Daotan ba ang Espiritismo?

Sukad sa pagkabatan-on, si Barbara * makakitag mga panan-awon, makadungog ug mga tingog, ug kombinsido nga makakomunikar siya sa iyang namatayng mga paryente. Sila sa iyang bana nga si Joachim, mobasag mga libro bahin sa espiritismo ug nahimong batid sa pagbasag barahang tarot. Pinaagi niini nakasapi silag dako. Usa ka adlaw niana, nabasa nila sa baraha nga may moadto sa ilang balay nga peligrosong mga tawo, ug nabasa nila kon unsaon pagpanalipod ang ilang kaugalingon.

BISAG daw kinaraan na ang pagtuo sa espiritismo, daghan gihapon ang interesado sa misteryosong mga butang. Daghan ang magsul-ob ug anting-anting, mogamit ug Ouija board, ug mokonsulta sa mga espiritista aron masayran ang ilang kaugmaon o mapanalipdan sila batok sa daotan. Sa artikulo nga nag-ulohang “Laptop and Lucifer,” ang German nga magasing Focus mikomento: “Tungod sa Internet mikaylap ang espiritismo.”

Nahibalo ka ba nga ang Bibliya naghisgot bahin sa espiritismo? Makurat ka tingali sa gisulti sa Bibliya bahin niana.

Ang Giingon sa Bibliya Bahin sa Espiritismo

Ang balaod sa Diyos sa karaang Israel nag-ingon: “Walay makaplagan diha kanimo nga . . . bisan kinsa nga nagapanag-an, usa ka salamangkero o bisan kinsa nga nagapangitag mga tilimad-on o usa nga barangan, o usa nga tigpangdaot o bisan kinsa nga nagakonsultag espiritista o tigpanagna sa mga hitabo o bisan kinsa nga nagapakisayod sa mga patay. Kay bisan kinsa nga nagabuhat niining mga butanga dulumtanan kang Jehova.” (Deuteronomio 18:10-12) Nganong gidili gayod sa Diyos ang espiritismo?

Ingon sa gipakita sa eksperyensiya sa sinugdan, daghan ang nagtuo nga ang mga buhi makakomunikar sa mga patay ug nga ang impormasyon nga makuha sa mga espiritista gikan gayod sa mga patay. Ang maong pagtulon-an gipasukad sa gitudlo sa daghang relihiyon—nga ang mga patay magpabiling buhi sa kalibotan sa mga espiritu. Apan, sukwahi niana, ang Bibliya klarong nag-ingon: “Bahin sa mga patay, sila walay nahibaloan nga bisan unsa.” (Ecclesiastes 9:5) Gihubit niini ang mga patay nga daw hinanok nga natulog nga wala  gayoy kalibotan sa panghitabo sa ilang palibot. * (Mateo 9:18, 24; Juan 11:11-14) Kon mao, mangutana ka tingali, Unsaon nato pagpatin-aw ang misteryosong mga eksperyensiya sa mga tawo? Kinsa may nagpaluyo niana?

Pakigkomunikar sa Kalibotan sa mga Espiritu

Gipakita sa mga Ebanghelyo nga sa dinhi pa si Jesus sa yuta, siya nakigsulti sa mga espiritu. Ang Marcos 1:23, 24 nag-asoy nga usa ka “mahugaw nga espiritu” ang miingon kang Jesus: “Ako nahibalo pag-ayo kon kinsa ka.” Sa way duhaduha nakaila sab nimo ang mga espiritu. Apan nakaila ka ba nila?

Sa wala pa lalanga sa Diyos ang tawo, siya naglalang ug daghang espiritung mga anak, o mga anghel. (Job 38:4-7) Sila maoy mga linalang nga mas labaw kay sa tawo. (Hebreohanon 2:6, 7) Sila gamhanan ug intelihente kaayo, ug sila gilalang aron buhaton ang kabubut-on sa Diyos. Ang salmista miawit: “Dayega ninyo si Jehova, Oh kamong mga manulonda niya, nga gamhanan sa kusog, nga nagatuman sa iyang pulong.”—Salmo 103:20.

