“Nabiriminyikalya Erina Lyawu”

“Munakuminyikalya oko bandu wamba omo kihugho. . . . Kandi nabiriminyikalya erina lyawu kubo kandi nasyaliminyikalya.”​—YOANE 17:6, 26, NWT.

Ekya Kikamanyisaya: Yesu mwaminyikalya erina lya Nyamuhanga omw’ikolesyalyo omw’ithulira liwe. Yesu iniakabya akasoma omo Masako, ngoku anabya akakolha mughulhu mungyi, ahathe erithika-thika iniakahulha erina lya Nyamuhanga akahika aho liri. (Luka 4:16-21) * Mwakangirirya abigha biwe athi basabe bathi: “Thatha, erina lyawu libye ribuyirire.”​—Luka 11:2.

Ngoku Abakristayo ab’Erimbere Bakolha Eki: Omukwenda Petero mwabwira abakulhu e Yerusalemu athi Nyamuhanga abirilhusya omo bihanda mwa “bandu busana n’erina liwe.” (Emibiri 15:14) Abakwenda n’abandi mubathulhughania bathi “obuli mundu oyukalhakira okwa lina ly’Omwami Mukulhu [Yehova] asyalhamibwa.” (Emibiri 2:21; Abanya Roma 10:13) Kandi mubakolesya erina lya Nyamuhanga omwa bitabu byabu. E Tosefta, ekitabu ekiri mw’ebilhaghiro by’Abayuda ekyahwa erihandikwa ng’omwa 300 E.K., kikakanaya okwa bahakani bakahisya ebitabu by’Ekikristayo kithi: “Ebitabu by’abathuli b’Enjiri n’ebitabu bya minim [obundi Abakristayo Abayuda] sibali bilhamaya okwa muliro. Aliwe bikalighirawa erihisibwa aho biri, . . . ibyo n’ebindi ebikakanaya okwa Lina lya Nyamuhanga.”

Ni Bahi Abakakolha eki Munabwire? E Biblia eya Revised Standard Version, eyahamulhawa na National Council of the Churches of Christ e United States, yikabugha yithya omwa binywe bikakanaya kuyo: “Erikolesya erina lyosi-lyosi eritholere erya Nyamuhanga mughuma musa, eribya nga hali esindi Nyamuhanga esiri mbaghane okw’iyo, mukyahwaho omo Kiyuda Ekikristayo kithe kyatsuka kandi siritholere erikolesibwa omw’ikirirya lyosi ly’Ekanisa y’Ekikristayo.” Busana n’ekyo, muyasubya omo lina lya Nyamuhanga mw’ekitsumbi, “MUKAMA.” Lino-lino, e Vatican muyahamulha ababbisyopu yithi: “Omo syonyimbo n’omwa misabe erina lya Nyamuhanga omo mihandikire eya tetragrammaton YHWH * siritholere likakolesibwa kutse eryahulhwa.”

Ni bahi munabwire abakakolesaya n’eriminyisya erina lya Nyamuhanga? Sergey iniakine mulere e Kyrgyzstan, mwalebya efilimu eyaminyikalhaya erina lya Nyamuhanga Yehova. Muhalhaba emyaka ng’ikumi isyali akathasyowa erina eryo. Enyuma waho, Sergey iniabirihumira e United States, Abema ba Yehova babiri mubamubungira kandi bamamukangania erina lya Nyamuhanga omwa Biblia. Sergey mwatsema akabana abandu abakakolesaya erina Yehova. Ekikatsemesaya, ahisi sy’omuthwe “Yehova Nyamuhanga,” e Webster’s Third New International Dictionary yikasoborera ekya erina eryo likamanyisaya yithi “enyamuhanga ey’endatha kutsibu kandi enyamuhanga eyikaramibawa n’Abema ba Yehova basa.”

[Omwatsi ahikwa]