Yumi Lanem Samting Long Tok Blong God

?Yumi Mas Mekem Wanem Blong Tingbaot Ded Blong Jisas?

Ol tok we oli kam biaen oli tokbaot sam kwestin we maet yu yu stap askem, mo oli talem weples yu save ridim ansa blong ol kwestin ya long Baebol blong yu. Ol Witnes blong Jehova bambae oli glad blong tokbaot ansa blong ol kwestin ya wetem yu.

1. ?Yumi mas mekem wanem blong tingbaot ded blong Jisas?

Jisas i talem long ol man blong hem se oli mas tingbaot ded blong hem. Long taem ya, oli kakae bred mo dring waen. Bred hem i pija blong bodi blong Jisas mo waen i pija blong blad blong hem.—Ridim Luk 22:19, 20.

Jisas i yusum bred we i no gat is long hem. Plante taem long Baebol, is i pija blong sin. Taswe bred we i no gat is long hem, i pija blong bodi blong Jisas we i no gat sin, i stret gud olgeta. Hem i givim bodi blong hem olsem wan sakrefaes, we i mekem se ol man oli no moa nid blong kilim ol anamol blong mekem sakrefaes, olsem we Loa blong Moses i talem. (Hibrus 10:5, 9, 10) Waen i pija blong blad blong Jisas we i ron olsem wan sakrefaes blong tekemaot sin blong yumi.—Ridim 1 Pita 1:19; 2:24; 3:18.

2. ?Wetaem i stret blong mekem Memoriol blong tingbaot ded blong Jisas?

Jisas i ded long dei blong lafet blong Pasova, long Nisan 14. Long kalenda blong ol man Jiu, dei i stat taem san i godaon. Long naet bifo we Jisas i ded, hem i mekem kakae blong Pasova wetem ol aposol blong hem. Biaen hem i stanemap wan niufala kakae we i blong tingbaot ded blong hem. Samfala oli singaot spesel taem ya se Memoriol blong ded blong Jisas.—Ridim Luk 22:14, 15.

Tede, ol man blong God oli mekem Memoriol blong tingbaot samting we God i mekem taem i sanem Jisas i kam long wol, blong i pemaot olgeta man long sin mo ded. Ol man Isrel oli stap mekem Pasova wan taem evri yia. Taswe, yumi mekem Memoriol blong ded blong Jisas wan taem evri yia, afta we san i godaon long Nisan 14. Hemia long kalenda blong Baebol we i folem mun.—Eksodas 12:5-7, 13, 17; ridim Jon 1:29.

 3. ?Hu i kakae bred mo dring waen?

Taem Jisas i pasem waen long ol man blong hem, hem i talem se: “Kap ya i olsem niufala promes blong God.” (1 Korin 11:25) Niufala promes ya i tekem ples blong promes we God i mekem wetem ol man Isrel, taem hem i givim Loa blong hem long Moses. Long taem ya, God i promes long ol man Isrel se sipos oli obei long olgeta tok blong hem, bambae oli man blong hem. (Eksodas 19:5, 6) Be ol man Isrel oli no obei long ol tok blong God. Taswe, God i stanemap wan niufala promes no kontrak.—Ridim Jeremaea 31:31.

Niufala promes ya i rod we Jehova i mekem blong blesem plante man. Bambae hem i yusum wan smol grup blong man blong mekem ol blesing ya oli kamtru. Olgeta we Jehova i mekem niufala promes ya wetem olgeta, oli 144,000 man nomo. Bambae hem i yusum olgeta ya blong givim laef we i no save finis long paradaes long wol, long plante milian man blong olgeta kantri. Samfala we Jehova i mekem niufala promes ya wetem olgeta, oli stap mekem wok blong hem yet long wol. Olgeta ya nomo oli kakae bred mo dring waen from we oli joen long “niufala promes” ya, we kap i saen blong hem.—Ridim Luk 12:32; Revelesen 14:1, 3.

4. ?From wanem Memoriol i mekem i gud long yumi?

Memoriol we yumi mekem wan taem evri yia blong tingbaot ded blong Jisas, i mekem se yumi tinghae long nambawan fasin blong Jehova blong lavem ol man. Hem i sanem Pikinini blong hem, blong i ded from ol sin blong yumi. Taswe, taem yumi go long Memoriol, yumi mas tingting dip long ded blong Jisas se i mekem wanem long yumi. Yumi mas tingbaot samting we yumi save mekem, blong soemaot se yumi tinghae long wanem we Jehova mo Jisas tufala i mekem blong yumi.—Ridim Jon 3:16; 2 Korin 5:14, 15.

Sipos yu wantem save moa, plis lukluk pej 206-208 long buk ya “?Wanem Samting We Baebol I Rili Tijim?” we ol Witnes blong Jehova oli wokem.