“Tëjëtsë mxëë nduknijawë naxwinyëdë jäˈäy diˈibëts të xymyoˈoy yä naxwiiny. [...] Ets ëjts të nduknijawë mxëë, ets nduknijawëyaambyëts.” (JUAN 17:6, 26, NM)

¿Ti Jesus myaytyäˈägan? Ko ojts yˈëwaˈkxy kyäjpxwaˈkxy, tyuknijäˈäjë jäˈäy ti Dios txëˈaty. Ets ko ijty tkajpxyë Diosë jyaaybyajtën, janääm jatsojk tkäjpxë Diosë xyëë (Lukʉs 4:16-21). * Nan tyukniˈˈijxë ja yˈëxpëjkpëty parë nyuˈkxtäˈägët: “Tatë, waˈan twäˈätsy ja mxëë” (Lucas 11:2, NM).

Yˈijxpajtën ja tim jawyiimbë kristianëty. Ko nety ja apostëlë Pedro myaytyaˈaky mët ja mëjjäˈäytyëjk diˈib Jerusalén, ta jyënany ko Dios të dyajpëtsemy mäjatyë nasionk “tuˈugë käjpn diˈibë myënëjkxëp ja xyëë” (Hechos 15:14, NM). Ja Jesusë yˈëxpëjkpëty ets ja apostëlëtëjk ojts kyäjpxwäˈkxtë: “Niˈamukë pënaty kyäjpxtëbë Jyobaa xyëë, yëˈë nitsoˈogëp” (Hechos 2:21, NM; Romanos 10:13, NM). Nan kyujäˈäyëdë Diosë xyëë. Ja ley diˈib ijty myëdäjttëbë judiyëtëjk, naa jaa tyuˈukmujktääy mä jëmëjt 300, diˈib yajtijp Tosefta. Jap tnimaytyaˈaky ko yajnoˈky tijaty kyujäˈäyëdë ja kristianëty, jyënaˈany: “[Yëˈë Evangelios] etsë sektaaryë lyiibrë [waˈan duˈun ttijtë ja jyudiyëty diˈib pyanëjkxtë Kristë] axtë ko yajnoˈktäˈäyët; jam nyitoyët mä yajpääty, tooytyaˈayëp ets nanduˈun ja Diosë xyëë diˈib jap miimp”.

¿Pën tyam nanduˈun tyuundëp? Mä tsyondaˈagyë Biiblyë diˈib xyëˈäjtypy Revised Standard Version, diˈib kyupëjkë Consejo Nacional de las Iglesias de Cristo en Estados Unidos, jyënaˈany: “Nyajtuˈunëmë Diosë xyëë diˈib tuˈuk jeˈeyë Diosˈäjtp, duˈunxyëp extëm jyaaty mayë dios parë yëˈë yajtukˈëxkapëdë xyëë, diˈibë judiyëtëjk kyaj tnekyyajtuundë mä kyajnëm myinyë Jesus ets diˈib ninuˈun kyaˈoyëty tyunët mäjatyë Tsäjptëjk diˈib Kristianë”. Mä tyäˈädë Biiblyë ja ojts tkujayëdë Wintsën en lugäär tpëjtäˈäktëdë Diosë xyëë. Ets tyä näämnëmë Vaticano të ttukˈaneˈemyë obispëtëjk: “Mä nˈëˈëw ngäjpxtakëm kyaj mbäät yajkajpxyë Diosë Xyëë extëm myiny mä tetragrammaton YHWH”. *

¿Jadaa tuˈugë relijyonk diˈib yajtuumbyë Diosë xyëë ets ttuknijawë jäˈäy? Tuˈugë mixy diˈib xyëˈäjtypy Sergey diˈib tsënaapy Kirguistán ojts tpäätyë jäˈäy diˈib yajtuumbyë Diosë xyëë. Jeˈeyënëmë nety yaˈkpëtsemy ko tˈijxy tuˈugë pelikula mä yajmaytyaˈaky ko Dios txëˈaty Jyobaa. Mäjk jëmëjt nyajxy mä kyaj tnekymyëdooyë Diosë xyëë. Ta ojts nyijkxy Estados Unidos, ets jap ojts nyiminëdë majtskë Jyobaa tyestiigëty diˈib tukˈijxëdë mä Biiblyë ti Dios txëˈaty. Sergey jantsy jotkujk nyayjäˈäwë ko tpaty tuˈugë relijyonk diˈib yajtuumbyë Diosë xyëë. Ko mä tuˈugë diksionaaryë yaˈëxtäˈäy “Jyobaa Dios”, ta jyënaˈany: “Yëˈë Dios diˈib ijtp mëj ets yëˈëyë tuˈugë Dios diˈib yˈawdäjttëbë Jyobaa tyestiigëty” (Websterˈs Third New International Dictionary).

[Notë diˈib noky ëxˈääy]