Lilongesa Ondaka ya Huku

Oñgeni Tuna Okuhinangela Ononkhia Mba Jesus?

Onthele ei ipopia omapulo hamwe ove wasukalala nao, nokulekesa opi upondola okuvasa omakumbululo Mombimbiliya yove. Onombangi mba Jeova vena ehambu liokutomphola nove omakumbululo oo.

1. Oñgeni ononkhia mba Jesus mbuna okuhinangelwa?

Jesus watolela ovalanduli vae vahinangele ononkhia mbae, okuundapesa ombolo, novinyu. Ombolo ilekesa olutu lwa Jesus, ovinyu ilekesa ohonde yae.—Tanga Lucas 22:19, 20.

Jesus waundapesa ombolo ihapakelwe onkhiso. Mombimbiliya, onkhiso ilekesa onkhali. Ngotyo ombolo otyilekeso tyolutu lwa Jesus luhena onkhali. Oe waava olutu lwae ngotyilikutila, otyo tyatalamekesa ovilikutila viovinyama ankho viitwa Movitumino Viapelwe Moisesi. (Hebreus 10:5, 9, 10) Ovinyu ankho otyilekeso tyohonde yakolela Jesus amomesa ngotyilikutila tyononkhali mbetu.—Tanga 1 Pedro 1:19; 2:24; 3:18.

2. Onalupi tuna okuhinangela ononkhia mba Jesus?

Jesus wankhia mo Pasikwa, 14 yo Nisan. Onthiki yova Judeu ankho ihimbika tyina ekumbi linyingila. Motyinthiki tyahulililako etyi Jesus eheneipawe, walile ondalelo Yopasikwa nono apostolu mbae, iya ahimbika ondalelo omphe opo ahinangele ononkhia mbae.—Tanga Lucas 22:14, 15.

Hono, ovanthu va Huku vahinangela etyi Huku alinga menyina lia Jesus opo ayovole ovanthu aveho monkhali no nonkhia. (Êxodo 12:5-7, 13, 17) Ngetyi Opasikwa ankho ilingwa vala like menima, tupu Ehinangelo liononkhia mba Jesus lilingwa vala like menima tyina ekumbi liamanyingila mo 14 yo Nisan, okulandula okalendaliu ko Mbimbiliya.—Tanga João 1:29.

  3. Ovalie vena okulia ombolo novinyu?

Etyi Jesus aavela ovinyu ovalanduli vae, wati: “Okopo ei ilekesa omphango omphe.” (1 Coríntios 11:25) Omphango omphe yapinga pomphango Yovitumino Viapelwe Moisesi, omu Huku alaele ova Isilayeli okuti inkha vemutavela, mavakala ovanthu vae. (Êxodo 19:5, 6) Mahi, ova Isilayeli kavetavelele ondaka ya Huku. Moluotyo, Jeova walinga omphango omphe.—Tanga Jeremias 31:31.

Nomphango omphe, Jeova waholovona ovanthu vehehi opo aavele ononkhano onongwa ovanthu ovanyingi. Ovanthu vekahi momphango oyo kavehi, vena vala 144.000. Menyina liavo, ovanthu ovanyingi vomalongo aeho mavayambwa nomuenyo wahapu momphangu yombembwa pano pohi. Vamwe vekahi momphango omphe, hono vaumbila Jeova pano pohi. Ovo vala vena okulia ombolo novinyu mokonda okopo “ilekesa omphango omphe.”—Tanga Lucas 12:32; Revelação 14:1, 3.

4. Oñgeni Ehinangelo lituetela ouwa?

Ehinangelo liononkhia mba Jesus lilingwa kese enima, liyawisa olupandu luetu kohole onene ya Jeova. Watuma Omona wae opo ankhile ononkhali mbetu. Moluotyo, tyina tuenda Kehinangelo, tuesukisa okusoka oñgeni ononkhia mba Jesus mbutukuatesako. Tuesukisa okusoka oñgeni matulekesa olupandu kuetyi Jeova na Jesus vetulingila.—Tanga João 3:16; 2 Coríntios 5:14, 15.

[Onondaka Poutoi]

Opo unoñgonoke vali konthele oyo, tala pomafo 206-208 momukanda ou, walingua no Nombangi mba Jeova. Oityi Ombimbiliya Tyili Ilongesa?