Gipadayag sa Bibliya nga sa ngadtongadto pipila sa mga anghel ang nakigkomunikar sa mga tawo sa paaging wala uyoni sa Diyos. Unsay katuyoan? Ang unang mibuhat niana migamit ug panglimbong aron ipahilayo ang unang tawo, si Adan ug Eva, sa ilang Diyos ug Maglalalang. Sa pagbuhat niana, iyang gihimo ang iyang kaugalingon nga Satanas nga Yawa, usa ka tigpasipala ug magsusupak sa Diyos.—Genesis 3:1-6.

Sa ulahi, ang ubang mga anghel “mitalikod sa ilang nahiangay nga puloy-anang dapit” didto sa langit, nagsul-ob ug tawhanong lawas, ug nakigrelasyon sa maanyag nga mga babaye sa yuta. (Judas 6; Genesis 6:1, 2) Kadtong rebeldeng mga anghel ug ang ilang mestisong mga anak nanghasi sa katawhan, sa ingon ang yuta “napuno sa kapintasan.” Tingali pamilyar ka sa asoy sa Bibliya kon giunsa paglaglag sa Diyos ang maong mapintas ug daotang kaliwatan pinaagi sa Lunop sa adlaw ni Noe.—Genesis 6:3, 4, 11-13.

Tungod sa lunop, ang mga anghel napugos pagbiya sa ilang tawhanong lawas ug sa pagbalik sa espiritung dapit. Apan wala sila tugoti sa Maglalalang nga mobalik sa ilang orihinal nga “puloy-anang dapit.” Hinunoa, sila anaa sa gipaubos nga kahimtang nga gipakasama sa “mga gahong sa naglugitom nga kangitngit.” (2 Pedro 2:4, 5) Gitawag sa Bibliya kining rebeldeng mga anghel nga “mga demonyo.” (Santiago 2:19) Sila ang gahom luyo sa espiritismo.

Kon Unsay Gusto sa mga Demonyo

Sa panguna, ang tumong sa daotang mga espiritu nga nakigkomunikar sa mga tawo mao ang pagpatalikod kanila sa pagsimba sa matuod nga Diyos, si Jehova. Ang gasa o gahom nga nabatonan kono sa naghimog espiritismo maoy mga paagi nga magpugong sa mga tawo sa pagkuhag tukmang kahibalo bahin sa Diyos ug sa pagbatog relasyon kaniya.

Ang ikaduhang tumong sa mga demonyo makita diha sa gihimo sa ilang lider, si Satanas, ngadto kang Jesus. Gitanyag ni Satanas kang Jesus “ang tanang gingharian sa kalibotan ug ang ilang himaya.” Unsay gustong baylo ni Satanas niana? ‘Hapa ug paghimog usa ka buhat sa pagsimba kanako,’ siya miingon. Oo, gusto ni Satanas ug sa mga demonyo nga simbahon sila. Apan midumili si Jesus kay dili gyod niya buot talikdan ang Diyos ug ang matuod nga pagsimba.—Mateo 4:8-10.

 Karon, ang daotang mga espiritu panagsa na lang makigkomunikar nga direkta. Hinunoa, mangita silag paagi nga malit-agan ang mga dili mabinantayon pinaagi sa daw dili makadaot nga kalihokan sama sa pagpanagna gamit ang bolang kristal, dahon sa tsa, barahang tarot, pendulo, ug horoscope. Ayawg palimbong! Kanang mga buhata dili yanong pagpakigkomunikar sa usa ka misteryosong kalibotan. Gigamit sa daotang mga espiritu ang espiritismo sa paglit-ag sa mga tawo aron sila mahitipas sa pagsimba kang Jehova. Kon mapakyas sila niana, sagad ilang hasion ug himoong miserable ang kinabuhi niadtong ilang nalit-agan. Kon nahitabo kana nimo, unsay imong mahimo aron makalingkawas ka sa ilang impluwensiya?

