“Ekj hab an met dienen Nomen bekaunt jemoakt”

“Ekj hab de Menschen, dee du mie ut dise Welt jejäft hast, met dienem Nomen bekaunt jemoakt . . . Ekj hab an met dienen Nomen bekaunt jemoakt, un woa daut wieda doonen” (JOHANES 17:6, 26, PB)

Waut daut meent: Jesus muak Gott sienen Nomen bekaunt biem prädjen. Un wan Jesus von de Schreft läsd, brukt hee secha Gott sienen Nomen (Lukas 4:16-21). Hee lieed siene Nofolja, soo aus dit to bäden: “Voda . . . Dien Nomen saul heilich jehoolen woaren” (Lukas 11:2, PB).

Woo de ieeschte Christen daut nokjeemen: De Apostel Petrus säd to de elre Mana en Jerusalem, daut Gott “een Volkj fa sienen Nomen” ut de Velkja jewält haud (Aposteljeschicht 15:14, PB). De Apostel un aundre lieeden: “Wäaemma dan dän Harn sien Nomen aunroopt, saul jerat woaren” (Aposteljeschicht 2:21, PB; Reema 10:13). Un dee brukten uk Gott sienen Nomen en de Christelje Griechische Schreften. En de Tosefta (daut sent judische Räajlen, waut oppjeschräwen un ojjefäa aune 300 n. Chr. toopjestalt worden) rät daut doavon, woo de Jäajna de Christen äare Schreften vebrennen sullen. Doa sajcht daut: “De Bieekja, waut von Jesus räden, un de Bieekja von de minim [soo worden woomäajlich de Juden jenant, waut Christen jeworden wieren] sellen nich utem Fia jerat. Dee äare Bieekja kjennen vebrent woaren, wan eena dee finjt, . . . toop met Gott sienen Nomen, waut doabennen steit.”

Wäa kjemt daut vondoag dän Dach no? En eene Bibeläwasatunk steit väaren en de Bibel, daut et fa de christelje Kjoakj orrajcht es, irjenteenen Nomen fa dän eensich woaren Gott to brucken, wäajen daut nich needich es, dän von de aundre Jetta to unjascheeden. De Menschen von dän judischen Gloowen hieeden aul lang ver Jesus siene Jeburt opp met Gott sienen Nomen brucken (Revised Standard Version). Un doawäajen brukt dise Bibeläwasatunk daut Wuat “HAR” enne Städ Gott sienen Nomen. Lota säd de Vatikan to äare väaschte Prädjasch: “En Leeda un Jebäda sell jie nich daut Tetragramaton YHWH * aus Gott sienen Nomen brucken un dän uk nich utspräakjen.”

Wäa brukt vondoag dän Dach Gott sienen Nomen un moakt dän bekaunt? Sergei, een Jugentlicha, waut en Kirgiesien wont, kjikjt mol eenen Film, waut doa säd, daut Gott sien Nomen Jehova wia. Un soo bie tieen Joa hieed hee Gott sienen Nomen nich mea. Lota trock Sergei no de Stäts un twee von Jehova siene Zeijen kjeemen no am un weesen am Gott sienen Nomen en de Schreft. Sergei freid sikj sea, soone Grupp Menschen to finjen, waut dän Nomen Jehova brukten. Daut es uk oppfaulent, daut een Wieedbuak sajcht, daut Jehova de hechsta Gott es un de eensja Gott, waut Jehova siene Zeijen aunbäden un deenen (Webster’s Third New International Dictionary).

[Footnoot]