“Ame Nevenoñgonokesa Enyina Liove”

“Nanoñgonokesa enyina liove kovanthu wapola mouye, iya ovemphe. . . . Ame nevenoñgonokesa enyina liove, iya mandyitualako okulinoñgonokesa.”​—JOÃO 17:6, 26.

Otyo Tyihangununa Tyi: Jesus movilinga viae viokuivisa wanoñgonokesa enyina lia Huku. Tyina Jesus atanga Movihonekwa, ankho utumbula enyina lia Huku. (Lucas 4:​16-​21) Walongesa ovalanduli vae okulikuambela okuti: “Tate, enyina liove linkhimanekwe.”​—⁠Lucas 11:⁠2.

Oñgeni Ovakristau Votete Vetyilekesa: Apostolu Petulu watolela ovakulu mo Jelusalei okuti Huku ukahi nokuholovona movilongo “ovanthu vaihanwa enyina liae.” (Atos 15:​14) Ono apostolu, novakuavo ankho vaivisa okuti “kese omunthu wihana enyina lia Jeova makayovolwa.” (Atos 2:21; Romanos 10:​13) Tupu vaundapesa enyina lia Huku momikanda vahoneka. Omukanda Tosefta, ankho muna ovitumino viova Judeu viamanuhulwa okuhonekwa mo 300 P.K., upopia konthele yomikanda vio Vakristau viayokwa no nondyale mbavo, okuti: “Omikanda viahonekwa nono Evandyelista, nevi viahonekwa nova minim [ankho Ovakristau ova Judeu] navio viayokwa. Mahi ankho viyokelwa apa vikahi, . . . kumwe nomikanda omikuavo ankho vina Enyina lia Huku.”

Ovalie Valandula Onondonga Ombo Hono? Ombimbiliya Versão Padrão Revisada [mo inglês], yetavelwa no Conselho Nacional das Igrejas de Cristo ko América, yati: “Okuihana Huku kenyina liae muene, opo tumuyapule ngatyina kuna onohuku ononkhuavo, tyayekuapo okulingwa nongeleya yova Judeu etyi nkhele kuhenekale ongeleya Yovakristau iya katyaviukile pala ekolelo Liongeleya Yovakristau ouye auho.” Moluotyo, penyina lia Huku vapingiyapo enyina lienkhimano “TATEKULU.” Momanima okualamba, o Vatikanu yapopila onombisipu mbavo okuti: “Enyina lia Huku o tetragrama YHWH a, kalipondola okuundapeswa ine okulitumbula moviimbo no nomalikuambelo.”

Ovalie hono vatumbula nokunoñgonokesa enyina lia Huku? Etyi Sergey ankho ena omanima 15 mo Quirguistão, watalale osinema imwe yalekesa okuti enyina lia Huku o Jeova. Palamba omanima ekwi, eheivi vali enyina lia Huku. Konyima, etyi Sergey ailukila ko Estados Unidos, Onombangi mba Jeova vevali veya meumbo liae, avemulekesa enyina lia Huku Mombimbiliya. Sergey wahambukilwe unene etyi avasa ovanthu vaundapesa enyina Jeova. Penyina “Jeova Huku,” omukanda Webster’s Third New International Dictionar uhangununa okuti o “Huku omukulami wanoñgonokua, Huku wike vala ufendwa no Nombangi mba Jeova.”