Ia Mafuta Atu i le Atua

“E Lē Toe Manatua Mea sa Iai Muamua”

E MAFAI ona avea manatunatuga ma faamanuiaga. O le manatunatu i nisi o taimi matagofie na faatasi ai ma ē e pele iā i tatou, e faamāfanafanaina ai o tatou loto. Ae i nisi tulaga, e foliga mai ai o manatunatuga, o se mala. Po o e mafatia i ni manatunatuga tigā ona o ni mea na tutupu i aso ua mavae? Pe afai o lea, atonu e te ono manatu, ʻPo o le a mou ese mai i loʻu mafaufau nei manatunatuga tigā?’ E tatou te maua se tali faalaeiau i upu na faamauina e le perofeta o Isaia.—Faitau le Isaia 65:17.

E finagalo Ieova ina ia matuā liaʻieseina le pogai o manatunatuga tigā. E faapefea? E ala i le faaumatia o lenei lalolagi amioleaga ma mafatiaga uma, ae suia i se tulaga lelei e faavavau. Na folafola mai e Ieova e ala iā Isaia: “O loo oʻu faia le lagi fou ma le lalolagi fou.” O le malamalama i lenei folafolaga e mafai ona aumaia ai i o tatou loto se faamoemoe.

O le ā le lagi fou? Ua taʻua i le Tusi Paia ni manatu se lua e mafai ona fesoasoani iā i tatou. Muamua, e toʻalua ni tusitala o le Tusi Paia na taʻua le manatu o le lagi fou, ma o loo uiga uma atu i suiga mataʻina i lenei lalolagi. (2 Peteru 3:13; Faaaliga 21:1-4) Lona lua, i le Tusi Paia, e mafai ona uiga atu le upu “lagi” i se pulega, po o se faigāmalo. (Isaia 14:4, 12; Tanielu 4:25, 26) O le lagi fou la, o se faigāmalo fou lea e mafai ona aumaia tulaga amiotonu i le lalolagi. E na o le tasi le pulega e mafai ona faataunuuina na mea uma, o le Malo lea o le Atua, o se faigāmalo i le lagi lea na aʻoaʻo i tatou e Iesu e tatalo ia oo mai. O lenā Malo, o le a faataunuuina ai le finagalo amiotonu o le Atua i le lalolagi aoao.—Mataio 6:9, 10.

O le ā le lalolagi fou? Seʻi mātau ni faamatalaga moni o loo i le Tusi Paia e mafai ona fesoasoani iā i tatou ina ia iloa le manatu saʻo. Muamua, i le Tusi Paia e masani ona faasino atu le upu “lalolagi” i tagata, ae e lē o le lalolagi laueleele. (Salamo 96:1) Lona lua, ua valoia i le Tusi Paia, i le pulega a le Atua, o le a aʻoaʻo ai e tagata faamaoni le amiotonu lea o le a iai i le lalolagi aoao. (Isaia 26:9) O lea la, o le lalolagi fou, e faasino atu i le sosaiete o tagata o ē e gauaʻi atu i le pulega a le Atua, ma ola e tusa ai ma ana tapulaa amiotonu.

Po ua e tau iloa le auala o le a liaʻiesea ai e Ieova le pogai o manatunatuga tigā? E lē o toe umi ona faataunuu atoatoa lea e Ieova lana folafolaga e faatatau i le lagi fou ma le lalolagi fou amiotonu. * I lenā lalolagi fou, o le a aveesea ai le pogai o manatunatuga tigā, i le itu faaletino, faalemafaufau, ma faalogona. O le a matuā fiafia tagata faamaoni i se olaga faamalieina, ma o le a latou manatua pea na manatunatuga fiafia, a o faagasolo aso taʻitasi.

Ae faapefea mafatiaga o le mafaufau ma faalogona o loo tatou fesagaʻia i aso nei? Ua faaauau mai le folafolaga a Ieova e ala iā Isaia e faapea: “E lē toe manatua mea sa iai muamua, e lē toe alu aʻe foʻi i le loto.” O le a mou atu so o se mea o loo tatou tigā ai i aso nei. Pe e logolelei iā te oe lenā manatu? Pe afai o lea, e lelei pe a e iloiloina po o le ā le auala e mafai ona mafuta vavalalata atu ai i le Atua, o Lē na folafolaina mai se lumanaʻi pupula.

Faitauga Tusi Paia mo Mati:

▪ Isaia 63-66–Ieremia 1-16

[Faaopoopoga i lalo]

[Faamatalaga faaopoopo i le itulau 19]

E finagalo Ieova ina ia matuā liaʻiesea le pogai o manatunatuga tigā