sa ki envok non Senyer [oubyen “non Zeova,” NW] pou ganny sove.” (Romen 10:13; Akt 2:21) Zot ti osi servi non Bondye dan sa bann liv ki zot ti ekrir. En liv koleksyon lalwa Zwif ki ti ganny konplete anviron lannen 300 N.L. i dir sa konsernan bann liv Kretyen ki ti ganny brile par bann ki ti opoz bann Kretyen: “Liv bann Evanzelizater ek liv bann minim [aparaman bann Zwif ki ti Kretyen] zot ti bril dan dife. Zot ti bril sa bann liv menm landrwa kot zot ti ete, . . .  sa bann liv ensi ki non Bondye ki ti ladan.”

Lekel ki pe vreman demontre sa karakteristik? Dan prefas Revised Standard Version, en Labib ki ti ganny otorize par National Council of the Churches of Christ Leta-z-ini, i dir: “Lizaz non prop Bondye, sa sel Bondye, konmsi ti annan ankor lezot bondye ki nou bezwen disteng li avek, ti aret ganny servi dan larelizyon Zwif avan lepok bann Kretyen e i pa ditou apropriye pour lafwa tou bann Legliz Kretyen.” Alor, non Bondye ti ganny ranplase par sa tit “SENYER.” Tou resaman Vatikan ti donn sa lord bann Levek: “Non Bondye dan laform tetragram YHWH * pa devret ganny servi oubyen prononse dan bann kantik ek lapriyer.”

Lekel ki pe servi non personnel Bondye ozordi? Kan Sergey ki reste Kyrgyzstan ti ankor en adolesan, i ti get en film kot i ti aprann ki non Bondye i Zeova. Pour plis ki di-z-an i pa ti tann koz lo sa non ankor. Pli tar, apre ki Sergey ti’n al reste Leta-z-ini, de Temwen Zeova ti vizit li e montre li non Bondye dan Labib. Sergey ti vreman kontan pour trouv en group dimoun ki servi sa non Zeova. I enteresan pour note ki Webster’s Third New International Dictionary i definir “Bondye Zeova” konman “en bondye siprenm ki ganny rekonnet par Temwen Zeova e sel bondye ki zot adore.”

[Not anba lo paz]