«O txi nyekʼune aju tbʼiya kye»

«O txi nqʼamaʼne tbʼiya kye qeju o che etz tiʼna kyxol xjal, ex e tzaj tqʼoʼna te weye. [...] O txi nyekʼune aju tbʼiya kye ex kukx kxel nyekʼune» (JUAN 17:6, 26, TNM).

¿Tiʼ tajtoq Jesús tuʼn ttzaj tqʼamaʼn? Qa ajbʼen tbʼi Dios tuʼn tej tpakbʼan. Qʼuqli qkʼuʼj tiʼj qa xi tqʼamaʼn tbʼi Jehová tej tjaw tuʼjin Tyol Dios kubʼ tzʼibʼin toj yol hebreo ex kukxlo bʼant jlu tuʼn (Lucas 4:16-21). Ax ikx, xi t-xnaqʼtzaʼn kye t-xnaqʼtzbʼen tuʼn t-xi kyqanin jlu: «Ay qMan Dios, noqit tzʼel kynikyʼxjal qa xjanxixjo tbʼiy» (Lucas 11:2, Akʼaj Tuʼjil Tyol qMan).

Aju techel kubʼ kyqʼoʼn tnejel okslal. Xi tqʼamaʼn apóstol Pedro kye ansyan te Jerusalén, qa otoq jaw tskʼoʼn Dios «jun tnam tok tbʼi tiʼj» kyxol xjal nya judiy (Hechos 15:14, TNM). Ax ikx, xi kyqʼamaʼn apóstol ex junjuntl t-xnaqʼtzbʼen Jesús jlu tej kypakbʼan: «Kykyaqil qeju in che kubʼsan twitz Qman [Jehová, TNM] che kletel» (Hechos 2:21; Romanos 10:13). Ax ikx, ajbʼen tbʼi Dios kyuʼn kyoj uʼj kubʼ kytzʼibʼin. Toj jun kʼloj ley kye aj Judiy aju tok tbʼi Tosefta, aju kubʼaj tzʼibʼin tojlo abʼqʼi 300, in tzaj qʼamaʼn qa e kubʼ patin qe uʼj kubʼ kytzʼibʼin okslal. In tzaj tqʼamaʼn jlu: «Il tiʼj tuʼn kykubʼ patin [qe Evangelio] ex qe uʼj in che ajbʼen kyuʼn [okslal judiy] tuʼnju tzʼibʼin tbʼi Dios kyoj».

¿Alkyeqe in nel kykanoʼn techel kyaj kyqʼoʼn tnejel okslal? Toj Tyol Dios Revised Standard Version, aju bʼinchaʼn kyuʼn Consejo Nacional de las Iglesias de Cristo atz Estados Unidos, in tzaj tqʼamaʼn jlu kyoj tnejel t-xaq: «Ya mintiʼ ajbʼen tbʼi Dios kyuʼn aj judiy tej naʼmxtoq kyten tnejel okslal, tuʼnju oʼkx at jun Dios ex mintiʼ juntl ik tzeʼn te. Ax ikx, toj ambʼil jaʼlo ya mintiʼ tuʼn tajbʼen kyuʼn okslal ateʼ twitz tkyaqil Txʼotxʼ». Tuʼntzunju, mintiʼ ajbʼen tbʼi Dios toj Biblia lu, sino kux qʼoʼn Señor te t-xel. Ax ikx, kʼitzqeku xi tqʼamaʼn Vaticano jlu kye obispo: «Maske tzʼibʼin tbʼi Dios tukʼil tetragrammaton YHWH mintiʼ tuʼn tajbʼen ex mintiʼ tuʼn t-xi qʼamet kyoj ceremonia, kyoj bʼitz ex kyoj naʼj Dios». *

¿Atpe jun kʼloj xjal in najbʼen tbʼi Dios kyuʼn ex in xi kyxnaqʼtzaʼn kye txqantl? El tnikʼ Sergey tiʼj qa at jun kʼloj xjal. Tej tzmatoq kuʼxun ex attoq Kirguistán ok tkeʼyin jun película jatumel tzaj qʼamaʼn qa Jehová tbʼi Dios. Pero ya mintiʼ ok tbʼiʼn bʼibʼaj lu toj lajaj abʼqʼi. Noqtzun tuʼnj, xiʼ anqʼil Estados Unidos ex e pon kabʼe testigo de Jehová pakbʼal tja ex xi kyyekʼin te tukʼil Biblia alkye tbʼi Dios. Nimxix jaw tzalaj Sergey tej tok tojtzqiʼn jun okslabʼil in najbʼen tbʼi Dios tuʼn. In tzaj tqʼamaʼn diccionario Webster’s Third New International Dictionary jlu tiʼj bʼibʼaj «Jehová Dios»: «Jun Dios nimxix toklen ex oʼkx qe testigos de Jehová in che kʼulin te».

[Tqanil]