«Maʼ bisiideʼ laacabe tu laluʼ»

«Maʼ bisiideʼ ca discípulo ni bidiiluʼ naa lu guidxilayú riʼ tu laluʼ. [...] Ne maʼ bisiideʼ laacabe tu laluʼ, ne zusiideruaʼ ni» (JUAN 17:6, 26).

¿Xi nuu Jesús guiníʼ raríʼ yaʼ? Dxi biʼniʼ predicar Jesús lu Guidxilayú riʼ bisiidibe binni tu lá Dios. Ne nanna dxíchinu ora ruundabe ca Escrituras Hebreas ruzeetebe lá Dios (Lucas 4:16-21). Laaca bisiidibe ca discípulo stibe ora guni orarcaʼ guinábacaʼ: «Bixhozeʼ, gaca santificar laluʼ» (Lucas 11:2).

Ejemplu stiʼ ca primé xpinni Cristu. Gudxi apóstol Pedro ca ancianu de guidxi Jerusalén lade ca binni de xcaadxi nación maʼ guleechú Dios «ti guidxi ni chiné nombre» stiʼ (Hechos 15:14). Ca apóstol que ne xcaadxi discípulo stiʼ Jesús biʼniʼ predicarcaʼ: «Guiráʼ tu guinabaʼ gacané Jehová laa ne iquiiñeʼ labe la? zalá» (Hechos 2:21; Romanos 10:13). Laaca biquiiñecabe lá Dios ora bicaacabe Stiidxabe. Lu caadxi ley stiʼ ca judíu ni binibiáʼcabe casi Tosefta, guníʼcabe naquiiñeʼ guzaaquicabe guiráʼ ca libru stiʼ ca xpinni Cristu. Racá ná: «Naquiiñeʼ guzaaquicabe guiráʼ ca Evangeliu ne ca libru cásica stiʼ ca judíu xpinni Cristu ne stiʼ ca ni ná xpinni Cristu laa, dede né racá lá Dios».

¿Tu runi zacá ca dxi riʼ yaʼ? Lu introducción stiʼ ti Biblia ni biʼniʼ Consejo Nacional de las Iglesias de Cristo en Estados Unidos, ná: «Lu judaísmo guleecabe lá Dios purtiʼ guníʼ íquecabe gastiʼ sti Dios casi laabe ne bíʼnicabe ni ante chuʼ ca primé xpinni Cristu ne nga nga ni runi cré ca yuʼduʼ ca». Nga runi, lu Biblia stícabe maʼ qué niquiiñecabe lá Dios, sínuque maʼ Señor. Cadi xadxí gudxi Vaticano ca Obispo stiʼ xi gúnicaʼ: «Ora gúnicaʼ cultu, ora gúʼndacaʼ ne ora guni orarcaʼ cadi naquiiñeʼ iquiiñecaʼ lá Dios ni nuu lu tetragrammaton YHWH ne cadi naquiiñeʼ guiníʼcabe lá ca. *

¿Ñee nuu ti grupu ni riquiiñeʼ ne ni rusiidiʼ lá Dios la? Ti joven lá Sergey bidxela tu lá Dios. Dxi joven ruʼ laabe ne nabézabe Kirguistán, biiyabe ti película ra riete lá Dios nga Jehová. Peru de raqué gudiʼdiʼ chii iza ne maʼ qué ñunadiágabe lá ca. Despué yendézabe Estados Unidos, ne raqué bixhidxi náʼ chupa testigu stiʼ Jehová ra lídxibe ne biluiʼcaʼ laabe lu Biblia lá Dios. Guizáʼ biecheʼ Sergey ora bidii cuenta riquiiñeʼ religión riʼ lá Dios. Lu ti diccionariu cá lá «Jehová, Dios» ne racá ná: «Laabe nga Dios ni jma nandxóʼ ne ni runi adorar ca testigu stiʼ Jehová».

[Nota]