Tsaʼ cʌqʼueyob i cʌn a cʼabaʼ

«Tsaʼ cʌqʼueyob i cʌn a cʼabaʼ jiñi tsaʼ bʌ a wʌqʼueyoñob ti pañimil. [...] I mi caj c chʌn acʼ ti cʌñol» (JUAN 17:6, 26).

¿Chuqui yom i yʌl Jesús? Jesús tsiʼ yʌlʌ i cʼabaʼ Dios tiʼ subtʼan, cheʼʌch tsiʼ yʌcʼʌ ti cʌjñel. Cheʼ bʌ miʼ pejcan jiñi Tsʼijbujel Hebreo mucʼʌch i yʌlben i cʼabaʼ Jehová, i jiñi ti bele ora miʼ mel (Lucas 4:16-21). Tiʼ sube jaʼel jiñi xcʌntʼañob i chaʼan chaʼan miʼ cʼajtiñob: «C Tat, laʼ sʌqʼuesʌntic a cʼabaʼ» (Lucas 11:2).

Jiñi ñaxam bʌ xñoptʼañob tsiʼ cʼʌmbeyob i cʼabaʼ Dios. Cheʼ bʌ jiñi apóstol Pedro woli ti tʼan yicʼotob jiñi ancianojob ti Jerusalén tsiʼ yʌlʌ chaʼan Dios tsiʼ yajca junmojt lac piʼʌlob «chaʼan miʼ chʼʌmbeñob majlel i cʼabaʼ» (Hechos 15:14). Cheʼ bʌ jiñi apóstolob yicʼot yambʌ xcʌntʼañob i chaʼan Jesús miʼ chaʼleñob subtʼan, miʼ yʌlob: «Majqui jach miʼ cʼajtin coltaya tiʼ cʼabaʼ Jehová mi caj i coltʌntel» (Hechos 2:21; Romanos 10:13). I mucʼʌch i yotsañob i cʼabaʼ Dios jaʼel ti jiñi i tsʼijbujelob. Ti jumpʼejl libro baqui miʼ tilel i mandar tac jiñi judíojob cʌmbil bʌ bajcheʼ jiñi Tosefta miʼ yʌl chaʼan jiñi i contrajob jiñi xñoptʼañob ti wajali tsiʼ pulbeyob i libro tac tsaʼ bʌ i tsʼijbuyob, bajcheʼ jiñi libro chaʼan Mateo, Marcos, Lucas yicʼot Juan, i mach i wentajobic mi yaʼi miʼ tilel jiñi i cʼabaʼ Dios.

¿Majqui miʼ cʼʌmbeñob i cʼabaʼ Dios jaʼel ili ora? Ti jumpʼejl traducción chaʼan Biblia (Revised Standard Version) miʼ yʌl tiʼ tejchibal: «Mach cʼʌñʌlic miʼ cʼʌjñel jumpʼejl cʼabaʼʌl tiʼ tojlel jiñi cojach bʌ Dios, come maʼañic yambʌ dios lajal bʌ yicʼot, jin chaʼan jiñi judíojob tsiʼ cʌyʌyob i cʼʌn cheʼ bʌ maxto tilemic Cristo i jiñi Iglesia Cristiana mach yomic miʼ cʼʌn». Jin chaʼan, ili Biblia maʼañic tsiʼ cʼʌñʌ i cʼabaʼ Dios, tsaʼ jach i cʌyʌ ti Yum. Ti jimbʌ ora, jiñi Vaticano tiʼ sube jiñi obispojob chaʼan mach yomic miʼ cʼʌmbeñob i cʼabaʼ Dios ti jiñi cʼay yicʼot oración tac. *

¿Anto ba lac piʼʌlob muʼ bʌ i cʼʌmbeñob i cʼabaʼ Dios yicʼot miʼ yʌcʼob ti cʌjñel? Juntiquil xcolel i cʼabaʼ Sergey tsiʼ qʼuele chaʼan añʌch. Cheʼ bʌ chʼitonto i yaʼan ti Kirguistán, tsiʼ qʼuele jumpʼejl película baqui tsiʼ yubi chaʼan jiñi i cʼabaʼ Dios jiñʌch Jehová. Pero tsaʼ ñumi 10 jab i maʼañic tsiʼ wis ubi jiñi cʼabaʼʌl. Cheʼ jiñi tsaʼ majli ti Estados Unidos, i yaʼi tsaʼ cʼoti chaʼtiquil i testigojob Jehová tiʼ yotot i tsiʼ pʌsbeyob ti Biblia baqui bʌ jiñi i cʼabaʼ Dios. Wen tijicña tsiʼ yubi i bʌ cheʼ tsiʼ taja jumpʼejl ñopbalʌl muʼ bʌ i cʼʌn i cʼabaʼ Dios. Jumpʼejl diccionario muʼ bʌ i chʼʌm tilel jiñi tʼan «Jehová Dios», miʼ yʌl: «Ñuc bʌ Dios yicʼot cojach bʌ Dios muʼ bʌ i chʼujutesañob jiñi i testigojob Jehová» (Webster’s Third New International Dictionary).

[Nota]