“A Gaghị Echeta Ihe Mbụ Niile”
Bịaruo Chineke Nso
“A Gaghị Echeta Ihe Mbụ Niile”
MGBE ụfọdụ, obi na-atọ anyị ụtọ ma anyị cheta ihe ndị mere n’oge gara aga. Obi na-atọkwa anyị ụtọ ma anyị cheta oge ndị anyị na ndị anyị hụrụ n’anya nọrịrị. Ma, e nwere ihe ndị ọ na-abụ anyị cheta, obi ajọọ anyị njọ. Ò nwere ihe ndị na-agbawa gị obi ugbu a ma i cheta ha? Ọ bụrụ na e nwere, i nwere ike ịna-eche, sị, ‘Ò nwekwara mgbe ihe ndị a ga-apụ m apụ n’obi?’ Aịzaya onye amụma zara ajụjụ a nke ọma. Ihe o kwuru ga-agba anyị ezigbo ume.—Gụọ Aịzaya 65:17.
Jehova bu n’obi iwepụ ihe ndị na-akpatara anyị nsogbu bụ́ ndị ọ na-abụ anyị cheta, obi ajọọ anyị njọ. Olee otú ọ ga-esi eme ya? Ọ ga-ewepụ ajọ ụwa a na nsogbu niile dị na ya, ma were ụwa nke ka ya mma dochie ya. Jehova si n’ọnụ Aịzaya kwe nkwa, sị: “Lee, m na-eke eluigwe ọhụrụ na ụwa ọhụrụ.” Ọ bụrụ na anyị aghọta nkwa a Chineke kwere, obi ga-atọ anyị ụtọ, ọ ga-emekwa ka anyị nwee olileanya.
Gịnị bụ eluigwe ọhụrụ ahụ? Baịbụl kwuru ihe abụọ ga-enyere anyị aka ịghọta ihe ọ bụ. Nke mbụ bụ na mmadụ abụọ ọzọ so dee Baịbụl kwuru banyere eluigwe ọhụrụ ahụ, ihe ha kwuru gosiri na a ga-enwe ezigbo mgbanwe n’ụwa a. (2 Pita 3:13; Mkpughe 21:1-4) Nke abụọ bụ na n’Akwụkwọ Nsọ, okwu ahụ bụ́ “eluigwe” na-anọchi anya ọchịchị mgbe ụfọdụ. (Aịzaya 14:4, 12; Daniel 4:25, 26) N’ihi ya, eluigwe ọhụrụ ahụ bụ ọchịchị ọhụrụ nke ga-eme ka e nwee ezi omume n’ụwa. E nwere naanị otu ọchịchị nke nwere ike ime ihe a niile. Ọ bụ Alaeze Chineke, nke bụ́ ọchịchị eluigwe ahụ Jizọs kụziiri anyị ka anyị na-ekpe ekpere ka ọ bịa. Alaeze ahụ ga-eme ka uche ezi omume Chineke mewe n’ụwa niile.—Matiu 6:9, 10.
Ma, gịnị bụ ụwa ọhụrụ ahụ? Ka anyị leba anya n’ụzọ ihe abụọ Baịbụl kwuru bụ́ ndị ga-enyere anyị aka ịmata ihe ọ bụ n’eziokwu. Nke mbụ bụ na n’Akwụkwọ Nsọ, mgbe ụfọdụ, okwu bụ́ “ụwa” pụtara ndị mmadụ, ọ bụghị naanị ụwa nkịtị. (Jenesis 11:1; Abụ Ọma 96:1) Nke abụọ bụ na Akwụkwọ Nsọ buru amụma na ndị na-erubere Chineke isi ga-amụta ezi omume, ezi omume ahụ ga-ezukwa ụwa niile. (Aịzaya 26:9) N’ihi ya, ụwa ọhụrụ ahụ bụ ụmụ mmadụ ndị ga-erubere ọchịchị Chineke isi ma na-ebi ndụ otú Chineke chọrọ.
Ị̀ ghọtawala otú Jehova ga-esi ewepụ ihe ndị na-akpatara anyị nsogbu, bụ́ ndị ọ na-abụ anyị cheta obi ajọọ anyị njọ? N’oge na-adịghị anya, Jehova ga-emezu nkwa ahụ o kwere. Ọ ga-eme ka e nwee eluigwe ọhụrụ, meekwa ka e nwee ụwa ọhụrụ nke a ga-enwe ezi omume na ya. * N’ụwa ọhụrụ ahụ, Jehova ga-akwụsị ihe niile na-akpatara anyị obi mgbawa ma anyị cheta ha. Ndụ ga-atọ ndị niile na-erubere Jehova isi ụtọ, ihe ndị ha ga na-echeta kwa ụbọchị ga-abụ ihe ga na-eme ha obi ụtọ.
Oleekwanụ maka ihe ndị nwere ike ịna-agbawa anyị obi ugbu a? Jehova sikwa n’ọnụ Aịzaya kwe nkwa, sị: “A gaghị echeta ihe mbụ niile, ha agaghị abatakwa n’obi.” Anyị ga-eji nwayọọ nwayọọ chefuo ihe na-enye anyị nsogbu n’obi n’ụwa ochie a. Nke a ọ̀ na-eme gị obi ụtọ? Ya bụrụ otú ahụ, ọ́ gaghị adị mma ka ị chọpụta otú i nwere ike isi bịarukwuo Chineke nso bụ́ onye kwere nkwa na ya ga-emere anyị ihe ọma ndị ahụ n’ọdịnihu?
[Ihe e dere n’ala ala peeji]
^ par. 7 Ọ bụrụ na ị chọrọ ịmatakwu banyere Alaeze Chineke na ihe Alaeze ahụ ga-eme n’oge na-adịghị anya, gụọ isi nke 3, nke 8, na nke 9 n’akwụkwọ bụ́ Gịnị n’Ezie Ka Bible Na-akụzi? Ọ bụ Ndịàmà Jehova bipụtara ya.
Ebe anyị na-atụ aro ka ị gụọ na Baịbụl n’ọnwa Mach:
[Ihe odide gbatụrụ okpotokpo dị na peeji nke 19]
Jehova bu n’obi iwepụ ihe ndị na-akpatara anyị nsogbu, bụ́ ndị ọ na-abụ anyị cheta obi ajọọ anyị njọ