‘Ich hon tayn naame pekhant kemacht’

“Ich hon tayn naame fer ti mënxe, woos tuu meer fon te welt kep host, pekhant kemacht. (…) Ich hon tëne tayn naame pekhant kemacht un tuun ich tee noch wayter pekhant mache.” (YOOHAN 17:6, 26)

Was wil tas saan? Yeesus hot Kot sayn naame pekhant kemacht wayl eyer tiise naame in sayn preetich penutst hot. Eyer waar keweent imer ti Xrifte leese un meyer khene sicher sin tas wën eyer tii kelees hot, hot eyer net Kot sayn naame iwer hupst orer mit thitel ersetst. (Lukas 4:16-21) Yeesus hot fer sayn nookeener in kelërnt se peete: “Fater, tayn naame sol kehaylicht wëre.” (Lukas 11:2)

Wii hon ti eyerste kriste tas aan kewënt? Te aphostel Pheeter hot fer ti elteste in Yeruusalem kesaat tas Kot hot ‘een folek fer Sayn naame raus kehool’. (Aphostele sayn Kexicht 15:14) Ti aphostele un ti anere tisipele hon kepreeticht tas “al tii woo Yeehoowa sayn naame aan ruufe, wëre keret”. (Aphostele sayn Kexicht 2:21; Romaaner 10:13) Aach, tii hon Kot sayn naame in sayn aychne xrifte penutst. Fer tas pewayse, ti Tosefta, een samlung fon te yiitixe kesetse woo unkefeer im yoer 300 noo Kristus fërtich kexrip kep is, hot tas kesaat iwer ti kristliche xrifte woo ti keechner ferprënt hon: “Ti piicher fon te ewankelister un ti piicher fon te minim [wii ti yiitixe kriste kenënt waare] tuun tii [ti keechner] net fom fayer rete. Awer tii sin ferprënt im plats woo se sin, (...) ti piicher un Kot sayn naame woo in tëne trin xteet.”

Weer keet hayt Yeesus sayn payxpiil noo? Een wersyoon fon te Piipel, * woo ti Natsyonaal Konselye fon Khëriche fon Kristus in te Fereenichte Xtaate erlaupt hot, saat soo in sayn aanfang: “Een aychne naame fer te eensiche Kot penutse, wii wën es anere keeter kepe teet tas Eyer unerxayt wëre mist, is een kewoonheet woo te yuutaismus xon foer Kristus noo kelos hot se penutse, is kans unutslich fer te klaape fon te Kristlich Khërich uf te kans welt.” Soo, tiise wersyoon fon te Piipel hot Kot sayn naame mit tëm thitel “HËR” ersetst. Khërtslich, hot te Watikan tiise oryentiirung fer sayne pixof kep: “In liite un kepeete, thërft Kot sayn naame in te tetrakram form YHWH * net penutst un aus kexproch wëre.”

Weer tuut hayt Kot sayn naame penutse un pekhant mache? Wii Sergey, fon Kirkhstan, yung waar, hot eyer een fiilm kekukt woo Kot sayn naame, Yeehoowa, penutst hot. Awer tan, torich tseen yoore, hot eyer net mee tiise naame noch mool keheert. Xpeeter, noo Sergey tsu te Fereenichte Xtaate kewanert is, hon tswaay Yeehoowa sayn Tsayer tëm in sayn haus pesuucht un hon tëm Kot sayn naame in te Piipel ketsaycht. Sergey is aarich froo kep tas eyer een relichyoon kefun hot woo te naame Yeehoowa penutst hot. Es is interesant tas te Trit Internatsyonaal Wërterpuuch fon Webster, * in tëm wort “Yeehoowa Kot”, hot tiise petaytung kep: “Een heechste kotlichkheet woo erkhënt is un te eensiche Kot woo Yeehoowa sayn Tsayer aan peete.”

[Noote]