«La jcaʼbeyix snaʼic te abihile»

«La jcaʼbe snaʼbat aba te machʼatic liʼ ayic ta bahlumilal te la awaʼbon ta jcuenta [...]. La jcaʼbeyix snaʼic te abihile, soc ya to caʼbe xan snaʼic» (JUAN 17:6, 26).

¿Bin ya skʼan ya yalbey skʼoplal-a te Jesuse?: Te Jesuse la yakʼbey ta naʼel te sbiil te Dios kʼalal la stuuntesbey ta scholel skʼop Dios. Jaʼnix jich laniwan yalbey skʼoplal te kʼalal la skʼopon te skʼop Diose (Lucas 4:16-21). Jaʼnix jich la snojptes te jnopojeletik yuʼun ta skʼanel: «Jtatic te ayat ta chʼulchan, acʼa yichʼic ta mucʼ te achʼul bihil» (Lucas 11:2).

Te ejemplo yuʼun te sbabial jchʼuunjeletik yuʼun Cristo: Kʼalal yak ta aʼiyej sok-a te ancianoetik ta Jerusalén te jpuk-kʼop Pedro la yal te Dios la yikʼ tal ta stojol jun pueblo ta yolil te jyanlumetik yuʼun ya yichʼbey te sbiil (Hechos 15:14) Te jpuk-kʼopetik sok te yantikxan jnopojeletik yuʼun te Jesús jich la scholik: «Soc spisil machʼatic ya scʼoponic te sbihil te [Jehová], ya me xcolic» (Hechos 2:21; Romanos 10:13). Jaʼnix jich ya yotsesbeyik te sbiil te Dios te ta junetik la stsʼibayike. Ta jpajk jun te Tosefta sbiil, tey ya yalbey skʼoplal leyetik yuʼun judioetik te juʼ ta tsʼibayel ta jaʼbil 300, ya yalbey skʼoplal te kʼalal la yichʼ chikʼel te junetik te stsʼibayojik te jchʼuunjeletik yuʼun Cristo tey ya yal-a: «Te evangelioetik sok te slibroik te sectarioetik [te jaʼniwan judío cristianoetik] maba ya skʼan ya xkolik ta kʼajkʼ. Ya skʼan ya yichʼik chikʼel te libroetik sok te sbiil te Dios te tey yichʼojik stsʼibayel-ae».

¿Machʼatik jich ya spasik-euk ta kʼajkʼal ini? Ta sjajchibal tal página yuʼun te Biblia Revised Standard Version, te lek la yilik te Consejo Nacional de las Iglesias de Cristo ta Estados Unidos, jich ya yal: «Ma puersa ya jtuuntesbeytik te sbiil te Dios te jtulnaxe sok jun-naxe, te jich yaʼiyel te ayxan yantik diosetik te ya skʼan jelel ya xkʼot yuʼune, kejchajik ta stuuntesel te judioetik te kʼalal mato talem-a te Cristo sok maba snujpʼ te ya stuuntesik-euk te jchʼuunjeletik ta iglesia cristiana». Jaʼ yuʼun te Biblia ini jaʼxanix la yotses Kajwaltik ma la stuuntesbeyix-a te sbiil te Diose. Jaʼnix jich te vaticanoe mato jaluk jich la yalbey ta mantal te obispoetik yuʼune: «Te ta tsoblejetike, te ta kʼayoje sok ta oracionetike te sbiil te Dios te ay ta tetragrammaton YHWH * mame ya yichʼ alel sok tuuntesel».

¿Aybal junuk grupo te ya stuuntes sok ya yakʼbey ta naʼel te sbiil te Diose? Jtul kerem te Sergey sbiil la sta ta ilel te aʼiyej kʼalal ay ta Kirguistán sok jchʼiel keremto-ae, la yil jun película te banti ya yichʼ alel te sbiil te Diose jaʼ Jehová. Kʼax 10 jaʼbil sok maʼyuk-a yaʼiybeyix-a te sbiil te Diose. Bajt ta Estados Unidos tey-abi cheb testigoetik yuʼun Jehová tijbot te stiʼ snae sok akʼbot yil ta Biblia te bin sbiil te Diose. Tseʼelnax yoʼtan te Sergey te la sta jun religión te ya stuuntesbey te sbiil te Diose. Te diccionario Websterʼs Third New International Dictionary te banti ya yal «Jehová Dios», jich ya yalbey skʼoplal: «Jaʼ jun Dios te mero toyol ay sok jaʼ te jip tul Dios te ya yichʼik ta mukʼ te testigoetik yuʼun Jehová».

[Nota]