Kporom Hen Aôndo

“Á Kera Umbur Akaa A Tsuaa la Ga”

AKAA a umbur aa fatyô u nan se msaanyol. Ka sea umbur ashighe a dedoo a yange se lu imôngo vea mbadoon se ishima la nahan, i doo se kpen kpen. Kpa ashighe agen yô, ka sea umbur akaa a yange er se ken ijime la yô, i vihi se kpishi. Ishima ngi zan we iyol sha akaa a vihin tsung a yange er u yôô? Aluer kwagh ngu nahan yô, alaghga u pine wer, ‘Akaa a vihin a yange erem ne, a tsa sha won nahan a hungur mo kpa?’ Se fatyô u zuan a mlumun sha mpin ne, u surun se ishima ken mkaanem ma Profeti Yesaia yange nger la.—Ôr Yesaia 65:17.

Yehova wa ishima u va been a hanma kwagh u vihin u yange er, u ka sea umbur ve i ishima i vihi se la cii. Una er kwagh ne nena? Una er kwagh ne sha u karen a tar u ifer ne kera kua hanma ican cii, una gema a va a tar u he, u ua doo a ikighir shio la. Yehova yange tôndozwa sha ikyev i Yesaia nahan ér: “M ngu gban Usha u he man tar u he kpaa.” Aluer se kav kwagh u ityendezwa ne yô, se zua a ishimaverenkeghen kpishi je.

Usha mbahev mbara ka nyi? Bibilo ôr akaa ahar a aa wase se u kaven yô. Hiihii yô, iorov uhar mbagenev mba ve nger Bibilo yô, ôr kwagh u usha mbahev la, man sha ajiir a ahar ne cii, ishember ne ôr kwagh u mbamgem mba vea va lu shin tar ne jimin cii yô. (2 Peteru 3:13; Mpase 21:1-4) Sha uhar yô, ishember i “usha” i i er kwagh u i ken Bibilo la, ia fatyô u tilen sha ityough ki hemen gayô gomoti. (Yesaia 14:4, 12; Daniel 4:25, 26) Sha nahan yô, ishember i usha mbahev la ka gomoti u he, u una fatyô u van a mlu u perapera sha tar yô. Ka gomoti môm tseegh una fatyô u eren akaa ne cii ye, ka Tartor u Aôndo, gomoti u una hemen sha, u Yesu yange tese se ér se eren msen se sônon la. Tartor la ua na, a gema eren ishima i Aôndo tar sha won cii.—Mateu 6:9, 10.

Tar u he la di ka nyi? Nenge ase akaa ahar a ruamabera a tese se, a a wase se u fan kwagh ne vough la. Hiihii yô, ka a ter ishember i “tar” la ken Bibilo yô, ashighe kpishi i ôron i lu kwagh u ior, ka i lu tar u ve tem sha mi ne ga. (Pasalmi 96:1) Sha uhar yô, Bibilo yange i tsengaôron ér shighe u tartor u Aôndo a hemen la, uumace mba jighjigh cii vea hen perapera, u una samber sha tar cii la. (Yesaia 26:9) Sha nahan yô, tar u he la, ka uumace mba vea lumun u wan ayol a ve sha ikyev i hemen u Aôndo, shi vea dondon atindiakaa a na ken uma ve la.

U hii u nengen er i lu u Yehova una va bee a akaa yange er se, a ka sea umbur kwagh u a ve ishima i vihi se la kpa? Ica a kera gba ga tsô, Yehova una kure ityendezwa na i van a usha mbahev man tar u he la, una va a tar u he u perapera. * Ken tar u he la, akaa yange er se ve se ya ican sha iyol, man ken ishima shi se hingir zunguluu la cii aa hingir akaa a tse. Uumace mba jighjigh vea ember uma zan zan ikighir a kera lu ga, shi hanma sev mbu vea umbur akaa a doon a a lu eren ken uma ve la yô, i doo ve je i zua ga.

Nahan kpa, hide sha akaa a nan se ishimavihin, a a alaghga aa na se ule nyian la di ye? Ken ityendezwa i Yehova er sha ikyev i Yesaia la, shi a kaa ér: “Á kera umbur akaa a tsuaa la ga, man shi aa kera va or ken ishima kpaa ga.” Tegh tegh tsô, hanma ishimavihin i se zough a mi ken tar u ngun ne cii, ia bee kera. Ishimaverenkeghen la i doo u kpa? Aluer i doo u yô, er nan u hen kwagh u ú er ve u seer kporom ikyua a Aôndo, u a er ityendezwa i mlu u doon u ken hemen la ga?

[Ngeren u shin kpe]

[Mkaanem ma sha peeji 29 la]

Yehova wa ishima u va been a akaa yange er se, a ka sea umbur ve ishima i vihi se la cii