“Onde va shiivifila Edina loye”

“Ovanhu ava wa pa nge mounyuni onde va hololela edina loye. . . . Onde va shiivifila edina loye nohandi ke li shiivifa natango.” — JOHANNES 17:6, 26.

Osho tashi ti: Jesus okwa shiivifa edina laKalunga moku li longifa moukalele waye. Ngeenge Jesus a li ta lesha okudja mOmishangwa, okwa li luhapu ha tumbula edina laKalunga. (Lukas 4:16-21) Okwa honga ovashikuli vaye va ilikane tava ti: “Tate, edina loye nali yapulwe.” — Lukas 11:2.

Nghee Ovakriste votete va li va shiivifa edina laKalunga: Omuyapostoli Petrus okwa li a lombwela omulumenhu omunamido muJerusalem kutya Kalunga okwe li hoololela oshiwana moiwana hashi “ifanwa nedina laye.” (Oilonga 15:14) Ovayapostoli nosho yo vakwao ova li va udifa kutya “keshe ou ta ifana edina Jehova ota ka xupifwa.” (Oilonga 2:21; Ovaroma 10:13) Ova longifa yo edina laKalunga momashangelo avo. Embo Tosefta, olo li na eemhango dOshijuda nola shangwa oule womido 300 O.P, ola popya shi na sha nokuxwikwa po komashangelo Ovakriste kovapataneki la ti: “Omambo Ovaevangeliste nomambo aavo va talika ko va dinika [oo taku tiwa kutya oOvajuda Ovakriste] kaa li a xupa momundilo. Ashike okwa li haa xwikwa po keshe opo taa hangwa, . . . nosho yo eedjo odo di na edina laKalunga.”

Oolyelye hava ningi ngaho kunena? O-Revised Standard Version i na sha nOmbiibeli, ya pitikwa kOngongahangano yEengeleka yaKristus yoPashiwana moUnited States, oya popya meenhetekelindjovo dayo ya ti: “Okulongifwa kwedina lolela laKalunga, oo e li ashike umwe, opo ngeno a yoololwe ko koikalunga, okwa li xulifwa po kelongelokalunga lOshijuda ofimbo Oukriste inau uya noinashi yuka nandenande keitavelo lOngeleka yopaKriste yomounyuni aushe.” Onghee, ova li va pingena po edina laKalunga nedinafimaneko “OMWENE.” Efimbo opo la di ko, o-Vatican oya lombwela ovabishofi vayo ya ti: “Inaku longifwa nande edina laKalunga, kutya nee omomaimbilo nomailikano, nokali na okutumbulwa nonande ola shangwa momushangelo wOshiheberi YHWH *.”

Oolyelye kunena hava longifa edina laKalunga noku li shiivifa? Eshi Sergey wokoKyrgyzstan a li e na eedula omulongo nasha, okwa li a tala ofilima ya popya kutya edina laKalunga oJehova. Oule womido omulongo lwaapo, ina kala vali ta udu edina laKalunga. Lwanima, konima eshi Sergey a tembukila koUnited States, okwa li a talelwa po kEendombwedi daJehova mbali ndele tadi mu ulikile edina laKalunga mOmbiibeli. Sergey okwa li a tunhukwa eshi a mona ongudu yovanhu oyo hai longifa edina Jehova. Shihokwifa, mo-Webster’s Third New International Dictionary, koshi “yaJehova Kalunga” oku na efatululo tali ti kutya “oKalunga munenenene a shiivika noku li ashike Kalunga oo ha longelwa kEendombwedi daJehova.”

[Eshangelo lopedu]