“Ginpakilala Ko ang Imo Ngalan”

“Ginpakilala ko ang imo ngalan sa mga tawo nga ginhatag mo sa akon gikan sa kalibutan. . . . Ginpakilala ko ang imo ngalan sa ila kag ipakilala ko ini.”—JUAN 17:6, 26.

Ano ang Buot Silingon Sini? Ginpakilala ni Jesus ang ngalan sang Dios sa iya ministeryo. Sa pagbasa niya pirme sang Kasulatan, ginsambit gid niya ang ngalan sang Dios. (Lucas 4:16-21) Gintudluan niya ang iya mga sumulunod nga mangamuyo: “Amay, pakabalaanon ang imo ngalan.”—Lucas 11:2.

Paano Ini Ginpakita sang mga Cristiano sang Una? Ginsilingan ni apostol Pedro ang tigulang nga mga lalaki sa Jerusalem nga nagkuha ang Dios gikan sa mga pungsod “sang katawhan para sa iya ngalan.” (Binuhatan 15:14) Ang mga apostoles kag ang iban pa nagwali nga “ang tagsatagsa nga nagatawag sa ngalan ni Jehova maluwas.” (Binuhatan 2:21; Roma 10:13) Gingamit man nila ang ngalan sang Dios sa ila mga sinulatan. Ang The Tosefta, nga koleksion sang kasuguan sang mga Judiyo nga natapos sang mga 300 C.E., nagsiling parte sa pagsunog sang mga manugpamatok sa mga sinulatan sang mga Cristiano: “Ginsunog nila ang mga libro sang mga Ebanghelista kag ang mga libro sang minim [ginapatihan nga Judiyo nga mga Cristiano] . . . lakip ang mga reperensia nga may Ngalan sang Dios.”

Sin-o ang Nagapakita Sini Subong? Ang introduksion sang Revised Standard Version nga Biblia, sang National Council of the Churches of Christ sa Estados Unidos, nagsiling: “Ang paggamit sang bisan ano nga ngalan sang isa lamang ka Dios, nga daw subong nga may iban nga dios nga kinahanglan ipatuhay sia, gin-untat sa Judaismo antes sang panahon sang mga Cristiano kag indi gid nagakaigo sa pagtuo sang Cristiano nga Simbahan.” Gani, gin-islan sini ang ngalan sang Dios sang titulo nga “GINUO.” Sining karon lang, ginsugo sang Vatican ang mga obispo: “Ang ngalan sang Dios sa porma nga tetragrammaton nga YHWH * indi na paggamiton ukon pagsambiton sa mga kanta kag pangamuyo.”

Sin-o subong ang nagagamit kag nagapakilala sang ngalan sang Dios? Sang tin-edyer pa si Sergey, nga taga-Kyrgyzstan, nagtan-aw sia sang pelikula nga nagpakilala sa ngalan sang Dios nga Jehova. Pero mga pulo ka tuig nga wala niya nabatian liwat ang ngalan sang Dios. Sang ulihi, sang nagsaylo sia sa Estados Unidos, ginbisitahan sia sang duha ka Saksi ni Jehova kag ginpakita sa iya ang ngalan sang Dios sa Biblia. Nalipay si Sergey kay may isa ka grupo nga nagagamit sang ngalan nga Jehova. Talalupangdon nga sa Webster’s Third New International Dictionary, ang tinaga nga “Jehovah God” nagapatuhoy sa “supremo nga dios nga ginakilala kag ang lamang nga dios nga ginasimba sang mga Saksi ni Jehova.”

[Nota]