Maan e fa e wun e mantan Ɲanmiɛn

“Be su bo-man laa sa’m be su be di-man jɔlɛ kun”

KƐ E wla kpɛn ninnge wie’m be su’n, wie liɛ’n e di aklunjuɛ. I wie yɛle ninnge fɛfɛ nga e nin e awlɛn su sran mun e yoli be’n. Sanngɛ wie liɛ’n sa wie mɔ e wla kpɛn be su’n, be ti e ndawlɛ. ?Sa wie’m be o lɛ mɔ kɛ amun wla kpɛn be su’n amun awlɛn kpɛ amun klun ɔn? Sɛ ɔ ti sɔ’n, atrɛkpa’n amun usa amun wun kɛ: ‘?Cɛn onin ko naan min wla w’a kpɛnman ninnge tɛtɛ sɔ’m be su kun?’ Ɲanmiɛn nuan ijɔfuɛ Ezai i fluwa’n tɛ kosan sɔ’n su. Wafa ng’ɔ fa tɛ su’n ɔ fɔnvɔ e.​—An kanngan Ezai 65:17 nun.

Zoova wá núnnún ninnge nga be yo mɔ sa wie’m be yo e ndawlɛ’n. ?Wafa sɛ yɛ ɔ́ yó i sɔ ɔ? Yɛle kɛ ɔ́ núnnún mɛn tɛ nga ɔ nin i nun ninnge nga be fa ɲrɛnnɛn’n yi i sran’m be su’n. Kpɛkun ɔ́ fá like kun m’ɔ ti kpa lele’n síe i osu. Zoova sinnin Ezai lika tali nda seli kɛ: “Ń wá yí nyanmiɛn ng’ɔ la nglo lɔ plaii’n, nin asiɛ’n be uflɛ.” Sɛ e wun nda sɔ mɔ Ɲanmiɛn tali’n i wlɛ’n, ɔ́ cící e wla.

?Ngue yɛle ɲanmiɛn ng’ɔ la nglo lɔ plaii’n mɔ Ɲanmiɛn waan ɔ́ wá yí i uflɛ’n? Biblu’n nun like nɲɔn be kwla uka e naan y’a si i. I klikli’n yɛle kɛ Biblu’n i klɛfuɛ nɲɔn be kannin ɲanmiɛn su lɔ uflɛ’n i ndɛ ekun. Kɛ bé kɛ́n i ndɛ’n, be fa kannin asiɛ nga su ninnge mɔ bé wá káci dan kpa’n be ndɛ. (2 Piɛr 3:13; Sa Nglo Yilɛ 21:1-4) I nɲɔn su’n yɛle kɛ “nyanmiɛn su lɔ” nga Biblu’n kɛn i ndɛ’n, wie liɛ’n ɔ ti sielɛ annzɛ famiɛn dilɛ nzɔliɛ. (Ezai 14:4, 12; Daniɛl 4:22, 23) Ɔ maan ɲanmiɛn su lɔ uflɛ’n ti famiɛn dilɛ kun m’ɔ́ kwlá yó naan asiɛ’n su wa ninnge’m b’a yo be nuan su sɛsɛsɛ ɔ. Famiɛn dilɛ ng’ɔ kwla yo i sɔ ninnge liɛ mun’n, ɔ ti kunngba cɛ. I yɛle Ɲanmiɛn Sielɛ’n. Sielɛ sɔ’n yɛ Zezi kleli e kɛ e srɛ naan i blɛ’n ju’n niɔn. Ɔ́ wá yó maan bé yó Ɲanmiɛn i klun sa’n asiɛ wunmuan’n su.​—Matie 6:9, 10.

?Ngue yɛle asiɛ uflɛ’n? Maan e nian Biblu’n nun sa nɲɔn mɔ be kwla uka naan y’a si i’n. I klikli’n yɛle kɛ, kɛ Biblu’n kan “asiɛ” ndɛ’n, wie liɛ’n sran’m be ndɛ yɛ ɔ kan ɔn. Nán asiɛ bɔbɔ ba’n i ndɛ yɛ ɔ kan ɔn. (Jue Mun 96:1; Zeremi 22:29) I nɲɔn su’n, yɛle kɛ Biblu’n waan Ɲanmiɛn Sielɛ’n i bo’n, sran kpa’m bé kpɛ́ sa sɛsɛ yolɛ’n i sin atin. Yɛ asiɛ wunmuan’n su’n, sa sɛsɛ yɛ sran’m bé yó ɔ. (Ezai 26:9) Ɔ maan asiɛ uflɛ’n ti sran akpasua mɔ bé ló be wun bé mán Ɲanmiɛn naan ɔ sie be’n yɛ bé nánti Ɲanmiɛn i mmla’m be su’n, be nzɔliɛ.

?Ninnge nga be yo mɔ maan sa wie’m be yo e ndawlɛ’n, amun wun wafa nga Zoova wá núnnún be sekeseke’n? Ɔ ka kaan sa’n, Zoova yía ɲanmiɛn su lɔ uflɛ’n nin asiɛ uflɛ’n be su nda ng’ɔ tali’n i nuan. Ɔ́ táka mɛn uflɛ mɔ i nunfuɛ’m bé yó sa’n i nuan su ɔ. * Mɛn uflɛ sɔ’n nun’n, ninnge nga be yo mɔ maan sa wie’m be yo e ndawlɛ’n, e kplo’n nun afɛ’n nin o, e akunndan’n nun afɛ’n nin o, i kwlaa sɔ’n be su boman be nun wie fi su diman jɔlɛ kun. Sran kpa’m bé kwlá dí mɛn’n i kpa sakpa. Yɛ sa nga be ju aliɛ ba kwlaa nun’n, kɛ be wla wá kpɛ́n su’n, bé dí aklunjuɛ.

?Yɛ afɛ ng’ɔ o e su dɔ nga su’n nin? Kɛ Zoova sín Ezai lika tá nda’n, ɔ seli wie kɛ: “Be su bo-man laa sa’m be su be di-man jɔlɛ kun. Be su bu-man be akunndan kun.” Afɛ kwlaa ng’ɔ tɔli e su mɛn tɛ nga nun’n, e wla fí be su blɛblɛblɛ. ?I sɔ liɛ’n yoman amun fɛ? Sɛ ɔ yo amun fɛ’n, maan amun kunndɛ wafa nga amun nin Ɲanmiɛn m’ɔ tali nda fɛfɛ sɔ’n amun afiɛn kwla mantan kpa ekun’n.

[Ja ngua lɛ ndɛ’n]

[Ndɛ kwle, bue 12]

Zoova wá núnnún ninnge nga be yo mɔ sa wie’m be yo e ndawlɛ’n.