«Xnuyeew chi nabʼjik abʼihnaal»

«Xnuyeew chi nabʼjik abʼihnaal keh taqeh xayeew weh, reʼ taqeh wilkeebʼ wach akʼal [...]. Xnuyeew keh chi nabʼjik abʼihnaal eh ko nanuyeʼem chi nabʼjik» (JUAN 17:​6, 26, TNM).

¿Chajariik xraaj ruqʼorom i Jesús? Reʼ reh xuyew chi nabʼjik i rubʼihnaal i Dios noq xukoj pan qʼoroj kʼuhbʼaal. Iruqʼor naq i bʼihnaal reʼreʼ noq irilow naq wach i Santo Laj Huuj wilik pan hebreo (Lucas 4:​16-​21). Jeʼ woʼ, xukʼuhtaaj keh i rajtahqaneel chi na naq kipahqaam pan kitiij: «QaJaaw Dios wilkaat pan taxaaj, loqʼimaj ta naq abʼihnaal» (Lucas 11:2).

Reʼ kehtalil taqeh peet ajnimaneel. Noq reʼ Pedro xqʼorik kuukʼ i ajkʼamal bʼeeh ar Jerusalén, reʼ reh xuqʼor chi reʼ Dios xuchih chi kixilak i tinamit «jinaj tinamit chi reh i ribʼihnaal» (Hechos 15:14, RLLH). Reʼ taqeh apóstol eh taqeh i rajtahqaneel i Jesús xkiq’or pan qʼoroj kʼuhbʼaal chi «chu’nchel re’ inkiq’or i rub’ihnaal i Jehová naruko’ljiik» (Hechos 2:​21, TNM; Romanos 10:13, TNM). Eh chupaam taqeh i huuj reh i Santo Laj Huuj, xkitz’ihb’aaj i rubʼihnaal i Dios. Jenaj huuj i xtz’ihb’jik cho najtir reh i kik’uhb’aal taqeh judío, re’ xkuxik ruz’ihb’jiik pan haab’ 300, inq’orik chi riij noq xkik’at taqeh i kihuuj taqeh ajnimaneel. Ar iruq’or: «[Reʼ taqeh Evangelio] eh re’ kihuuj taqeh i judío reʼ ajnimaneel naq chik taqeh, maʼ na ta kiko’ljiik chuwach i qʼaaqʼ. Narukanabʼjiik chi ne kikʼahtik pan kiyeʼaabʼ, atoob’ ta wilik i rubʼihnaal i Dios wilik chupaam».

¿Ajwach inkib’an i wilih yuʼnaak? Reʼ Santo Laj Huuj Revised Standard Version, iruqʼor: «Ma’ ko ruman ta chi ne inkojarik i rub’ihnaal i Dios, ruum chi ma’xta chik jenaj Dios chuwach i reh. Je’ re’ noq, re’ taqeh judío xkikanaa’ rukojariik i rub’ihnaal i Dios noq ko majaa’ naq ink’ulik i Cristo eh ma’ iruk’ul ta naq chi keh taqeh Iglesia rukojariik i b’ihnaal wilih». Ruum aj reʼ, reʼ Santo Laj Huuj wilih xukoj i qʼorik «Jaaw» chi jilow i rubʼihnaal i Dios. Eh re’ ajk’amal b’eeh reh i Iglesia católica xuyeew jenaj naʼojbʼal keh taqeh i sacerdote: «Noq inkimol kiibʼ reh tzʼuuy eh tiij maʼ na ta chik kikojom i rubʼihnaal i Dios jeʼ rukabʼ tzʼihbʼamaj pan tetragrammaton YHWH, ni xa ta naa chik kiqʼorom» a.

¿Mi wilik jenoʼ tzuhbʼ irukoj eh iruyeew chi nabʼjik i rubʼihnaal i Dios? Jenaj kʼijool, Sergey i rubʼihnaal, xureq chi riij chi wilik jenaj tzuhbʼ. Noq reʼ reh ko kʼisa kʼijool naq eh impatinik naq ar Kirguistán, xril jenaj película ahaʼ wiiʼ iruqʼor naq chi reʼ i rubʼihnaal i Dios, Jehová. Chuwach i lajeebʼ haabʼ maʼ xubʼiraj ta chik chi riij i bʼihnaal wilih. Reʼ reh xooj patineel ar Estados Unidos, eh ar kiʼibʼ taqeh testigo reh Jehová xkiqʼoj wach i rupuerta eh xkikʼuhtaaj reh i rubʼihnaal i Dios ruukʼ i Santo Laj Huuj. Reʼ Sergey qʼeʼ xsuqbʼik rukʼux noq xureq jenaj nimanik irukoj i rubʼihnaal i Dios. Jenaj huuj re’ rubʼihnaal (Webster’s Third New International Dictionary) iruqʼor: «Reʼ Jehová, jenaj Dios nim rajaawriik eh xa re’ wo’ reh inkiloqʼej wach taqeh testigo reh Jehová».

[Ruman]