Pakigsuod sa Diyos
“Ang Unang mga Butang Dili na Pagahinumdoman”
ANG nangaging mga kasinatian mahimong makaayo. Ang pagpamalandong sa nindot nga mga panahon uban sa mga minahal makapalipay. Apan sa ubang kahimtang, ang paghinumdom sa mga kasinatian mahimong makapaguol. Gihasol ka ba sa mapait nga mga kasinatian? Kon mao, mangutana ka tingali, ‘Mahanaw pa kaha kining makapasubong mga kasinatian?’ Atong makaplagan ang makapadasig kaayong tubag niini sa gisulat ni propetang Isaias.—Basaha ang Isaias 65:17.
Katuyoan ni Jehova nga wagtangon ang hinungdan sa mapait nga kasinatian. Sa unsang paagi? Pinaagi sa paglaglag niining daotang sistema uban sa tanang pag-antos niini ug sa pagpuli niini ug mas maayong sistema. Si Jehova misaad pinaagi kang Isaias: “Ania, ako naglalang ug bag-ong mga langit ug usa ka bag-ong yuta.” Kon atong masabtan kining saara, kita makabatog paglaom.
Unsa ang bag-ong mga langit? Ang Bibliya naghatag ug duha ka ideya nga makatabang nato. Una, ang bag-ong mga langit gihisgotan sa duha pa ka magsusulat sa Bibliya, ug pareho nilang gilangkit ang maong mga pulong sa dagkong kausaban nga mahitabo niining yutaa. (2 Pedro 3:13; Pinadayag 21:1-4) Ikaduha, sa Bibliya ang terminong “mga langit” o “kalangitan” mahimong magsimbolo sa pagmando, o gobyerno. (Isaias 14:4, 12; Daniel 4:25, 26) Nan, ang bag-ong mga langit maoy bag-ong gobyerno nga makapatunghag matarong nga kahimtang sa yuta. Usa lang ka kagamhanan ang makahimo nianang tanan—ang Gingharian sa Diyos, ang langitnong gobyerno nga gitudlo ni Jesus kanato nga iampo. Ang maong Gingharian maoy magpatuman sa matarong nga kabubut-on sa Diyos sa tibuok yuta.—Mateo 6:9, 10.
Unsa ang bag-ong yuta? Tagda ang duha ka Kasulatanhong pamatuod nga motabang nato sa paghimog hustong konklusyon. Una, sa Bibliya ang terminong “yuta” magtumong usahay sa mga tawo, dili sa kalibotan. (Salmo 96:1) Ikaduha, gitagna sa Bibliya nga ilalom sa pagmando sa Diyos, ang mga matinumanon makakat-on sa pagkamatarong nga molukop sa tibuok yuta. (Isaias 26:9) Busa, ang bag-ong yuta nagtumong sa usa ka katilingban sa katawhan nga magpasakop sa pagmando sa Diyos ug magkinabuhi sumala sa iyang matarong nga mga sukdanan.
Mahanduraw na ba nimo kon sa unsang paagi wagtangon ni Jehova ang hinungdan sa mapait nga mga kasinatian? Sa dili madugay, bug-os nang tumanon ni Jehova ang iyang gisaad nga bag-ong mga langit ug bag-ong yuta, nga magpatunghag matarong nga bag-ong kalibotan. * Nianang bag-ong kalibotan, mahimo nang mga butang sa kagahapon ang hinungdan sa mapait nga mga kasinatian—pisikal, mental, ug emosyonal nga pag-antos. Ang mga matinumanon bug-os nga magmalipayon, ug ilang handomon ang nindot nga kasinatian sa matag adlawng molabay.
Apan komosta ang mga kasakit nga atong giantos karon? Ang saad ni Jehova pinaagi kang Isaias nagpadayon: “Ang unang mga butang dili na pagahinumdoman, ni kini sila motungha pa sa kasingkasing.” Ang bisan unsang kasakit nga atong giantos niining daang sistema inanayng mahanaw. Dili ka ba malipay niana nga paglaom? Nan, nganong dili nimo susihon kon sa unsang paagi mas masuod ka sa Diyos kinsa nagsaad nianang nindot nga kaugmaon?
Sugyot nga pagbasa sa Bibliya sa Marso:
[Footnote]
^ par. 5 Alang sa dugang impormasyon bahin sa Gingharian sa Diyos ug kon unsay haduol nang buhaton niini, tan-awa ang kapitulo 3, 8, ug 9 sa librong Unsay Tinuod nga Gitudlo sa Bibliya? nga gipatik sa mga Saksi ni Jehova.
[Blurb sa panid 19]
Katuyoan ni Jehova nga wagtangon ang hinungdan sa mapait nga mga kasinatian
