ہمیں یسوع مسیح کی موت کو یاد رکھنے کے لئے کیا کرنا چاہئے؟
پاک صحیفوں کی تعلیم
ہمیں یسوع مسیح کی موت کو یاد رکھنے کے لئے کیا کرنا چاہئے؟
اِس مضمون میں ایسے سوالوں پر غور کِیا گیا ہے جن کے بارے میں لوگ اکثر سوچتے ہیں۔ اِس میں یہ بھی واضح کِیا گیا ہے کہ آپ پاک صحیفوں میں اِن سوالوں کے جواب کہاں سے حاصل کر سکتے ہیں۔ یہوواہ کے گواہ خوشی سے آپ کی مدد کریں گے تاکہ آپ اپنے سوالوں کے جواب حاصل کر سکیں۔
۱. ہمیں یسوع مسیح کی موت کو یاد رکھنے کے لئے کیا کرنا چاہئے؟
یسوع مسیح نے اپنے شاگردوں کو حکم دیا تھا کہ وہ اُن کی موت کو یاد رکھیں۔ اُنہوں نے اپنے شاگردوں سے کہا کہ وہ اُن کی یاد میں ایک تقریب منائیں جس میں وہ روٹی کھائیں اور سُرخ مے پئیں۔ روٹی یسوع مسیح کے بدن کی علامت ہے اور مے اُن کے خون کی علامت ہے۔—لوقا ۲۲:۱۹، ۲۰ کو پڑھیں۔
یسوع مسیح نے اپنے شاگردوں کے ساتھ آخری کھانے میں جو روٹی استعمال کی، اُس میں خمیر نہیں تھا۔ پاک کلام میں لفظ خمیر اکثر گُناہ کی طرف اشارہ کرتا ہے۔ اِس لئے بےخمیری روٹی یسوع مسیح کے بےعیب بدن کی بالکل صحیح علامت تھی۔ موسیٰ کی شریعت کے مطابق جانوروں کو قربان کِیا جاتا تھا۔ لیکن جب یسوع مسیح نے اپنا بدن قربان کر دیا تو پھر جانوروں کو قربان کرنے کی ضرورت نہ رہی۔ (عبرانیوں ۱۰:۵، ۹، ۱۰) سُرخ مے یسوع مسیح کے قیمتی خون کی علامت تھی جو اُنہوں نے اِس لئے بہایا تاکہ ہم گُناہوں کی معافی حاصل کر سکیں۔—۱-پطرس ۱:۱۹؛ ۲:۲۴؛ ۳:۱۸ کو پڑھیں۔
۲. ہمیں یسوع مسیح کی یادگاری تقریب کب منانی چاہئے؟
یسوع مسیح کی موت اُسی دن پر ہوئی تھی جس پر یہودی لوگ فسح کی عید مناتے تھے۔ یہ عید یہودی مہینے نیسان کی ۱۴ تاریخ کو منائی جاتی تھی۔ یہودیوں کا دن سورج کے غروب ہونے سے شروع ہوتا تھا۔ اپنی موت سے ایک شام پہلے یسوع مسیح نے اپنے شاگردوں کے ساتھ عیدِفسح منائی اور اُن کے ساتھ مل کر کھانا کھایا۔ اِس کے بعد اُنہوں نے ایک نئی تقریب قائم کی اور یہ حکم دیا کہ یہ تقریب اُن کی یاد میں منائی جائے۔—لوقا ۲۲:۱۴، ۱۵ کو پڑھیں۔
آج بھی یسوع مسیح کے سچے پیروکار اُن کی یاد میں یہ تقریب مناتے ہیں۔ اِس تقریب میں وہ یسوع مسیح کی قربانی کو یاد کرتے ہیں جو اُنہوں نے تمام انسانوں کو گُناہ اور موت سے رِہائی دِلانے کے لئے دی تھی۔ جس طرح عیدِفسح سال میں ایک بار منائی جاتی تھی اُسی طرح یسوع مسیح کی یادگاری تقریب بھی سال میں ایک ہی بار منائی جاتی ہے۔ یہ تقریب ۱۴ نیسان کو سورج غروب ہونے کے بعد منائی جاتی ہے۔—خروج ۱۲:۵-۷، ۱۳، ۱۷؛ یوحنا ۱:۲۹ کو پڑھیں۔
۳. یسوع مسیح کی یادگاری تقریب پر کس کو روٹی کھانی اور مے پینی چاہئے؟
جب یسوع مسیح نے اپنے شاگردوں کو مے پیش کی تو اُنہوں نے کہا: ”یہ پیالہ ... نیا عہد ہے۔“ (۱-کرنتھیوں ۱۱:۲۵) اِس نئے عہد کے آنے سے وہ عہد ختم ہو گیا جو خدا نے موسیٰ کے ذریعے بنیاسرائیل سے باندھا تھا۔ یہوواہ خدا نے وعدہ کِیا تھا کہ اگر بنیاسرائیل اُس کے حکموں کو مانیں گے تو وہ اُس کی خاص قوم ٹھہریں گے۔ (خروج ۱۹:۵، ۶) لیکن بنیاسرائیل، یہوواہ خدا کے فرمانبردار نہ رہے اِس لئے خدا نے ایک نیا عہد قائم کِیا۔—یرمیاہ ۳۱:۳۱ کو پڑھیں۔
یہ نیا عہد صرف ایک لاکھ ۴۴ ہزار لوگوں کے ساتھ باندھا گیا ہے۔ لیکن اِن کے ذریعے لاکھوں لوگوں کو یہ موقع ملے گا کہ وہ زمین پر ہمیشہ تک زندہ رہیں۔ جن لوگوں کے ساتھ نیا عہد باندھا گیا ہے، اُن میں سے کچھ ہی ابھی زمین پر موجود ہیں۔ صرف اِنہی لوگوں کو یسوع مسیح کی یادگاری تقریب پر روٹی کھانی اور مے پینی چاہئے۔—لوقا ۱۲:۳۲؛ مکاشفہ ۱۴:۱، ۳ کو پڑھیں۔
۴. یسوع مسیح کی یادگاری تقریب پر جانے سے ہمیں کیا فائدہ ہوتا ہے؟
یہوواہ خدا نے ہمارے گُناہوں کی معافی کے لئے اپنے بیٹے کو قربان کِیا۔ یوں اُس نے ہمارے لئے بڑی محبت ظاہر کی۔ جب ہم یادگاری تقریب پر جاتے ہیں تو اِس محبت کے لئے ہماری قدر اَور بھی بڑھ جاتی ہے۔ اِس تقریب میں حاضر ہونے سے ہمیں یہ سوچنے کا موقع ملتا ہے کہ یسوع مسیح کی قربانی ہمارے لئے کیا اہمیت رکھتی ہے۔ ہمیں اِس بات پر غور کرنا چاہئے کہ ہم یہوواہ خدا اور یسوع مسیح کی محبت کے لئے شکرگزاری کیسے ظاہر کر سکتے ہیں۔—یوحنا ۳:۱۶؛ ۲-کرنتھیوں ۵:۱۴، ۱۵ کو پڑھیں۔
مزید معلومات کے لئے اِس کتاب کے صفحہ ۲۰۶-۲۰۸ کو دیکھیں۔