KUKUMBUKIRA vinthu kungaŵa kwakukondweska. Mtima withu ungazura na cimwemwe para tikulanguruka pa nyengo ziwemi izo tikacezganga na ŵakutemweka ŵithu. Kweni nyengo zinyake kukumbukira vinthu vyakale kungaŵa nga ni nthembo. Kasi imwe mukukwenyelera para mukukumbuka ivyo vikamucitikiranipo kumasinda? Usange ndimo viliri, nyengo zinyake mungajifumba kuti, ‘Kasi vinthu vyacitima ivi, vizamufumamo mu maghanoghano ghane?’ Zgoro lakukhozga tikulisanga mu mazgu ghakulembeka na nchimi Yesaya.—Ŵazgani Yesaya 65:17.

Khumbo la Yehova ndakuti wawuskepo vinthu viheni ivyo ŵanthu ŵakukwenyelera navyo. Kasi wazamuwuskapo wuli? Mwakufumiskapo caru ciheni ici pamoza na masuzgo ghose na kukhazikiska vinthu viwemi kwamuyirayira. Kwizira mwa Yesaya, Yehova wakulayizga kuti: “Nkhulenga mtambo uphya na caru ciphya.” Usange tapulikiska layizgo ili, tingaŵa na cilindizga ciwemi munthazi.

Kasi mtambo uphya panji kuti macanya ghaphya ni vici? Baibolo likutipa vinthu viŵiri ivyo vingatovwira kuti timanye. Cakwamba, fundo yakuti mtambo uphya yili kuzunulikaso na ŵalembi ŵaŵiri ŵa Baibolo, ndipo malemba ghose agha, ghakulongora kuti vinthu vizamusintha comene pa caru capasi. (2 Petrosi 3:13; Uvumbuzi 21:1-4) Caciŵiri, mu Baibolo lizgu lakuti “macanya” lingayimiraso muwuso panji boma. (Yesaya 14:4, 12; Daniel 4:25, 26) Ntheura, macanya ghaphya ni boma liphya, ilo lizamovwira kuti pa caru capasi paŵe mtende. Ni boma limoza pera ilo lingafiska kucita nthena. Boma ili ni Ufumu wa Ciuta, boma lakucanya ilo Yesu wakatiphalira kuti tilombenge. Ufumu uwu uzamovwira kuti khumbo la Ciuta licitike pa caru cose capasi.—Mateyu 6:9, 10.

Kasi caru ciphya ni vici? Wonani fundo ziŵiri za mu Baibolo izo zingatovwira kuti timanye unenesko. Yakwamba, mu Baibolo lizgu lakuti “caru” nyengo zinyake likung’anamura ŵanthu, kuti caru ceneco yayi. (Salmo 96:1) Yaciŵiri, Baibolo likayowoyerathu kuti para Ciuta wamba kuwusa, ŵanthu ŵakugomezgeka ŵazamusambira urunji uwo uzamuthandazgika pa caru cose. (Yesaya 26:9) Ntheura, caru cikwimira ŵanthu awo ŵazamujilambika ku muwuso wa Ciuta na kulondezga malango ghake ghaurunji.

Kasi mwamba kuwona umo Yehova wazamuwuskirapo vinthu vyakale ivyo vikumukwenyerezgani? Sonosono apa Yehova wafiskenge layizgo lake la macanya ghaphya na caru ciphya, umo muzamuŵa urunji. * Mu caru ciphya, vinthu ivyo ŵanthu ŵakukwenyelera navyo vizamuwuskikapo. Ŵanthu ŵakugomezgeka ŵazamusangwa mwakufikapo, ndipo ŵazamukondwa na viwemi ivyo ŵazamukumbukanga zuŵa lililose.

Kweni wuli pakuyowoya za vinthu ivyo vikutisuzga maghanoghano sono? Layizgo ilo Yehova wakalayizga kwizira mwa Yesaya likulutilira kuti: “Vya kale ntha vikumbukikenge panji kunjiraso mu mtima.” Vinthu vyose vyakukwenyerezga ivyo vikuticitikira mu caru cikoloŵere ici vizamufumapo. Kasi imwe mukukondwa yayi na layizgo ili? Usange ni nthena, mwalekeraci kusambira vinandi ivyo vingamovwirani kuti musendelere kwa Ciuta uyo walayizga vinthu viwemi munthazi?

Vipaturo ivyo mungaŵazga mu Malici:

◼ Yesaya 63-66–Yeremiya 1-16

[Mazgu ghamusi]

[Mazgu Ghakukhozgera pa peji 19]

Khumbo la Yehova ndakuti wawuskepo vinthu vyakale vyose, ivyo vikukwenyerezga ŵanthu.