“Nejisolola Jizhina Jenu”

“Nejisolola jizhina jenu ku bantu bo mwampele kufuma pano pa ntanda. . . . Nejisolola jizhina jenu kwi abo kabiji nkejisolola.”—YOANO 17:6, 26.

Mwatala Bino Byambo: Yesu wasolwele jizhina ja Lesa byo ejingijishenga mu mwingilo wa kusapwila. Yesu watanganga Binembelo kimye kyonse. Kabiji twashiinwa kuba’mba pa kutanga kechi washangapo kutongola jizhina ja Lesa nangwa kupingizhapo jizhina jikwabo ne. (Luka 4:16-21) Wafunjishe baana banji ba bwanga kulomba’mba: “Tata, jizhina jenu jizhile.”—Luka 11:2.

Bena Kilishitu Batanshi byo Basolwele Jizhina ja Lesa: Mutumwa Petelo wabuujile bakulumpe mu Yelusalema kuba’mba Lesa wasajile ba mu bisaka bya bantu kwikala “bantu ba jizhina janji.” (Byubilo 15:14) Batumwa ne bakwabo basapwijile kuba’mba “yense wita pa jizhina ja Yehoba ukapuluka.” (Byubilo 2:21; Loma 10:13) Kabiji baingijishe jizhina ja Lesa mu mabuku o banembelenga. Tosefta buku mwanembelwe mizhilo ya Bayudea mu myaka 300 C.E, waambile pa bena Kilishitu byo bebasokejile mabuku abo ku bantu bebashikilwe amba: “Mabuku a basapwishi ne mabuku a minim [mabuku a bena Kilishitu Bayudea] kechi babujile kwiasoka nao ne. Bino kafwako wafwainwe kwibakanya kusoka mabuku a bena Kilishitu ne, . . . abo ne mabuku mwajinga jizhina ja Lesa.”

Bañanyi Basolola Jizhina ja Lesa Ano Moba? Buku wa Revised Standard Version of the Bible ye baswishishe ku kipamo kya National Council of the Churches of Christ mu kyalo kya United States, byambo bitanshi mu uno Baibolo byaamba’mba: “Kwingijisha jizhina jine ja Lesa umotu yenka, uba nobe kuji balesa bakwabo bakumupusanyako, jino jizhina balekele kwijingijisha mu bupopweshi bwa Bayudea. Pa kikye kimye bena Kilishitu saka bakyangye kwikalako kabiji jino jizhina kechi jafwainwa mu kipwilo kya bena Kilishitu ne.” Onkao mambo, uno Baibolo wafumyamo jizhina ja Lesa ne kupingizhapo byambo bya kuba’mba “Nkambo.” Katataka papo, mukulumpe wa bakatolika wakambizhe ba bishopu amba: “Mu nyimbo ne pa kulomba kechi mwafwainwa kwingijishanga jizhina ja Lesa ja bisopelo bina YHWH * nangwa kwijitongola mu kanwa ne.”

Bañanyi ano moba babena kusolola jizhina ja Lesa ku bantu? Sergey wikala mu kyalo kya Kyrgyzstan byo afikizhe myaka 15, watambile filimu mo bamwesheshe jizhina ja Lesa ja Yehoba. Byo papichile myaka 10 kechi waumvwinepo muntu na kutongola jizhina ja Lesa ne. Mu kuya kwa moba, Sergey byo avilukijile ku United States, Bakamonyi ba kwa Yehoba babiji bamufwakashijile pa nzubo ne kumumwesha jizhina ja Lesa jiji mu Baibolo. Sergey watemenwe bingi kutaana bantu bengijisha jizhina ja Yehoba. Kabiji mu Webster’s Third New International Dictionary paji “Yehoba Lesa,” balumbulula’mba “Lesa wakila wayukanyikwa kabiji Lesa umo upopwelatu Bakamonyi ba kwa Yehoba.”

[Tubyambo twa mushi]