Hen Kwagh Ken Mkaanem Ma Aôndo

Gba u Se Umbur Ku u Yesu Nena?

Ngeren ne time sha mbampin mba alaghga u vanden pinen yô, shi a tese ape ú fatyô u zuan a mbamlumun sha mbampin mba shon ken Bibilo you yô. A doo Mbashiada mba Yehova kpishi u lamen sha mbamlumun mban vea we.

1. Gba u a umbur ku u Yesu nena?

Yesu yange kaa a mbadondon un ér vea umbur ku na yô, ve ya bredi shi ve ma wain u sha ikyav la. Bredi la tile sha ityough ki iyol i Yesu, wain la di gema tile sha ityough ki awambe a na.—Ôr Luka 22:19, 20.

Bredi u Yesu yange na mbahenen nav shighe u lu tesen ve er vea umbur ku na la, lu u i wa kwa sha mi ga yô. Ashighe kpishi ka a ôron kwagh u kwa ken Bibilo yô, i lu kwagh u isholibo. Sha nahan yô, bredi la lu ikyav i iyol i Yesu, i i lu a isholibo shio la. Nagh ku Yesu yange na sha iyol na la, kar tile sha ityough ki nagh ku yange i naan sha uzendenya er Tindi u Mose tese la. (Mbaheberu 10:5, 9, 10) Wain la di lu ikyav i awambe a Yesu, a yange haa inya sha ci u asorabo ase la.—Ôr 1 Peteru 1:19; 2:24; 3:18.

2. Ka hanma shighe i gbe u se umbur ku u Yesu?

Yesu yange kpe sha iyange i iniongo i Paseka, Nisan 14. Ken tar u Mbayuda yô, sev mbu hiin sha iyange i been. Hen aikighe u kpernan i wua Yesu la, a ya Paseka vea mbaapostoli nav, maa a ver iniongo i umbur ku na la.—Ôr Luka 22:14, 15.

Nyian ne, ior mba Aôndo mba umbur kwagh u Aôndo a er sha ikyev i Yesu sha u yiman tar cii sha ikyev i isholibo man ku la. (Ekesodu 12:5-7, 13, 17) Vough er yange i eren iniongo i Paseka kwa môm ken inyom nahan, kape ku u Yesu la kpa, i umbur u kwa môm hanma inyom shighe u werayange shon u zough sha uwer u Nisan 14 sha kalenda u̱ weregh u̱ ken Bibilo la je la.—Ôr Yohane 1:29.

  3. Ka unô i gbe u vea ya bredi shi vea ma wain la?

Shighe u Yesu na mbadondon un wain la, a kaa a ve ér: “Iyongo ne yô, ka Ikyuryan i he i sha awambe Am.” (1 Mbakorinte 11:25) Ikyuryan i he ne kar tile sha ityough ki Ikyuryan i Tindi u Mose, i yange Aôndo tôndo zwa a Mbaiserael ér aluer vea waan atindiakaa a na ikyô yô, vea hingir ior nav la. (Ekesodu 19:5, 6) Nahan kpa, Mbaiserael ungwa imo i Aôndo ga. Nahan Aôndo due a ikuryan i he.—Ôr Yeremia 31:31.

Ka sha ikyuryan i he ne Yehova una na ior kpishi vea zua a averen sha ikyev i iorov kpuaa ye. Mba ve lu ken ikyuryan la mba kpuaa, mba iorov 144,000 tseegh tsô. Ior umiliôn imôngo mba ve dugh ken akuraior cii mbara vea zua a uma u tsôron ken Paradiso shin tar, sha ikyev i ve mba 144,000 mbara. Mbagenev mba ve lu ken ikyuryan i he ne mba civir Aôndo shin tar nyian. Ka ve tseegh i gbe u vea yaan bredi shi vea maan wain la ye, sha ci u ka iyongo la i lu “Ikyuryan i he” la ye.—Ôr Luka 12:32; Mpase 14:1, 3.

4. Ku u Yesu u se umbur la ngu wasen se nena?

Ku u Yesu u se umbur hanma inyom la ka u na se seer lun a iwuese sha dooshima u Yehova u hemban cii la. A tindi Wan na ér a va kpe sha ci u asorabo a ase. Nahan zum u se ze u umbur ku u Yesu yô, a gba u se gbidye kwar se nenge er ku na u lu se a inja la. Doo u se time se fa er se er ve se tese iwuese sha kwagh u Yehova man Yesu ve er sha ci wase la.—Ôr Yohane 3:16; 2 Mbakorinte 5:14, 15.

Wea soo u seer zuan a iwanger yô, ôr peeji 206-208 u takerada u Bibilo Tese Ér Nyi Jimi? u se tese shin heen ne, ka Mbashiada mba Yehova ve gber u ye.