Kon Unsaon Paglingkawas

Hinumdomi, ang mga espiritung nakigkomunikar sa mga tawo maoy mga kaaway sa Diyos, gihukmang malaglag. (Judas 6) Sila mga impostor ug bakakon, kinsa nagpakaaron-ingnong mao ang mga patay. Unsay bation nimo kon imong mahibaloan nga ang imong gituohang higala usa diay ka impostor, nga nagtinguha lamang sa pagdaot kanimo? Unsay imong buhaton kon imong madiskobrehan nga ang imong natrato sa Internet usa diay ka tigmolestiya? Mas peligroso pa niana ang malit-agan sa mga demonyo. Kinahanglang buhaton nimo ang tanan aron makalingkawas kanila. Unsay imong mahimo?

Human masayri ang gitudlo sa Kasulatan bahin sa espiritismo, naamgohan sa pipila ka molupyo sa karaang Efeso nga kinahanglan nilang sunogon ang mga basahon bahin sa salamangka, bisag mahal kaayo kini. ‘Gisunog nila kini atubangan sa tanan.’ (Buhat 19:19, 20) Karon, dili lang mga libro, anting-anting, Ouija board, ug susama niana ang nalangkit sa espiritismo kondili ang mga materyal usab nga anaa sa Internet ug uban pa. Likayi ang bisan unsa nga motultol nimo sa espiritismo.

Hinumdomi ang magtiayon nga gihisgotan sa sinugdan. Pinaagi sa ilang barahang tarot, sila nakahinapos nga may peligrosong mga tawo nga moadto sa ilang balay ug kinahanglang dili sila mamati ni modawat ug bisan unsa gikan nila. Apan sa dihang si Connie ug Gudrun, nga mga Saksi ni Jehova, nanuktok sa ilang balay ug nag-ingong dala nila ang maayong balita bahin sa Diyos, si Joachim ug Barbara midesidir nga maminaw. Sa ilang panag-estoryahay ilang nahisgotan ang bahin sa espiritismo, ug gihatagan sila ni Connie ug Gudrun ug tukmang impormasyon bahin niana gikan sa Kasulatan. Nasugdan ang regular nga panaghisgot sa Bibliya.

Sa wala madugay nakahukom si Joachim ug Barbara nga putlon ang tanang kontak sa mga demonyo. Gipatin-aw sa mga Saksi nga ang mga espiritu lagmit dili gyod malipay niana. Tuod man, si Joachim ug Barbara gihasi pag-ayo sa mga demonyo. Taudtaod gyod nga mahadlok sila kada gabii ug nahuwasan lang sila sa pagbalhin nilag laing balay. Bisan pa niana, kini nga magtiayon nagmasaligon sa giingon sa Filipos 4:13: “Sa tanang butang ako adunay kusog pinaagi kaniya nga naghatag ug gahom kanako.” Gipanalanginan ni Jehova ang ilang determinasyon, ug sa ngadtongadto mihunong ra ang mga espiritu sa paghasi kanila. Karon, si Joachim ug Barbara malipayong nagsimba sa matuod nga Diyos, si Jehova.

Ang Kasulatan nag-awhag sa tanang nagtinguha sa panalangin ni Jehova: “Magpasakop kamo sa Diyos; apan sukli ang Yawa, ug siya mokalagiw gikan kaninyo. Duol sa Diyos, ug siya moduol kaninyo.” (Santiago 4:7, 8) Si Jehova nga Diyos makahimo sa pagtabang ug motabang gyod nimo nga makalingkawas sa impluwensiya sa demonyo, kon buot nimo. Sa paghinumdom sa ilang pagkalingkawas sa espiritismo, si Joachim ug Barbara kinasingkasing nga miuyon sa giingon sa Salmo 121:2: “Ang akong tabang nagagikan kang Jehova.”

[Mga footnote]

[Blurb sa panid 21]

Ang espiritismo magpugong sa mga tawo sa pagbatog maayong relasyon sa Diyos

[Blurb sa panid 22]

“Duol sa Diyos, ug siya moduol kaninyo.”—SANTIAGO 4:8