“Ena Sega ni Nanumi na ka Eliu”
Toro Voleka Vua na Kalou
“Ena Sega ni Nanumi na ka Eliu”
E DAU vinaka na noda vakananuma lesu eso na ka. E rawa ni vakavumarau noda vakasamataka lesu na veigauna eda dau tiko vata kina kei ira na wekada lomani. Ia ena so na gauna e rawa ni vakavurarawa tale ga na veika eda dau vakasamataka. E vakararawataki iko beka na nomu dau vakasamataka na veika mosimosi o sotava ena veigauna sa oti? Ke vaka kina o na rairai nanuma, ‘Ena seavu beka na veika mosimosi au dau vakasamataka?’ Ena vakacegui keda na isau ni taro qori ena veika a vola na parofita o Aisea.—Wilika Aisea 65:17.
Na inaki sara ga i Jiova me na vakaotia na ka e dau vakavuna meda vakasamataka na ka mosimosi. Ena sala cava? Ena kauta tani na ituvaki ca qo kei na rarawa kece me qai sosomitaka ena dua na ka e totoka sara. A vakayagataki Aisea na parofita o Jiova me yalataka: “Raica, ka’u sa bulia na lomalagi vou kei na vuravura vou.” Noda kila vinaka na vosa ni yalayala qori ena rawa ni noda kina na inuinui.
Na cava na lomalagi vou? E rua na ka e tukuna na iVolatabu me vukei keda meda kila qori. Kena imatai, erau a vakamacalataka tale ga na lomalagi vou e rua na dauvolaivolatabu rau qai sema ruarua qori ena veiveisau ena vakayacori e vuravura. (2 Pita 3:13; Vakatakila 21:1-4) Kena ikarua, na vosa “lomalagi” e rawa ni vakaibalebaletaka na veiliutaki se matanitu. (Aisea 14:4, 12; Taniela 4:25, 26) Na lomalagi vou gona e dua na matanitu vou e rawa ni tauyavutaka ena vuravura qo na ivakarau ni bula e vinaka cake. Ia e dua ga na veiliutaki e rawa ni cakava kece qori—na Matanitu ni Kalou, qori na matanitu vakalomalagi a vakavulica o Jisu meda masulaka. Na Matanitu qori ena vakayacora na inaki dodonu ni Kalou e veiyasa i vuravura.—Maciu 6:9, 10.
Na cava na vuravura vou? Dikeva e rua na yavu vakaivolatabu e rawa ni vukei keda meda kila na kena isau dodonu. Kena imatai, ni tukuni ena iVolatabu na “vuravura,” e vakaibalebaletaki ena so na gauna ina kawatamata, sega ni vuravura qele. (Same 96:1) Kena ikarua, a parofisaitaka na iVolatabu nira na vulica na tamata yalodina na ivalavala dodonu ra qai vakatetea e veiyasa i vuravura ni sa veiliutaki na Kalou. (Aisea 26:9) Na vuravura vou e vakaibalebaletaka e dua na ilawalawa tamata era na talairawarawa ena veiliutaki ni Kalou ra qai muria na nona ivakatagedegede dodonu.
O raica rawa na sala ena vakaotia kina o Jiova na veika e dau vakavuna na veika mosimosi eda dau vakasamataka? Ena dua na gauna ga qo, sa na vakayacora o Jiova na ka kece a yalataka tu me baleta na lomalagi vou kei na vuravura vou, sa na tauyavutaki kina e dua na vuravura vou ni yalododonu. * Ena vuravura vou qori, sa na sega tale kina na ka e dau vakavuna na mosi ni yago, ulu, se na ka e dau vakararawataka na lomada. Ena vinaka vakaoti na nodra bula na yalodina, era na marautaka tale ga na veika totoka era na vakasamataka e veisiga.
Vakacava na veika e dau vakavuna na noda lomabibi? A tomana na yalayala i Jiova na parofita o Aisea: “Ena sega ni nanumi na ka eliu, ena sega ni curu tale ki na lomamudou.” Na mosi cava ga eda vakila ena vuravura makawa qo ena seavu yani vakamalua. O marautaka qori? Ke vaka kina, vakacava mo saga mo kila na sala o rawa ni toro voleka kina vua na Kalou e yalataka na veika vinaka me baleta na gauna se bera mai?
Wili iVolatabu e vakatututaki ena Maji:
[iVakamacala e ra]
^ para. 7 Me ikuri ni ivakamacala me baleta na Matanitu ni Kalou kei na ka sa vakarau vakayacora ena dua na gauna ga qo, raica na wase 3, 8, kei na 9 ni ivola Na Cava Sara Mada e Kaya na iVolatabu? tabaka na iVakadinadina i Jiova.
[Tikina bibi ena tabana e 19]
Na inaki sara ga i Jiova me na vakaotia na veika e dau vakavuna meda vakasamataka na ka mosimosi
