‘Ke Tsebaditše Leina la Gago’

“Ke utolotše leina la gago bathong bao o nneilego bona go tšwa lefaseng. . . . Ke ba tsebišitše leina la gago e bile ke tla le tsebatša.”—JOHANE 17:6, 26.

Seo go se Bolelago: Jesu o tsebaditše leina la Modimo ka go le diriša bodireding bja gagwe. Ge Jesu a be a bala go tšwa Mangwalong, ka ge a be a dira gantši, a ka ba a ile a bitša leina la Modimo. (Luka 4:16-21) O rutile balatedi ba gagwe go rapela ka gore: “Tate, leina la gago a le kgethagatšwe.”—Luka 11:2.

Kamoo Bakriste ba Pele ba Bontšhitšego se ka Gona: Moapostola Petro o ile a botša banna ba bagolo kua Jerusalema gore Modimo o tšere “batho ba leina la gagwe” go tšwa ditšhabeng. (Ditiro 15:14) Baapostola le ba bangwe ba ile ba bolela gore “yo mongwe le yo mongwe yo a bitšago leina la Jehofa o tla phološwa.” (Ditiro 2:21; Baroma 10:13) Gape ba ile ba diriša leina la Modimo dingwalweng tša bona. The Tosefta, e lego puku ya melao yeo e bego e fetišwa ka molomo yeo e feditšwego go ngwalwa mo e ka bago ka 300 C.E., e bolela mabapi le dipuku tša Bokriste tšeo di ilego tša tšhungwa [ke baganetši] gore: “Ga ba phološe dipuku tša Baebangedi le tša ba-minim [bao go naganwago gore ke Bakriste ba Bajuda] e le gore di se tšhungwe ka mollo. Eupša ba dumelela gore di tšhungwe moo di lego gona, . . . tšona gotee le ditšhupetšo tše dingwe tša Leina la Modimo tšeo di lego ka dipukung tšeo.”

Ke Bomang ba Latelago Mohlala wo Lehono? Ketapele ya Beibele ya Revised Standard Version, yeo e lego ka tlase ga National Council of the Churches of Christ kua United States, e re : “Go dirišwa ga leinaina le ge e le lefe go Modimo a nnoši go le bjalo ka ge ekare go na le medimo e mengwe yeo a swanetšego go kgethollwa go yona, go ile gwa kgaotšwa Bojudeng pele ga mehla ya Bokriste gomme ke mo go se gwa swanelago e le ka kgonthe tumelo ya legohle ya Kereke ya Bokriste.” Ka go re’alo, e beile sereto, “MORENA,” legatong la leina la Modimo. Moragonyana bjale, Vatican e laetše bapišopo ba yona gore: “Leina la Modimo le lego ka sebopego sa tetragrammaton la YHWH * ga se la swanela go dirišwa goba go bitšwa nakong ya borapedi.”

Ke bomang lehono bao ba dirišago le go tsebatša leina la Modimo? Ge Sergey wa kua Kyrgyzstan a be a le nywageng ya gagwe ya mahlalagading, o ile a bogela filimi yeo e ilego ya bolela gore leina la Modimo ke Jehofa. O ile a tšea nywaga e ka bago e lesome a sa kwe leina la Modimo. Ka morago, ge Sergey a se na go hudugela United States, Dihlatse tša Jehofa tše pedi di ile tša mo etela legaeng la gagwe gomme tša mmontšha leina la Modimo ka Beibeleng. Sergey o ile a thabišwa ke go hwetša sehlopha seo se bego se diriša leina la Jehofa. Se se kgahlišago ke gore ka tlase ga leina “Jehofa Modimo,” Webster’s Third New International Dictionary e nea tlhaloso e rego, “Modimo yo a phagamego yo a tsebjago le Modimo a nnoši yo a rapelwago ke Dihlatse tša Jehofa.”

[Mongwalo wa tlase]